چاڤدێره‌ك: رۆسیا دڤێت ب سالان ل سووریێ بمینیت
ئه‌ڤرۆ، هۆشه‌نگ تاجر:
چاڤدێره‌كێ سیاسی یێ رۆژئاڤایێ كوردستانێ راگه‌هاند كو رۆسیا داخواز ژ توركیا كریه كو هه‌موو هێزێن خوه ژ سووریێ ڤه‌كێشیت و ل ئالیێ دی رۆسیا دڤێت ئه‌مریكا ژی هێزێن خوه ڤه‌كێشیت، چونكو رۆسیا دڤێت ب سالان ل سووریێ بمینیت.
نه‌شه‌ت محه‌مه‌د چاڤدێرێ سیاسی یێ رۆژئاڤایێ كوردستانێ بۆ ئه‌ڤرۆ دیار كر كو ده‌زگه‌هێن راگه‌هاندنا رۆسیا ئاماژه ب خالێن ناكۆك یێن د ناڤبه‌را توركیا و رۆسیا دا دكه‌ن و ل گۆر ده‌زگه‌هێن راگه‌هاندنا رۆسیا د كۆمبوونا دووماهیێ یا د ناڤبه‌را پوتین و ئه‌ردۆغانی دا رۆسیا ب ره‌نگه‌كێ ئاشكرا داخواز ژ توركیا كریه كو هه‌موو هێزێن خوه ژ ئاخا سووریێ ڤه‌كێشیت و گۆت: (رۆسیا دڤێت هه‌موو هێزێن بیانی ژ ئاخا سووریێ ده‌ركه‌ڤن، چونكو رۆسیا بخوه ئاماده‌كاریێن مه‌زن كرینه كو ب سالان ل سووریێ بمینیت، چونكو رۆسیا نه‌ڤێت توركیا و ئیران ل سووریێ چو بنگه‌هێن خوه یێن سه‌ربازی هه‌بن، رۆسیا دڤێت پشته‌ڤانیێ ل حوكمه‌تا به‌شاری بكه‌ت دا شام بشێت جاره‌كا دی كۆنترۆلا هه‌موو ئاخا سووریێ بكه‌ت، ژ به‌ر هندێ ژی نها رۆسیا فشارێن خوه ل سه‌ر توركیا زێده كریه دا هێزێن خوه ژ سووریێ ڤه‌كێشیت).
چاڤدێرێ سیاسی ئه‌و یه‌ك ژی دیار كر كو رۆسیا پشته‌ڤانیێ ل چاره‌سه‌ركرنا پرسا كوردی ل سووریێ دكه‌ت، چونكو به‌ری نها شانده‌ك ژ رێڤه‌به‌ریا خوه‌سه‌ر یا باكورێ سووریێ سه‌ره‌دانا رۆسیا كربوون و د سه‌ره‌دانا شاندێ كوردی دا وه‌زاره‌تا ده‌رڤه یا رۆسیا ب فه‌رمی پشته‌ڤانیا خوه بۆ چاره‌سه‌ركرنا پرسا كوردی دیار كربوو و هه‌روه‌سا رۆسیا دیار كربوو كو ئه‌و دشێن دانپێدانێ ب رێڤه‌به‌ریا خوه‌سه‌ر ژی بكه‌ن لێ دڤێت كورد خوه ژ ئه‌مریكا دوور بكه‌ن و گۆت: (هه‌بوونا هێزێن ئه‌مریكا و توركیا ل سووریێ ل هه‌مبه‌ر ستراتیژیا رۆسیا بۆ سووریێ و رۆژهه‌لاتا ناڤین بوویه ئاسته‌نگیه‌كا مه‌زن، ل ئالیێ دی ئێدی رۆسیا ژی ژ بۆ بابه‌تێ سووریێ پێدڤی ب رۆلێ توركیا نینه، به‌ری نها رۆسیا دخواست كو ب رێیا توركیا كۆنترۆلێ ل سه‌ر گرۆپێن چه‌كدار ل سووریێ بكه‌ت لێ نها بۆ رۆسیا ئاشكرا بوویه كو توركیا وان گرۆپان بۆ به‌رژه‌وه‌ندیێن خوه بكار دئینیت و پشته‌ڤانیێ ل وان دكه‌ت، ژ به‌ر هندێ ژی رۆسیا ده‌مه‌كه هێرشی گرۆپێن چه‌كدارێن سه‌ر ب توركیا دكه‌ت).
ناڤهاتی ئه‌و یه‌ك ژی دیار كر كو ناكۆكیێن د ناڤبه‌را توركیا و رۆسیا دا رۆژ ب رۆژێ زێده‌تر لێ هاتینه، چونكو به‌ری نها ده‌زگه‌هێن راگه‌هاندنا توركیا دیار كربوون كو ئه‌و ل گه‌ل سووریێ كۆمبووینه و وان دڤێت پرسا سووریێ بهێته چاره‌سه‌ركرن لێ هه‌ر زوو وه‌زاره‌تا ده‌رڤه یا سووریێ ئه‌و یه‌ك ره‌ت كر و راگه‌هاند كو ئه‌و چو دانوستاندنان ل گه‌ل توركیا ناكه‌ن، چونكو توركیا هێزه‌كا داگیركه‌ره و دڤێت هه‌موو هێزێن خوه ژ ئاخا سووریێ ڤه‌كێشیت و پشته‌ڤانیێ ل گرۆپێن تیرۆرستی ژی نه‌كه‌ت.
ئه‌و یه‌ك د ده‌مه‌كێ دایه كو چه‌ند رۆژن بسپۆرێن كاروبارێن سیاسی یێن تورك دیار دكه‌ن كو پێگه‌هێ توركیا هه‌م ل سووریێ و هه‌م ژی ل لیبیا گه‌له‌ك لاواز بوویه و ئێدی رۆسیا ژی وه‌كو جاران گرنگیێ ناده‌ته رۆلێ توركیا، چونكو رۆسیا ژ پشته‌ڤانیا توركیا یا بۆ گرۆپێن چه‌كدار ل سووریێ گه‌له‌ك تووره یه و به‌ری چه‌ند رۆژان ژی وه‌زیرێ ده‌رڤه یێ رۆسیا راگه‌هاند كو دڤێت توركیا هه‌موو هێزێن خوه ژ ئاخا سووریێ ڤه‌كێشیت و ئێدی پشته‌ڤانیێ ل گرۆپێن تیرۆرستی ژی نه‌كه‌ت.
