چاپان و كرواتیا به‌ر ب هیڤیێن مه‌زن
ئه‌ڤرۆ
دهێته چاڤه‌ڕێ كرن ئه‌ڤرۆ ژی دو یاریێن دی ژ چارچووڤێ هه‌ڤڕكیێن قۆناغا 16ێ یا كۆپا جیهانێ قه‌ته‌ر 2022 بهێنه ئه‌نجامدن.
چاپان- كرواتیا
بڕیاره ئه‌ڤ یاریه ل ده‌مژمێر شه‌شێ شه‌ڤ ل یاریگه‌ها ستاد ئه‌لجنوب بهێته كرن، هه‌ردو هه‌لبژارت ژلایێ دیرۆكێ و كێشوه‌ری گه‌له‌ك ژێك دوورن لێ هه‌ردوكا ئێك ئارمانج هه‌یه ئه‌وژی سه‌ركه‌فتنه و ده‌ربازبوون بۆ قۆناغا هه‌شتێ، هه‌لبژارتیێ چاپان نوونه‌را كێشوه‌رێ ئاسیا شیا هه‌تا نوكه ببیته ئێك ژ سۆپرایزێن قاره‌مانیێ تایبه‌ت پشتی شیایی د یاریا خوه یا ئێكێ ژ كۆما پێنجێ دا سه‌ركه‌فتنێ ل سه‌ر ئه‌لمانیا بینت ب2-1 گۆلان كو ئێك ژ ئه‌وان هه‌لبژارتیێن به‌ری ده‌ستپێكرنا قاره‌مانیێ به‌ربژارا ناسناڤی بوو لێ د قۆناغا كۆمان دا راوه‌ستیا و ده‌رباز نه‌بوو، چاپانێ د یاریا دویێ ژ كۆما خوه ل سه‌ر كۆستاریكا خوساره‌ت بوو ب گۆله‌كێ بێ به‌رامبه‌ر و یا سێیێ سه‌ركه‌فتنا دویێ یا دیرۆك ل سه‌ر هه‌لبژارتیێ ئسپانیا ئینا ب2-1 گۆلان، ب كۆمكرنا شه‌ش خالان سه‌رێ لیستێ هات ل سه‌ر كیستێ دو هه‌لبژارتیێن مه‌زن، هه‌مبه‌ری وێ هه‌لبژارتیێ كرواتیا د كۆما پێنجێ دا رێزا دویێ هات ب دو وه‌كهه‌ڤیان ل گه‌ل هه‌لبژارتیێن مه‌غرب و به‌لجیكا بێ گۆل و سه‌ركه‌فتن ل سه‌ر كه‌نه‌دا ئینا 4-1 گۆلان، هه‌رچه‌نده دیرۆكا پشكداریێن هه‌لبژارتیێ كرواتیا باشتره ژ چاپانێ و شیایه ل مۆندیالا 1998ێ بگه‌هیته قۆناغا پێش دووماهیێ و رێزا سێیێ ده‌ستڤه‌بینت، د مۆندیالا 2018ێ وه‌كو هه‌سپێ ره‌ش گه‌هشته یاریا دووماهیێ دا ل گه‌ل فره‌نسا ب چار گۆلان به‌رامبه‌ر دو گۆلان تووشی خوساره‌تیێ بوو و رێزا دویێ ب ده‌ستڤه ئینا، ژلایێ خوه‌ڤه هه‌لبژارتیێ چاپان سه‌رباره‌یی ئه‌ڤه دێ بیته پشكداریا وێ یا حه‌فتێ د مۆندیالان دا لێ د سێ مۆندیالان دا گه‌هشتیه قۆناغا 16ێ ئه‌وژی ل 2002، 2010، 2018ێ، ئه‌ڤ یاریه دبیته یا چارێ كو د سێ یاریێن بوری دا وه‌كهه‌ڤی بووینه، كرواتیا كۆمه‌كا باش یا یاریزانێن خودان شیان هه‌نه ب سه‌ركێشیا لۆكا مۆرێچ ئه‌وێ رۆله‌كێ مه‌زن د هه‌رسێ یاریێن بۆری یێن كۆما خوه دا ئیناین، لێ چاپان ژی پاریه‌كێ ب سانه‌هی نابیت ئه‌وا شێوازێ سه‌رده‌مانه شیایی وه‌كو هه‌سپێ ره‌ش بهێته دناڤ قاره‌مانیێ دا و به‌لگه‌ژی ئه‌و ئه‌نجامێن ل سه‌ر مه‌زنێن جیهانێ ئیناین.
