چاوان ترسا په‌یدابوونا شه‌رێ نافخۆ دێ هێته بنبركرن؟
به‌رده‌وام د هه‌لكه‌فت و بیره‌وه‌ریێن فه‌رمی و نه‌فه‌رمی یێن ژ هه ف جودا دا دهێته گوتن كو گه‌لێ كورد دیرۆكه‌كا پر ژ شانازی و سه‌رفه‌رازی هه‌یه و خه‌بات و قوربانی دانێن وی گه‌هاندیه ئه‌ڤرۆ و هه‌ر چ نه‌بیت ئه‌و ئازادییا بۆ ده‌مێ بیست و چوار سالانه ل باشوری َ كوردستانێ هاتیه هه‌بوونێ به‌رهه‌می وێ دیرۆكا ب شانازی یه لێ ناهێته مانده‌لكرن دیرۆك یا ڤالا نینه ژ خالێن ره‌ش یێن كو بیر ئینانا وان دبیته ئه‌گه‌رێ مخابنی و دل ئێشانێ.
شه‌رێ نافخۆ یێ كو ل سالێن نۆتا ژ چه‌رخێ بوری ل باشورێ كوردستانێ د ناڤبه‌را دوو پارتێن سیاسی یێن مه‌زن ل هه‌رێمێ په‌یدابوی و چه‌ندین قوربانی بوینه به‌رهه‌مێ ڤی شه‌ری ئێكه ژڤان خالێن ره‌ش.
د ده‌ما هه‌ر بیرئینانه‌كێ دا ژلایێ سه‌ركرده‌یێن هه‌رێمێ هاتیه دۆپاتكرن كو دووباره بوونا ڤێ روودانا ته‌حل چ جارێن دی ناهێته دیتن دهه‌مان ده‌م دا ئه‌ڤه حه‌زو ئومێدا پرانیا خه‌لكی یه، لێ ب ناكوكیێن دناڤبه‌را لایه‌نان دا د ڤان سالێن بۆری دا په‌یدا دبن جارجاران ترسا دوباره په‌یدابوونا ڤێ سه‌ربورا دلته‌زین جهێ خو دناڤ دلێ وان دا دكه‌ت، پرسیارا خودسه‌پینیت ئه‌ڤه‌یه گه‌لۆ د ئالۆزیان دا دێ چاوان بژارده‌یا شه‌ر كرنێ دگه‌ل هه‌ڤ هێته ژناڤبرن و بیر ل شه‌رێ ناڤخو ناهێته كرن یان ئه‌گه‌ر بهێته كرن ژی رێ بهێته گرتن؟
ژبه‌ر كو سوته‌مه‌نییا سه‌ره‌كییا هه‌موو جه‌نگان خه‌لكێ ئاسایی یه و ئه‌وه دبیته جه‌نگاوه‌رو خونا وی دهێته رێتن له‌وما هینگێ ئه‌ڤ ترسه دێ بنبر بیت ده‌مێ خه‌لكی ئه‌و به‌ر هه‌ڤیه تێدا نه‌بیت خوینا خۆ و برایێن خو برێژیت ئه‌ڤه ژی دێ هینگێ هێته هه‌بوونێ كو ئه‌و بگه‌هیته وێ باوه‌رێ نه‌ته‌وایه‌تی پیرۆزتره ژ گرۆپ گرۆپانێ و خۆ كوشتنێ بۆ ڤی ره‌نگی یان ره‌نگێ هه‌نێ ئه‌ركێ سه‌ره‌كی ژی یێ رێكخراوێن و جڤاكا سڤیله كو خه‌لكی به‌ره‌ڤ سڤلیبونێ ببه‌ت هه‌روه‌سا پارتێن سیاسی ژی ئه‌ركه‌كێ به‌رچاڤ دكه‌ڤیته سه‌ر ملان كو خه‌لكی ژ هزرا به‌رته‌نگا پارتیه‌تی به‌ره‌ف وه‌لات په‌روه‌ری ئاخ پاراستنێ ئاراسته بكه‌ن هینگێ دێ خه‌لك ژی ئارمانجێن دوور و پیرۆز ل ده‌ڤ په‌یدابن دێ به‌رهه‌ڤ بیت بۆ پارستنا ئاخا خۆ بیته قوربانی وه‌كو نها ل دیراتییا پتر ژ هزار كیلۆ مه‌تران گوریكه‌ران دبینین لێ شه‌ره نیخێن پارتان وی به‌ره‌ڤ چه‌گ هه‌لگرتنێ هان نا ده‌ن و هه‌ر روو دانه‌كا په‌یدابیت ئه‌و دێ ب چاڤێ قه‌یرانه‌كا به‌روه‌خت ته‌ماشه كه‌ت و دێ مرۆڤی ژ هندێ مه‌زنتر بینیت كو بۆ ئارمانجه‌كا به‌رنه‌كه‌ڤتی به‌ره‌ڤ گورستانێ بچیت.
هه‌لبه‌ت ده‌ما جڤاكه‌ك یان وه‌لاته‌ك دبیته خودان ئه‌ڤ ره‌نگێ تاكه‌كه‌سان دێ ئه‌و وه‌لاته رۆژ بۆ رۆژێ به‌ره‌ڤ قوناغێن بلندێن ئاڤابونێ ده‌ته رێ لێ د خو كوشتن و بلند بوونا ده‌نگێ چه‌كان ژبلی وێرانبوونێ چ تشتێن دیتر به‌رهه‌م نائینیت ئانكو ڤی ده‌می پێشڤه‌چوون ژ بلی خه‌ونه‌كا بێ بنواشه ب چ ره‌نگێن دیتر ناهێته پێناسه‌كرن ژبه‌ركو ئاڤابوونا هه‌ر وه‌لاته‌كی پێدڤی ب تاكه‌كێ هزر ساخله‌م و ئاڤاكریه ئه‌گه‌ر هزرا تاكان یا كاڤل بیت چه‌ند ڤله و ئاڤاهی بلند ببن ژی هه‌ر ئه‌و وه‌لاته نه‌شێت ژبن مه‌ترسییا كاڤل بوونێ قورتال ببیت.
