چاڤدێره‌ك: ره‌ئیسی دڤێت خوه نێزیكی كوردان بكه‌ت
ئه‌ڤرۆ، هۆشه‌نگ تاجر:
چاڤدێره‌كێ سیاسی یێ رۆژهه‌لاتێ كوردستانێ راگه‌هاند كو ئیبراهیم ره‌ئیسی سه‌ركه‌فتیێ هه‌لبژارتنێن سه‌رۆك كۆماریێ ل ئیرانێ ب رێیا نوونه‌رێ خوه یێ تایبه‌ت داخواز ژ ئه‌ندامێن په‌رله‌مانێ ئیرانێ یێن كورد و ره‌وشه‌نبیرێن كوردی ژی كریه كو داخوازێن خوه ب رێیا نامه‌كا فه‌رمی ئاراسته‌ی وی بكه‌ن.
حه‌سه‌ن ئیبراهیمی چاڤدێرێ سیاسی یێ رۆژهه‌لاتێ كوردستانێ راگه‌هاند كو كوردێن رۆژهه‌لاتێ كوردستانێ ژ هه‌لبژارتنا ئیبراهیم ره‌ئیسی وه‌كو سه‌رۆك كۆمارێ ئیرانێ گه‌له‌ك دلگرانن، چونكو ئه‌و باش دزانن ئیبراهیم ره‌ئیسی چو به‌رنامه بۆ كوردان نابیت و دێ ره‌وشا هه‌ی ل رۆژهه‌لاتێ كوردستانێ خرابتر لێ هێت و گۆت: (ره‌ئیسی دڤێت رێگریێ ل ده‌نگێن نه‌رازیبوونێ د ناڤ ئیرانێ دا بگریت و بێگومان ژ بۆ هندێ ژی كار ل سه‌ر ده‌ڤه‌رێن كوردی هێته كرن، چونكو ب سالانه ده‌ستهه‌لاتا ئیرانێ زۆرداریێ ل كوردان دكه‌ت، حه‌سه‌ن رۆحانی سه‌رۆك كۆمارێ ئیرانێ د ماوه‌یێ هه‌شت سالێن سه‌رۆك كۆماریا خوه دا چو بۆ كوردان نه‌كر، رۆحانی گه‌له‌ك سۆز دانه كوردان لێ بجه نه‌ئینا و نها ژی ره‌ئیسی دڤێت ب ره‌نگه‌كێ جودا سه‌ره‌ده‌ریێ ل گه‌ل كوردان بكه‌ت، ره‌ئیسی چو به‌رنامه بۆ كوردان نینن و ئارمانجا سه‌ره‌كی یا ره‌ئیسی ئه‌وه دا رێگریێ ل ده‌نگێن نه‌رازیبوونێ بگریت).
چاڤدێرێ سیاسی یێ رۆژهه‌لاتێ كوردستانێ ئه‌و یه‌ك ژی دیار كر كو ل ئیرانێ سیسته‌مه‌ك گه‌له‌ك جودا هاتیه ئاڤا كرن، چونكو سیسته‌مێ ل ئیرانێ ل سه‌ر بنه‌مایێ دژبه‌ریا مافێن گه‌لێ كورد و نه‌ته‌وێن دی هاتیه ئاڤا كرن، ژ به‌ر هندێ ژی هه‌تا سیسته‌مێ سیاسی یێ ئیرانێ نه‌هێته گوهۆرین كورد و نه‌ته‌وێن دی یێن ل ئیرانێ ناگه‌هنه مافێن خوه، رۆژانه ده‌ستهه‌لاتا ئیرانێ لاوێن كورد ل سێداره دده‌ت و ناهێلیت لاوێن كورد بۆ خوه كار ژی بكه‌ن، ب به‌هانێن جودا جودا رۆژانه لاوێن كورد یێن كو بۆ دابینكرنا ژیانا خوه كار دكه‌ن ژ ئالیێ هێزێن ئیرانێ ڤه دهێنه كوشتن، د ده‌مه‌كێ وه‌سا دا نه ره‌ئیسی و نه ژی چو كه‌سه‌كێ دی نه‌شێت پرسا كوردی ل ئیرانێ چاره‌سه‌ر بكه‌ت، كورد ژ ره‌ئیسی و سیسته‌مێ نها یێ ئیرانێ بێ هێڤی نه و هه‌تا رژێما نها یا ئیرانێ ل سه‌ر كار بیت بێگومان دێ زولم و زۆرداریا ل سه‌ر كوردان ژی هه‌ر یا به‌رده‌وام بیت.
چاڤدێرێ سیاسی یێ رۆژهه‌لاتێ كوردستانێ ئه‌و یه‌ك ژی نه‌ڤه‌شارت كو د هه‌لبژارتنێن سه‌رۆك كۆماریا ئیرانێ دا پرانیا كوردان پشكداری د هه‌لبژارتنان دا نه‌كرن، ئانكۆ كوردان هه‌لبژارتن بایكۆت كرن و ئه‌و یه‌ك ژی نیشا دده‌ت كو باوه‌ریا كوردان ب سۆزێن رۆحانی، ره‌ئیسی و كه‌سێن وه‌كو وان نه‌ماینه، كورد باش دزانن هه‌ر كه‌سه‌ك ببیته سه‌رۆك كۆمار دێ هنده‌ك سۆزدان ده‌ته كوردان لێ چو ده‌مه‌كێ سۆزێن خوه بجه نائینن، چونكو ئارمانجا هه‌موو سه‌رۆك كۆمارێ ئیرانێ تنێ ئه‌و بوویه دا بشێن ماوه‌یێ ده‌ستهه‌لاتا خوه درێژ بكه‌ن و به‌رژه‌وه‌ندیێن خوه ب پارێزن و گۆت: (د راستی دا هه‌تا نها نه رۆحانی و نه ژی یێن به‌ری وی چو بۆ كوردان نه‌كرینه، ده‌ڤه‌رێن كوردی ده‌ڤه‌رێن هه‌ری هه‌ژار یێن ئیرانێ نه، بۆدجێن ده‌ڤه‌رێن كوردی هه‌موو بۆ پارێزگه‌هێن دی یێن ئیرانێ دهێنه مه‌زاختن و رێژا هه‌ژاری و بێكاریێ ل رۆژهه‌لاتێ كوردستانێ گه‌له‌ك زێده بوویه، گه‌نج ژ به‌ر هندێ نه‌چار دمینن كو به‌رێ خوه بده‌نه ئورۆپا، چونكو براستی ژی سیسته‌مێ نها یێ ئیرانێ چو ژیانه‌ك بۆ كوردان نه‌هێلایه).
