چاڤدێره‌ك: دێ گوهۆڕینێن مه‌زن ل ئیرانێ روو ده‌ن
ئه‌ڤرۆ:
چاڤدێره‌كێ سیاسی یێ رۆژهه‌لاتێ كوردستانێ دیار دكه‌ت كو ئالۆزیێن نها ل ئیرانێ و رۆژهه‌لاتێ كوردستانێ ب دووماهی نه‌هاتینه و نها خه‌لك خوه بۆ خوه‌نیشادانێن نوو به‌رهه‌ڤ دكه‌ن، ره‌وشا ئیرانێ گه‌له‌ك ئالۆزه و چاڤه‌رێی گوهۆرینێن مه‌زن ل ئیرانێ دكه‌م.
ئه‌حمه‌د نه‌ژادی چاڤدێرێ سیاسی یێ رۆژهه‌لاتێ كوردستانێ بۆ ئه‌ڤرۆ دیار كر كو نها ره‌وشا ئیرانێ و رۆژهه‌لاتێ كوردستانێ گه‌له‌ك خرابه، هێزێن ئیرانێ ل پڕانیا باژێرێن رۆژهه‌لاتێ كوردستانێ بجه بووینه و ژیان ل باژێرێن وه‌كو مهاباد، سنه، كرمانشان، بۆكان و جوانرۆ ئاسایی نینه و هێزێن ئێمناهیێ رۆژانه وه‌لاتیان ده‌سته‌سه‌ر دكه‌ن، د ناڤ سێ رۆژێن بۆری دا هه‌ری كێم ٥ وه‌لاتیێن كورد د زیندانێن ئیرانێ دا ل ژێر ئه‌شكه‌نجه‌دانێ جانێ خوه ژ ده‌ست داینه و خه‌لك ژ ده‌ستهه‌لاتا نها گه‌له‌ك تووره نه و گۆت: (به‌ری چه‌ند رۆژان وه‌زیرێ ناڤخوه یێ ئیرانێ راگه‌هاند كو ره‌وشا ئیرانێ ئارامه و خوه‌نیشادان ژی نه‌ماینه، چو راستی بۆ هندێ نینن، خوه‌نیشادان ره‌نگه نها وه‌كو مه‌هه‌ك به‌ری نها نینن لێ دیسان ژی خوه‌نیشادان هه‌نه، ده‌وله‌تا ئیرانێ هێلا ئینتێرنێتێ بڕیه دا كه‌س نه‌زانیت كا ل ئیرانێ چ روو دده‌ت، لێ براستی ژی ره‌وشا ئیرانێ ب تایبه‌تی ژی یا رۆژهه‌لاتێ كوردستانێ و به‌لوچستانێ گه‌له‌ك خرابه).
ناڤهاتی ئه‌و یه‌ك ژی دیار كر كر كو هه‌لوه‌ستێ كه‌سایه‌تیێن ناڤدارێن جیهانێ و ئه‌و پشته‌ڤانیا ل ده‌رڤه بۆ خه‌لكێ ئیرانێ هه‌یه وه‌سا كریه كو خوه‌نیشادانێن ڤێجارێ وه‌كو یێن به‌ری چه‌ند سالان نه‌بن، چونكی به‌ری نها ژی خوه‌نیشادان ل ئیرانێ هاتنه كرن لێ پشتی ده‌مه‌كێ ب دووماهی هاتن، لێ خوه‌نیشادانێن ڤێجارێ پتر ژ سێ مه‌هانه به‌رده‌وامن و د ده‌مێ ٤٣ سالێن بۆری دا خوه‌نیشادانێن وه‌سا ل ئیرانێ نه‌هاتینه كرن و ده‌ستهه‌لاتا نها ژی چو ده‌مه‌كێ وه‌سا ته‌نگاڤ نه‌بوویه.
چاڤدێرێ سیاسی یێ رۆژهه‌لاتێ كوردستانێ د دووماهیا ئاخڤتنا خوه دا ئه‌و یه‌ك ژی نه‌ڤه‌شارت كو ئه‌و پێشبینیا گوهۆرینێن مه‌زن ل ئیرانێ دكه‌ت، چونكی باوه‌ریا خه‌لكی ب ده‌ستهه‌لاتێ نه‌مایه، ره‌وشا ئابووری یا ئیرانێ رۆژ ب رۆژی خرابتر لێ دهێت، بێكاری گه‌له‌ك زێده بوویه، ده‌ستهه‌لاتێ ژی چو پرۆژه بۆ چاره‌سه‌ركرنا ئاریشێن نها ل ئیرانێ نینن، ژ به‌ر هندێ ژی خه‌لك ژ ده‌ستهه‌لاتێ گه‌له‌ك تووره نه، هه‌كه ئه‌ڤساله نه‌بیت ژی سالا بهێت دێ هه‌ر هنده‌ك گوهۆرینێن مه‌زن ل ئیرانێ روو ده‌ن، چونكی پشتی خوه‌نیشادانێن ڤێ دووماهیێ ئێدی قۆناغه‌كا نوو ل ئیرانێ ده‌ستپێكریه و ئیران كه‌فتیه د قۆناغه‌كا جودا دا، ژ به‌ر هندێ ژی ب زۆرێ و سێداره‌دانان ئێدی ده‌ستهه‌لاتا نها نه‌شێت ژیێ خوه درێژ كه‌ت و گۆت: (خوه‌نیشاده‌ر ژی داخوازا نه‌مانا ده‌ستهه‌لاتا نها دكه‌ن، ب هزاران كه‌س ل زیندانان دانه، هونه‌رمه‌ند و كه‌سایه‌تیێن ناڤدار یێن ئیرانی به‌رده‌وام پشته‌ڤانیا خوه بۆ خوه‌نیشاده‌ران و خه‌لكێ نه‌رازی دیار دكه‌ن، ژ به‌ر هندێ ژی ئه‌ز دبێژم دێ گوهۆرینێن مه‌زن ل ئیرانێ روو ده‌ن).