به‌رازیل -كوریا باشۆر
ئه‌ڤ یاریه دێ پرانیا جادا وه‌رزشی گرنگیێ پێ ده‌نه ئه‌وا بڕیاره ل ده‌مژمێر 10 شه‌ڤ ل یاریگه‌ها 974 بهێته ئه‌نجامدان، هه‌لبژارتیێ به‌رازیل ئێك ژ به‌ربژارێن سه‌ره‌كی بۆ ده‌ربازبوونێ به‌ر ب قۆناغا هه‌شتێ و ده‌ستڤه ئینانا ناسناڤی، د قۆناغا كۆمان دا هه‌لبژارتیێ سامپا شیابوو سه‌ركه‌فتنێ ل سه‌ر سربیا ب دو گۆلان و سویسرا گۆله‌كێ بینت لێ د یاریا سێیێ دا ب پێكهاتیێ یه‌ده‌ك ل گه‌ل كامیرۆن ب گۆله‌كێ تووشی خوساره‌تیێ بوو ب شه‌ش خالان سه‌رێ لیستا كۆما حه‌فتێ هات، ژلایێ خوه‌ڤه هه‌لبژارتیێ كوریا وه‌كو ئێك هه‌لبژارتیێن هه‌سپێ ره‌ش هاته دیتن، دیاریا ئێكێ یا كۆما هه‌شتێ دا ب گۆله‌كێ ل گه‌ل ئۆرۆگوایی وه‌كهه‌ڤبوو، دیسان ل گه‌ل غانا ب 3-2 خوساره‌ت بوو لێ ب دڕبه‌كێ مه‌زن شیا سه‌ركه‌فتنێ ل سه‌ر پۆرتۆگال بینت 2-1 ب كۆمكرنا چار خالان وه‌كو تیما دویێ بگه‌هیته قۆناغا 16ێ، هه‌رچه‌نده پێشبینی هه‌موو بۆ هه‌لبژارتیێ به‌رازیل د چن ئه‌وا ب دیرۆكا خوه خودان پێنج ناسناڤێن جیهانی و 22 جاران پشكداری كریه كو دبیته دوچاركی یا هه‌لبژارتێ كوریا ئه‌وا 11 پشكداری د مۆندیالان دا كری، ل مۆندیالا 2002ێ رێزا چارێ ئینایه و مۆندیالا 2010 گه‌هشتیه قۆناغا16ێ.
سه‌رباری ده‌نگۆباسێن ڤه‌گه‌ڕیانا ستێرا به‌رازیلی نیمار دا سیلڤا لێ دو یاریزانێن دی هاتینه هنگاڤتن ئه‌وژی گابریێل خیسیۆس و ئه‌لێكس تیلی سلێ دێ پشبه‌ستنا راهێنه‌ر ئیدینۆر لیۆناردۆ-تیتی- ب كۆمه‌كا مه‌زن یا یاریزانێن باش نموونه، دانی ئالڤێس، كاسیمیرۆ، ڤینیسیۆس جۆنیرۆ، نیمار، راڤینیا و گۆلكه‌ر ریتچالیسۆن، ژلایێ خوه‌ڤه راهێنه‌رێ هه‌لبژارتیێ كوریا باشۆر پاولۆ بینیتۆ گه‌شبینه ب ئاستێ دووماهی یاری ل گه‌ل پۆرتۆگال د یاریا ئه‌ڤرۆ ژی دا دیاربكه‌ت تایبه‌ت ژلایێ ستێرێن خوه سۆن هیۆنگ مین و گۆلكه‌رێ وێ تچۆ كیۆ سیۆنگ، هۆانگ هی شۆ و كیم یۆنگ كۆن.
