چاڤدێره‌كێ سیاسی:هێزێن ئیرانێ رۆژانه چالاكڤانێن كورد ده‌سته‌سه‌ر دكه‌ن
ئه‌ڤرۆ، هۆشه‌نگ تاجر:
چاڤدێره‌كێ سیاسی یێ رۆژهه‌لاتێ كوردستانێ راگه‌هاند كو پشتی ئیبراهیم ره‌ئیسی وه‌كو سه‌رۆك كۆمارێ ئیرانێ ده‌ست ب كارێ خوه كری هه‌لوه‌ستێ ئیرانێ ل هه‌مبه‌ر كوردان گه‌له‌ك توند بوویه و رۆژانه هێزێن ئیرانێ چالاكڤانێن كورد ده‌سته‌سه‌ر دكه‌ن.
شه‌هرام ئه‌حمه‌دی چاڤدێرێ سیاسی ل باژێرێ سنه یێ رۆژهه‌لاتێ كوردستانێ بۆ ئه‌ڤرۆ دیار كر كو د ماوه‌یێ سێ رۆژێن بۆری ل پارێزگه‌ها سنه پتر ژ ٣٠ چالاكڤانێن مافێن مرۆڤی كو پرانیا وان د بیاڤێ پاراستنا ژینگه‌هێ و مافێن مرۆڤی دا كار دكه‌ن ژ ئالیێ هێزێن ئێمناهیێ یێن ئیرانێ ڤه هاتینه ده‌سته‌سه‌ر كرن و رۆژانه ده‌سته‌سه‌ركرنا لاوێن كورد به‌رده‌وامه و ئه‌و یه‌ك ژی وه‌سا كریه كو نها ترسه‌كا گه‌له‌ك مه‌زن ل ده‌ف خه‌لكی په‌یدا بوویه، چونكو بێی چو ئه‌گه‌ره‌كێ هێزێن ئیرانێ چالاكڤانان ده‌سته‌سه‌ر دكه‌ن و گۆت: (هه‌كه ئه‌م به‌رێ خوه بده‌ینێ دیار دبیت كو سه‌رده‌مێ ئیبراهیم ره‌ئیسی ژ سه‌رۆك كۆمارێ به‌رێ نها گه‌له‌ك خرابتره، چونكو پشتی ئیبراهیم ره‌ئیسی وه‌كو سه‌رۆك كۆمارێ ئیرانێ ده‌ست ب كارێ خوه كری ل پارێزگه‌ها سنه هه‌تا نها نێزیكی سه‌د كه‌سان هاتینه ده‌سته‌سه‌ركرن و تشتێ ئه‌ز دزانم ل پارێزگه‌هێن دی یێن رۆژهه‌لاتێ كوردستانێ ژی رێژه‌كا به‌رچاڤ ژ چالاكڤانان هاتینه ده‌سته‌سه‌ر كرن).
ناڤهاتی ئه‌و یه‌ك ژی دیار كر كو ژ به‌ر ده‌سته‌سه‌ركرنا چالاكڤانان و فشارێن رژێما ئیرانێ ل سه‌ر كوردان رۆژانه ب ده‌هان گه‌نجێن مه ژ نه‌چاریێ به‌رێ خوه دده‌نه ئورۆپا و نها ب سه‌دان گه‌نجێن رۆژهه‌لاتێ كوردستانێ ل سه‌ر سنۆرێ بیلارۆسیا و پۆله‌ندا ئاسێ بووینه و د ره‌وشه‌كا گه‌له‌ك خراب دانه، چونكو ژ ئالیه‌كێ بێكاری و هه‌ژاری و ل ئالیێ دی ژی ده‌سته‌سه‌ركرنا گه‌نجان ژ ئالیێ رژێما ئیرانێ ڤه وه‌سا كریه كو ئێدی براستی ژیان ل رۆژهه‌لاتێ كوردستانێ بۆ خه‌لكی گه‌له‌ك زه‌حمه‌ت بوویه و گۆت: (گه‌له‌ك كه‌س وه‌سا دبێژن كو ئیبراهیم ره‌ئیسی بۆ كوردان باشه و كورده‌ك ژی كریه شیره‌تكارێ خوه، لێ ئه‌و یه‌ك تنێ بۆ خاپاندنا رایا گشتی یه، چونكو ئه‌م ل رۆژهه‌لاتێ كوردستانێ دژین و رۆژانه ئه‌م ب چاڤێن خوه دبینین كا چ زۆلم و زۆرداریه‌ك ل كوردان دهێته كرن، ده‌سته‌سه‌ركرنا و سێداره‌دانا كوردان ب رێژه‌كا به‌رچاڤ زێده بوویه و رۆژانه چالاكڤانێن كورد دهێنه ده‌سته‌سه‌ركرن و براستی ژی نها ئه‌ز دشێم بێژم كو ره‌وشه‌كا نه‌ئاسایی ل رۆژهه‌لاتێ كوردستانێ هه‌یه).
ل ئالیێ دی ناڤه‌ندا هه‌ڤكاریێ یا پارتێن رۆژهه‌لاتێ كوردستانێ ژی د داخۆیانیه‌كێ دا راگه‌هاند كو سه‌رده‌مه‌ك گه‌له‌ك خراب و دژوار ل رۆژهه‌لاتێ كوردستانێ ده‌ستپێكریه و رژێما ئیرانێ رۆژانه گه‌نج و چالاكڤانێن كورد ده‌سته‌سه‌ر دكه‌ت، زۆلم و زۆرداریا ل سه‌ر كوردان ب ره‌نگه‌كێ به‌رچاڤ زێده بوویه و رۆژانه چالاكڤانێن كورد ل رۆژهه‌لاتێ كوردستانێ دهێته ده‌سته‌سه‌ركرن، فشاره‌ك مه‌زن ل سه‌ر مالبات و كه‌سوكارێن چالاكڤانان ژی هه‌یه و رێ ناهێته دان ئه‌و راستیێن هه‌ی بۆ رایا گشتی ئاشكرا بكه‌ن.
ناڤه‌ندا هه‌ڤكاریێ یا پارتێن رۆژهه‌لاتێ كوردستانێ داخواز ژ وه‌لاتێن ئێكه‌تیا ئورۆپا، رێكخراوێن مافێن مرۆڤی دكه‌ت كو ل هه‌مبه‌ر ره‌وشا نها یا خراب ل رۆژهه‌لاتێ كوردستانێ بێده‌نگ نه‌مینن، چونكو ئیران ل به‌ر چاڤێن هه‌موو جیهانێ زۆرداریێ ل كوردان دكه‌ت و مافێن مرۆڤی ل به‌ر چاڤێن هه‌موو جیهانێ دهێته بنپێكرن، ژ به‌ر هندێ ژی دڤێت وه‌لاتێن ئێكه‌تیا ئورۆپا و ئه‌و رێكخراوێن كو رۆژانه به‌حسێ مافێن مرۆڤی دكه‌ن ل هه‌مبه‌ر ره‌وشا خراب یا ل رۆژهه‌لاتێ كوردستانێ خوه‌دان هه‌لوه‌ست بن.
