چایخانا شەعب بوویە جھێ خرڤەبوونا ئەدیب و ھەلبەستڤان نڤیسەرێن سلێمانیێ
ئەڤرۆ نیوز، زنار تۆڤی:
چایخانا شەعب ئێکە ژ چایخانێن دێرین و ناڤدار ل پارێزگەھا سلێمانیێ و رۆژانە ئەدیب و نڤیسەر و رەوشەنبیرێن ڤی باژێری و ھەروەسا خەلکێ بیانی ژی قەستا ڤێ چایخانێ دکەن، دیسان ژی وێنێن پرانیا سەرکردە و ئەدیب و نڤیسەرێن کورد ل وێ چایخانێ ھاتینە ھەلاویستن و نوکە وەکو مۆزەخانەکێ لێھاتیە.
جەلال حەمە شەریف خودانێ چایخانا شەعب ل سلێمانیێ، د دیدارەکێ دا بۆ ئەڤرۆ نیوز دیار کر: بەری سالێن پێنجیان ل سەدێ بوری ئەڤ چایخانە ل سلێمانیێ ھاتیە ڤەکرن، کو ل وی دەمی بابێ وی ئەڤ چایخانە برێڤە دبر، نوکە ئەو پێنج برانە و ھەموو پێکڤە سەرپەرشتیا کارێ وێ چایخانێ دکەن، ھەروەسا نوکە ھژمارەکا مەزن یا وێنێن رە سپی و ماقوول و ئەدیب نڤیسەر و ھەلبەستڤانێن سلێمانیێ و کوردستانێ و دیسان وێنێن سەرکردێن کورد ل ھەموو پارچێن کوردستانێ ل ڤێ چایخانێ ھاتینە ھەلاویستن، مێژویا ھندەک وێنان ڤەدگەریت بو بەری سەد سالان.
ناڤھاتی ئەو ژی گۆت: ئەو کەسێن سەرەدانا ڤێ چایخانێ دکەن، ھەلبەستڤان و نڤیسەر و کەساتیێن سیاسی یێن سلێمانیێ نە، ھەروەسا خەلکێ بیانی و گەشتیار ژی گەلەک سەرەدانا چایخانا شەعب دکەن و نوکە ئەڤ چایخانە بویە پشکەکا گرنگ ژ مێژوویا باژێرێ سلێمانیێ، ھەروەسا خەلک و گەشتیار بۆ دیتنا ئەڤان وێنێن ھەلاویستی قەستا ڤێ چایخانێ دکەن و دەمێن خۆش دناڤا ڤێ چایخانێ دا دبورینن و نوکە ئەڤ چایخان وەکو مۆزەخانەکێ لێھاتیە.
