چاڤدێره‌ك: دڤێت كورد ل رۆژهه‌لاتێ كوردستانێ گه‌له‌ك هشیار بن
ئه‌ڤرۆ، هۆشه‌نگ تاجر:
چاڤدێره‌كێ سیاسی یێ رۆژهه‌لاتێ كوردستانێ دیار دكه‌ت كو خوه‌نیشادانێن ڤێجارێ ل باشورێ ئیرانێ و هنده‌ك ده‌ڤه‌رێن دی تایبه‌تمه‌ندیه‌كا خوه یا جودا هه‌یه و دڤێت كوردێن رۆژهه‌لاتێ كوردستانێ گه‌له‌ك هشیار بن و نه‌بنه قوربانی.
سه‌عید داوودی چاڤدێرێ سیاسی یێ رۆژهه‌لاتێ كوردستانێ بۆ ئه‌ڤرۆ دیار كر كو خوه‌نیشادانێن ل باشورێ ئیرانێ گه‌هشتنه هنده‌ك ده‌ڤه‌رێن دی ژی، ب تایبه‌تی ژی ل ته‌بریزێ وه‌لاتیان ده‌ست ب خوه‌نیشادانێن مه‌زن ل دژی سیسته‌مێ نها یێ ئیرانێ كرینه، ل چه‌ند باژێرێن رۆژهه‌لاتێ كوردستانێ ژی وه‌لاتیان ده‌ست ب خوه‌نیشادانان كرینه و ل گۆر زانیاریان هێزێن ئێمناهیێ ب هه‌موو ره‌نگه‌كێ بزاڤا هندێ دكه‌ن كو وه‌كو جارێن بۆری ڤێجارێ ژی خوه‌نیشادانان سه‌ركوت بكه‌ن و ژ به‌ر هندێ ژی هه‌تا نها پتر ژ ٣٠ خوه‌نیشاده‌ر ل ده‌ڤه‌رێن جودا جودا یێن ئیرانێ هاتینه كوشتن و گۆت: (ئاشكرایه هه‌تا كو ئه‌مریكا یان ژی وه‌لاتێن ئورۆپی پشته‌ڤانیێ ل خه‌لكێ ئیرانێ نه‌كه‌ن خوه‌نیشادان ناگه‌هنه چو ئه‌نجامه‌كێ، چونكو د چه‌ند سالێن بۆری دا ئه‌وه پێلا سیێ یا خوه‌نیشادانانه و مخابن مه دیت كو د خوه‌نیشادانێن چه‌ند سالێن بۆری دا ب سه‌دان وه‌لاتی بوونه قوربانی و پاشی ژی حوكمه‌تا ئیرانێ شیا خوه‌نیشادانان سه‌ركوت بكه‌ت).
ناڤهاتی ئه‌و یه‌ك ژی دیار كر كو رۆژهه‌لاتێ كوردستانێ تایبه‌تمه‌ندیه‌كا خوه یا جودا هه‌یه، هه‌موو ده‌مه‌كێ به‌رپرسێن ئیرانێ ژ هندێ دترسن كو كورد داخوازا جودابوونێ ژ ئیرانێ بكه‌ن، ژ به‌ر هندێ ژی هه‌ر ده‌مێ كو خوه‌نیشادان ل باژێرێن رۆژهه‌لاتێ كوردستانێ ده‌ستپێ بكه‌ن رژێما ئیرانێ ب توندترین شێوه هێرشی خه‌لكه‌ت دكه‌ت، ژ به‌ر هندێ ژی ئه‌ز دبێژم هێشتا زوویه كورد ده‌ست ب خوه‌نیشادانان بكه‌ن، باشتره كورد خوه نه‌كه‌نه قوربانی، به‌لكو دڤێت كورد خوه بۆ هه‌ر پێشهاته‌كێ ل ئیرانێ و رۆژهه‌لاتێ كوردستانێ به‌رهه‌ڤ بكه‌ن، چونكو ره‌وشا ناڤخوه‌یی یا ئیرانێ گه‌له‌ك هه‌ستیاره و به‌ری نها ژی چه‌ندین جاران چاڤدێرێن سیاسی دیار كربوون كو دێ خه‌لك ل دژی سیسته‌مێ نها یێ ئیرانێ ده‌ست ب خوه‌نیشادانان كه‌ن و گۆت: (راسته خوه‌نیشادان جارا ئێكێ به‌رێ حه‌فتیه‌كێ ل خوزستانێ ده‌ستپێكر و ئه‌گه‌رێ سه‌ره‌كی ژی نه‌بوونا ئاڤا ڤه‌خوارنێ یه، لێ بابه‌ت تنێ ئه‌و نینه، به‌لكو خه‌لكێ ئیرانێ ب گشتی ژ سیسته‌مێ نها رازی نینن و خه‌لك ل دژی سیسته‌می نه، د هه‌لبژارتنێن ڤێ دووماهیێ یێ سه‌رۆك كۆماریا ئیرانێ دا ژی پرانیا خه‌لكی پشكداری د هه‌لبژارتنان دا نه‌كرن، ئه‌و یه‌ك ژی نیشا دده‌ت كو خه‌لكی سیسته‌مێ نها نه‌ڤێت و ژ به‌ر هندێ ژی دهێته چاڤه‌رێكرن كو خوه‌نیشادان ل پرانیا باژێرێن ئیرانێ به‌لاڤ ببن، لێ وه‌كو من گۆتی ئه‌ز هێڤیدارم ده‌ڤه‌رێن كوردی جارێ ئارام بن دا باشتر دیار بیت كا دێ ره‌وش به‌ر ب كیڤه بچیت، چونكو هه‌تا نها گه‌له‌ك جاران كورد بووینه قوربانی و دڤێت ڤێجارێ كورد د هشیار بن).
چاڤدێرێ سیاسی یێ رۆژهه‌لاتێ كوردستانێ د دووماهیا ئاخڤتنا خوه دا ئه‌و یه‌ك ژی نه‌ڤه‌شارت كو ئازه‌ریێن ئیرانێ ب پشته‌ڤانیا توركیا د چه‌ندین خوه‌نیشادانێن بۆری دا درووشم ل دژی كوردان بلند كرن و ئه‌و یه‌ك ژی مه‌ترسیه‌كا خوه یا مه‌زن بۆ كوردان هه‌یه، ژ به‌ر هندێ ژی دڤێت كورد خوه بۆ هه‌ر پێشهاته‌كێ ل ئیرانێ و رۆژهه‌لاتێ كوردستانێ به‌رهه‌ڤ بكه‌ن، باشتره جارێ خوه‌نیشادان ل ده‌ڤه‌رێن كوردی نه‌هێنه كرن، چونكو جارێ دیار نینه كا دێ خونیشادان چ لێ هێن، پشته‌ڤانیا ده‌رڤه بۆ خوه‌نیشاده‌ران نینه و ئیران دشێت وان سه‌ركوت بكه‌ت.
