چایچى و به‌فرا سۆر!
ل پێشیێ رێزگرتن بۆ هه‌موو چایچى و كرێكار و خوهڤه‌مالێن وه‌لاتێ من كو مه‌ره‌ما من ژ ڤێ نڤیسارێ ئه‌و نینه بهایێ وان كێم بكم، دبت مه‌ره‌ما من پهتر پێ ئه‌وه كو دیار بكم هه‌رده‌م ته‌خێن بنده‌ستێن جڤاكینه، ده‌ربرینێ راسته‌قینه ژ واقعێ هه‌یى دكن، ژ به‌ر كو بهتر ئه‌و ئێشوئازاران دبینن و قوربانییان ده‌ن و خودان سه‌ربۆرێن سه‌خت و دژوارن.. ژ ئالییه‌كێ دن، رۆژه‌ڤا نها یا كوردستانێ وه‌ها كارتێكرنا خوه كرییه كو پرانیا خه‌لكێ مه شۆپاندنا ره‌وشا شێلیا نها بكن و هه‌ر ئێك وه‌ك خوه ببت سیاسه‌تڤان و هزر و بۆچۆنێن خوه دیار بكن. واته گرنگه رێز ل ڤان جۆره دیتن و بۆچۆنان بهێت گرتن.
فه‌رمانبه‌ره‌كى وه‌سا بۆ من ڤه‌گێڕا كو ئه‌وى داخواز ژ چایچیێ ده‌زگه‌هێ خوه كر كو چایه‌كێ بۆ وى بینت. چایچى ب هه‌ر ئه‌گه‌ره‌كى هه‌یى داخوازیا وى پشتگوهكر… پاشى وى فه‌رمانبه‌رى دوباره داخواز ژێ كر. چایچى كره تڕانه و وه‌ها به‌رسڤا وى دا كو ئه‌وى هزر كر دێ ئه‌و ژى خوه گرت هه‌تا پشتى 25 ئه‌یلۆلێ، كانێ دێ چ ل دنیایێ هێت، پاشى ئه‌و دێ چایێ وه‌ك به‌رێ بۆ هه‌موویان ئینت!
مه‌ره‌ما من ل ڤێره ئه‌وه كو هه‌مى تشت ل هه‌رێما كوردستانێ ب ره‌وشێن سیاسى و ئابوورى و له‌شكری ڤه گرێداینه. د بیست و شه‌ش سالێن ده‌ربازبوویى دا، مه دیتیه كو هه‌ر ئالیه‌كى ژ ئالیێن سه‌رى مه دیار كرین كێماسیه‌ك كه‌ڤتبتێ واته له‌نگى دكه‌ڤته ته‌ڤ بیاڤێن ژیانێ و هزر شێلى دبن مه‌ژى ره‌شبین و مژوول دبن و هه‌ر ئێك ل دووڤ وێ ره‌شبینیێ ل بنێ به‌ڕیێ ته‌ماشه دكت و پرته‌ك عه‌ڤرى ژى دكه‌ته هۆره‌بایه‌ك به‌فرا سۆر به‌رى سه‌د سالان ل كوردستانێ باراندى.
ئه‌ڤ چاڤه‌رێبوون و مژوولكرن و ره‌شبینیه مرۆڤێ كورد به‌ره‌ڤ كه‌سۆكیه‌كا هه‌رفتى و باوه‌رى ب خوه نه‌یى بریه و ژناڤدایا وى هێدى هێدى دقه‌ورت، بێى كو وى ئاگه‌ه ژ خوه هه‌بت، پرانیا پرنسیپ و به‌هانه‌یێن خوه ژ ده‌ست دده‌ت؛ مینا كه‌سێ مارى گه‌زتى ئێدى ژ قه‌توه‌ریسان ژى دترست و ئیراده و شیانێن وى دكه‌ڤنه د گومانێ دا كو ئێدى ئه‌و بشێت خوه ل به‌ر خه‌ته‌ر و ئاتافێن نه‌چاڤه‌رێكرى بگرت و ئارمانجێن هنده سالن ژ ده‌ستداین ب ده‌ستڤه بینت.
راسته كرێكاره‌ك یان فه‌رمانبه‌ره‌ك نه‌خودان هشیاریه‌ك ره‌وشه‌نبیریا كاریگه‌ر و بلنده كو ره‌وشێ ب شێوه‌یه‌ك زانستى شرۆڤه بكت، لێ بلا ژ بیر نه‌كین كو هه‌ر مه‌دیایه‌كا پیشه‌یى و بێلایه‌ن، به‌رى بۆچۆنا هه‌ر به‌رپرسه‌كى وه‌ربگرت، دیتن و بۆچوونێن ته‌خێن بنى یێن جڤاكى وه‌ردگرن و به‌ره‌ڤ سه‌رى دچن. هه‌ر وه‌سا تێكستێن و ئه‌ده‌بێ نه‌مه‌ر و خه‌لاتێن بلندێن جیهانى وه‌ردگرن، قاره‌مان و كاره‌كته‌رێن وانێن سه‌ره‌كى، كه‌سانێن پشتگوهخستى و بنبێژنگێن جڤاكینه.
هه‌ر ده‌ستهه‌لاته‌كێ بڤێت راستیێ وه‌ربگرت دا كو كورسیا خوه بپارێزت، فه‌ره هزر و دیتنێن ته‌خێن بنى و په‌روازیكرى وه‌ربگرن و ل سه‌ر دیتنا ئاقلدار و شیره‌تكارێن خوه بچێترین، ژ به‌ر كو پرانیا ئاقلدار و شیره‌تكارێن به‌رپرسێن وه‌لاتێن گۆشه‌گیر و تۆتالیتارى، كه‌سانێن ته‌فشۆیێن به‌رۆكا خوه (انتیهازى) نه و مریدێن به‌رپرسانه و هه‌موو ده‌مان به‌رژه‌وه‌ندیێن خوه دپارێزن و تنێ ئالیێ سپى بۆ سه‌یدایێن خوه دبێژن دا كو مانا وان د حاشیا ئه‌زبه‌نى دا به‌رده‌وامبت. ئه‌زبه‌نى ژى هینگێ ب خوه دحه‌سیێن كو پرانیا وان شیره‌تكاران دره‌وینن، ده‌مێ كورسیكا وان دهه‌ژیێت!
