چاڤدێره‌كێ سیاسی: ژ به‌ر ئسرائیلێ په‌یوه‌ندیێن ئیرانێ و ئازه‌ربایجانێ ئالۆز بووینه
دیدار، هۆشه‌نگ تاجر:
چاڤدێره‌كێ سیاسی یێ رۆژهه‌لاتێ كوردستانێ دیار دكه‌ت كو نها په‌یوه‌ندیێن ئازه‌ربایجانێ و ئیرانێ گه‌له‌ك ئالۆز بووینه و هه‌ر دو وه‌لات ژی گه‌فان ل هه‌ڤدو دكه‌ن، ئازه‌ربایجانێ په‌یوه‌ندیێن باش ل گه‌ل ئسرائیلێ هه‌نه و ئه‌و یه‌ك ژی بوویه مه‌ترسی بۆ ئیرانێ.
دارا ناتق چاڤدێرێ سیاسی یێ رۆژهه‌لاتێ كوردستانێ ل وه‌لاتێ به‌لجیكا بۆ ئه‌ڤرۆ دیار كر كو ده‌مه‌كه ئیران ژ باشبوونا په‌یوه‌ندیێن ئسرائیلێ و ئازه‌ربایجانێ دلگرانه، به‌ری نها گه‌له‌ك جاران ئیرانێ ژی پشته‌ڤانی ل ئه‌رمه‌نستانێ كریه و ئه‌و یه‌ك ژی بوویه جهێ دلگرانیا ئازه‌ربایجانێ لێ نها ره‌وش گه‌له‌ك ئالۆزتر لێ هاتیه، چونكو ده‌مه‌كه به‌رپرسێن ئیرانێ دیار دكه‌ن كو ئسرائیل ئاخا ئازه‌ربایجانێ بۆ تێكدانا ره‌وشا ناڤخوه‌یی یا ئیرانێ بكار دئینیت و گۆت: (گه‌له‌ك به‌رپرسێن ئیرانێ دبێژن كو به‌ری نها ئازه‌ربایجان پشكه‌ك ژ ئاخا ئیرانێ بوویه و دڤێت جاره‌كا دی ئازه‌ربایجان ڤه‌گه‌ریته ڤه سه‌ر ئیرانێ و ئه‌و یه‌ك ژی بوویه ئه‌گه‌رێ هندێ كو ئازه‌ربایجان ژی ب توندی نه‌رازیبوونا خوه ل هه‌مبه‌ر ئیرانێ دیار بكه‌ت، چه‌ند رۆژن ژی ئیرانێ ده‌ست ب مانوره‌كا سه‌ربازی ل سه‌ر سنورێ خوه یێ ل گه‌ل ئازه‌ربایجانێ كریه).
چاڤدێرێ سیاسی یێ رۆژهه‌لاتێ كوردستانێ ئه‌و یه‌ك ژی دیار كر كو چه‌ند سالن بزاڤا ئازه‌ریان ل ئیرانێ ژی ئه‌كتیڤ بوویه و ئه‌و داخوازا مافێن خوه دكه‌ن، ئاشكرایه كو ئازه‌ربایجان پشته‌ڤانیێ ل بزاڤا ئازه‌ریێن ئیرانێ دكه‌ت و ژ به‌ر هندێ ژی ئیرانێ به‌ری نها چه‌ند جاران هۆشداری دابوو ئازه‌ربایجانێ، ئانكۆ ب گشتی ئه‌ز دشێم بێژم نها په‌یوه‌ندیێن هه‌ر دو وه‌لاتان گه‌له‌ك خرابه و گۆت: (ئازه‌ربایجانێ به‌ری نها ژی چه‌ند جاران دیار كربوو كو دڤێت ئیران ده‌ستێوه‌ردانێ د كاروبارێن وان دا نه‌كه‌ت، چونكو به‌رپرسێن ئازه‌ربایجانێ دیار دكه‌ن ئیران بوویه ئه‌گه‌ر كو ره‌وشا گه‌له‌ك ژ وه‌لاتێن رۆژهه‌لاتا ناڤین ئالۆز ببیت).
دارا ناتق د به‌رده‌وامیا ئاخڤتنا خوه دا ئاماژه ب هندێ ژی كر كو به‌ری نها هه‌ر سێ وه‌لاتێن توركیا، ئازه‌ربایجان و پاكستانێ پێكڤه ده‌ست ب مانوره‌كا سه‌ربازی كربوون و ئه‌و یه‌ك ژی ببوو جهێ دلگرانیا ئیرانێ، نها ژی ئیرانێ ده‌ست ب مانوره‌كا سه‌ربازی ل سه‌ر سنورێ ئازه‌ربایجانێ كریه و د راستی دا ئیرانێ ژی دڤێت هێزا خوه یا سه‌ربازی نیشا ئازه‌ربایجانێ بده‌ت، ژ به‌ر هندێ ژی ره‌وشا نها گه‌له‌ك خرابه، توركیا ژی وه‌كو هه‌ڤپه‌یمانێ سه‌ره‌كی یێ ئازه‌ربایجانێ خوه بێده‌نگ كریه و گۆت: (چه‌ند مه‌هن ده‌وله‌تا ئازه‌ربایجانێ ئاسته‌نگیان ل هه‌مبه‌ر بزاڤا بازرگانی یا د ناڤبه‌را ئیرانێ و ئه‌رمه‌نستانێ دا دروست دكه‌ت، چه‌ندین جاران ئیرانێ هۆشداری ژی دابوو ئازه‌ربایجانێ لێ ئازه‌ربایجان ل سه‌ر هه‌لوه‌ستێ خوه به‌رده‌وام بوو).
چاڤدێرێ سیاسی د دووماهیا ئاخڤتنا خوه دا ئه‌و یه‌ك ژی دیار كر كو خالا هه‌ری زێده ئیران ژێ دترسیت په‌یوه‌ندیێن سه‌ربازی یێ ئازه‌ربایجانێ ل گه‌ل ئسرائیلێ نه، ئازه‌ربایجانێ د ماوه‌یێ چه‌ند سالێن بۆری دا چه‌ندین رێككه‌فتنێن سه‌ربازی ل گه‌ل ئسرائیلێ ئیمزا كرینه و چه‌كێن گران و پێشكه‌فتی ژ ئسرائیلێ كڕینه كو ئه‌و یه‌ك ژی بوویه ئه‌گه‌رێ دلگرانیا ئیرانێ، به‌ری نها ژی چه‌ندین جاران به‌رپرسێن سه‌ربازی یێن ئیرانێ هۆشداری دانه ئازه‌ربایجانێ كو رێ نه‌ده‌ت ئسرائیل ئاخا وان بۆ كریارێن تیرۆرستی د ناڤ ئاخا ئیرانێ دا بكار بینیت لێ ئازه‌ربایجانێ هه‌رده‌م ئه‌و یه‌ك ره‌ت كریه، ب كورتی نها په‌یوه‌ندیێن هه‌ر دو وه‌لاتان گه‌له‌ك ئالۆز بووینه.
