چاڤدێرەکێ سیاسی: رێککەفتنا ئیرانێ و سعوودیێ بەرهەمێ سیاسەتا چینێ یە
ئەڤرۆ
هۆشەنگ تاجر:
چاڤدێرەکێ سیاسی دیار دکەت چینێ دڤێت رۆلەکێ سەرەکی ل رۆژهەلاتا ناڤین بگێڕیت و پێگەهێ ئەمریکا ژی لاواز بکەت، ب ناڤبژیڤانیا چینێ هەر دو وەلاتێن ئیرانێ و سعوودیێ بریار داینە ئاریشێن د ناڤبەرا خۆ دا چارەسەر بکەن، ئەو یەک دێ بیتە ئەگەرێ گوهۆڕینا هەڤسەنگیێن سیاسی ل رۆژهەلاتا ناڤین.
مەسعود حەمیدی چاڤدێرێ سیاسی راگەهاند، بەری نها سەرۆکێ چینێ سەرەدانا سعوودیێ کر بوو و گرێبەستێن مەزن د ناڤبەرا هەر دو وەلاتان دا هاتنە ئیمزا کرن، چینێ دڤێت ئێدی ل رۆژهەلاتا ناڤین پێگەهێ خۆ بهێز بکەت و ببیتە هێزا سەرەکی، ئەو یەک ژی رامانا هندێ ددەت دێ چین هەڤڕکیەکا گەلەک مەزن ل گەل ئەمریکا کەت، ئانکۆ ب کورتی چینێ دڤێت ئەو خالێن ئەمریکا مفای ژێ وەردگریت وان نەهێلیت و گۆت: (ئاشکرایە ب سالانە ئەمریکا مفای ژ ناکۆکیێن د ناڤبەرا ئیرانێ و وەلاتێن عەرەبی ب تایبەتی ژی سعوودیێ دا وەردگریت، ژ بەر وان ناکۆکیان ژی ب سالانە ئەمریکا چەکی دفرۆشیتە سعوودیێ و وەلاتێن دی یێن عەرەبی، نها چینێ دڤێت وان تشتان نەهێلیت، چونکی دەمێ چین کارەکێ وەسا بکەت ئەو یەک دێ بیتە ئەگەرێ لاوازبوونا پێگەهێ ئەمریکا ل رۆژهەلاتا ناڤین).
ناڤهاتی د پشکەکا دی یا ئاخڤتنا خۆ دا ئەو یەک ژی دیار کر، نها ناکۆکیێن چینێ و ئەمریکا گەلەک زێدە بووینە، بەری نها بەرپرسێن ئەمریکا چەندین جاران گەف ل چینێ کرن، ل ئالیێ دی پێگەهێ ئابووری یێ چینێ ژی رۆژ ب رۆژێ بهێزتر لێ دهێت و مرۆڤ دشێت بێژیت چین ئێدی ب رەنگەکێ جدی هەڤڕکیا ئەمریکا دکەت، رێککەفتنا ئیرانێ ل گەل سعوودیێ ژی بەرهەمێ سیاسەتا چینێ یە، ئەو یەک دێ بیتە ئەگەرێ گوهۆرینێن گەلەک مەزن ل دەڤەرێ و گۆت: (ئەز وەسا دبینم دێ قۆناغەکا نوی ل دەڤەرێ دەستپێکەت، هەر ژ نها دڤێت هەموو هێزێن ل دەڤەرێ خۆ بۆ گوهۆرینێن مەزن بەرهەڤ بکەن، ئەو یەک دێ کاریگەریا خۆ ل ئیراقێ و هەرێما کوردستانێ ژی کەت، چونکی ئاشکرایە هەر گوهۆڕینەک ل دەڤەرێ روی بدەت دێ کاریگەریا خۆ ل کوردان کەت، هەکە کوردان بڤێت ببنە هێزەکا کاریگەر دڤێت هەر ژ نها خۆ بەرهەڤ بکەن).
چاڤدێرێ سیاسی د دویماهیا ئاخڤتنا خۆ دا ئەو یەک ژی نەڤەشارت، بهێزبوونا چینێ دێ کاریگەریەکا خراب ل وەلاتێن هەڤپەیمانێن ئەمریکا ژی کەت، لێ دشێت مفایێن خۆ ژی بۆ وان وەلاتان هەبن، چونکی دەمێ هەڤڕکی توندتر ببن وی دەمی ئەمریکا دێ یا نەچار بیت پتر گرنگیێ بدەتە وەلاتێن هەڤپەیمانێن خۆ، ژ بەر هندێ ژی دڤێت ئەم چاڤەرێی گوهۆرینێن مەزن بین ل رۆژهەلاتا ناڤین، چونکی رێککەفتنا سعوودیێ و ئیرانێ تشتەک وەسا بچویک نینە، هەر دو ژی وەلاتێن گەلەک بهێزن ل دەڤەرێ.
