چاڤدێره‌كێ سیاسی: یا نها ل ئۆكرانیایێ روو دده‌ت ده‌ستپێكا شه‌ره‌كی جیهانی یه
دیدار، هۆشه‌نگ تاجر:
چاڤدێره‌كێ سیاسی دیار دكه‌ت كو یا نها ل ئۆكرانیایێ روو دده‌ت ده‌ستپێكا شه‌ره‌كی نوو یێ جیهانی یه، ئه‌مریكا و ناتۆ دترسن پشكداریێ د شه‌ری دا بكه‌ن چونكو رۆسیا گه‌فا بكارئینانا چه‌كێن ئه‌تۆمی دكه‌ت و ئۆرۆپیان ژی خیانه‌ت ل ئۆكرانیایێ كرن و ئه‌و ب تنێ هێلان.
چاڤدێره‌كێ سیاسی ل باكورێ كوردستانێ د دیداره‌كا تایبه‌ت دا بۆ ئه‌ڤرۆ دیار كر كو پۆتین هه‌رده‌م كار بۆ هندێ كریه كو جاره‌كا دی رۆسیا وه‌كو سه‌رده‌مێ سۆڤیه‌تێ یا بهێز بكه‌ڤیت، چونكو پشتی ژناڤچوونا ئێكه‌تیا سۆڤیه‌تێ ئه‌مریكا و وه‌لاتێن رۆژئاڤایی گه‌له‌ك سڤكاتی ب رۆسیا دكرن و رۆسیا وی ده‌می ژی چو پێگه‌ه نه‌بوو، ژ به‌ر هندێ پۆتین ده‌مێ هاته سه‌ر ده‌ستهه‌لاتێ هه‌ر زوو ده‌ست ب كارێ خوه كر و شیا د ماوه‌یێ چه‌ندین سالان دا جاره‌كا دی پێگه‌هێ رۆسیا بهێز بكه‌ت و گۆت: (بێگومان ل هه‌مبه‌ر رۆسیا ژی ئه‌مریكا و ناتۆ ده‌ست ب بزاڤه‌كا مه‌زن كربوون دا نه‌هێلن رۆسیا جاره‌كا دی بهێز بكه‌ڤیت، ئانكۆ ده‌مه‌كه ئالۆزی د ناڤبه‌را رۆسیا و ناتۆ دا هه‌نه و ناتۆ ب ته‌مامی رۆسیا دۆرپێچ كربوو، رۆسیا ژی ب ئێرشكرنا ل سه‌ر ئۆكرانیا خواست هه‌م دۆرپێچا هه‌ی بكشینیت و هه‌م ژی بۆ ئه‌مریكا و ناتۆ دیار بكه‌ت كو ئێدی رۆسیا وه‌كو جاران نینه و یا بهێزه و نه‌چار نینه هه‌موو تشتێن ئه‌مریكا و ناتۆ قه‌بوول بكه‌ت).
ئیبراهیم گوچلو ئه‌و یه‌ك ژی دیار كر كو یا نها ل ئۆكرانیایێ روو دده‌ت تنێ شه‌رێ د ناڤبه‌را رۆسیایێ و ئۆكرانیایێ دا نینه، به‌لكو شه‌رێ رۆسیا ل گه‌ل ناتۆ و ئه‌مریكا یه، رۆسیا دڤێت وه‌لاتێن كو به‌ری نها د ناڤ ئێكه‌تیا سۆڤیه‌تێ دا بوون جاره‌كا دی بكه‌ته ژێر كۆنترۆلا خوه و ل هه‌مبه‌ر دا ئه‌مریكا و ناتۆ ژی دخوازن رۆسیا دۆرپێچ بكه‌ن، ژ به‌ر هندێ ژی ئه‌ز دبێژم شه‌رێ نها تنێ شه‌رێ د ناڤبه‌را دو وه‌لاتان دا نینه و گۆت: (شه‌رێ نها ل ئۆكرانیایێ روو دده‌ت ئه‌ز دشێم بێژم كو ده‌ستپێكرنا شه‌ره‌كی نوو یێ جیهانی یه، هه‌كه پۆتین د شه‌ری دا سه‌ركه‌ڤیت یان ژی تووشی شكه‌ستنێ بهێت دێ قۆناغه‌كا نوو ل هه‌موو جیهانێ ده‌ستپێكه‌ت، چونكو رۆسیا هه‌تا نه‌گه‌هیته هنده‌ك ئارمانجێن خوه شه‌ری ناده‌ته راگرتن و ل ئالیێ دی ناتۆ ژی دخوازیت ب شه‌رێ نها رۆسیا لاواز ببیت).
ل دۆر هندێ كا بۆچی ئه‌مریكا و ئۆرۆپا پشته‌ڤانیا ئۆكرانیا ناكه‌ن ژی ناڤهاتی راگه‌هاند كو ئه‌مریكا دترسیت شه‌رێ جیهانی یێ سیێ ده‌ستپێ بكه‌ت و ئه‌و یه‌ك دێ كارتێكرنه‌كا خراب ل هه‌موو جیهانێ كه‌ت، ژ به‌ر هندێ ژی نها هاریكاریا ئۆكرانیایێ دكه‌ن و دخوازن شه‌ر ل ئۆكرانیایێ ده‌ربازی وه‌لاتێن دی یێن ئورۆپا نه‌بیت و گۆت: (سه‌باره‌ت ب هه‌لوه‌ستێ وه‌لاتێن ئێكه‌تیا ئۆرۆپا ژی ئه‌ز دشێم بێژم كو وه‌لاتێن ئۆرۆپی خیانه‌ت ل ئۆكرانیایێ كرن و ئه‌و ب تنێ هێلان، چونكو رۆسیا نها گه‌له‌ك بهێزه و پشتی جودابوونا بریتانیا ژ ئێكه‌تیا ئۆرۆپا پێگه‌هێ جاران یێ ئۆرۆپا نه‌مایه و ل هه‌مبه‌ر رۆسیا لاوازه، ژ به‌ر هندێ ژی وان نه‌ڤێت ب ره‌نگه‌كێ راسته‌وخوه شه‌رێ رۆسیا بكه‌ن، هه‌ر چاوا بیت ئۆرۆپیان خیانه‌ت ل ئۆكرانیایێ كرن و كرنه قوربانیا به‌رژه‌وه‌ندیێن خوه، لێ شه‌رێ نها مه‌ترسیا خوه بۆ هه‌موو ئۆرۆپا هه‌یه و نها وه‌لاتین ئێكه‌تیا ئۆرۆپا ل هه‌مبه‌ر مه‌ترسیا رۆسیا دخوازن پتر پێكڤه كار بكه‌ن).
