چاڤەڕێی نیشادانا روویەكێ جوان یێ وەرزشا بەهدینانین
شاهۆ فەرید:
د داخویانیەكێ دا شرۆڤەكارێ وەرزشی یێ پارێزگەها دهۆكێ وەحید رەشید بۆ رۆژنامەیا ئەڤرۆ دیار كر یارییا دهۆك و زاخۆ ژ خولا ستێرێن ئیراقێ تایبەتمەندیا خوە هەیە ژبلی دبیتە دێربیەكێ براینیێ ئەم هەموو چاڤەڕێ یارییەكا ب هێزین و دیدارەكا بەهدینان یا جوان بیت.
زێدەتر ناڤهاتی گۆت: ڤێ یاریێ گرنگییا خوە هەیە و ئەنجامێ وێ دێ كارتیكرنا خوە ل سەر رێزبەندیێ هەبیت، زاخۆ ل سەرێ لیستێ دهێت و دڤێت پارێزیت، دهۆك ئەوا د كۆپا كەنداڤی دا گەهشتییە یارییا دووماهیێ دێ ب سەقایێ سەركەفتنێ و پشتگەرمییا جەماوەرێ خوە هێتە دناڤ یاریگەهێ دا، هەرچەندە پێشبنییا ئەنجامان ب زەحمەتە، دبیت دهۆكێ زێدەتر دەلیڤەیا سەركەفتنێ هەبیت.
ژلایەكێ دووڤە وەحید رەشید گۆت: بۆ مە گرنگ یارییەكا جوان و براینی ب ئاست بلند بینن، بهیڤینە هەردو یانە هەتا دووماهییا خولێ هەڤڕكێن رێزێن پێشیێ و شەڕی بۆ ناسناڤی بكەن، ژلایێ تەكتیكی و هونەری ڤە سەردەری دڤێت یا هەستیار و هشیاری بیت ژلایێ هەردو یانەیانڤە چۆنكو دێ چاڤێ خەلكەكێ دەرڤەژی ل یاریێ بیت، هەر شاشیەكا بكەن كەسانێن دەرڤەیی هەردو یانەیان بخوە ب دەلیڤە دبینن بۆ كێمكرنا سەنگا هەردو یانەیان، ژبلی ئەنجامی چاڤەڕێ نیشاندانا روویەكێ جوان یێ وەرزشا بەهدینانین.
هەروەسان ناڤهاتی گۆت: داخوازێ ژ كارگێرێن هەردو یانەیا دكەم ل سەر هێلێ بن بۆ نەهێلانا ئەڤان لێكدانێن جەماوەری، ئەو تشتێ پێشتر چێبوویی دووبارە نەبنڤە، ئەو پرۆتوكولا دناڤبەرا هەردو یانەیان هاتیەكرن نەچوونا جەماوەری بۆ ناڤا یاریگەهێن هەڤدو بۆ كێمكرنا ئاریشەیان و دێ هێمنی یاریی برێڤەچیت، باوەرناكەم هیچ تیمەك یاریێ بۆ تیما هەڤڕك بەردەت، ئەڤ یاریە بۆ هەردو یانەیان گرنگە.
