چرکەیێن بەری مرنێ
مەتین وەرمێلی
بێ حەمدی خۆ ڕاوەستیام، و ڕک و ڕک چاڤێن من ژ دێمێ وێ ڤەنەبوون، وەکی دەپێ شانۆێ هەمی رۆناهی د چاڤێن من دا ڤەمرین و بتنێ ئەو ما، ئەز مینا پەیکەرەکی د جهێ خۆ دا هشک مام و کپێن ژ من نەهات.
وەکی وان چرکێن ژێ دبێژن یێن بەری مرنێ، دەما ژیان هەمی دبیتە دیکیۆمێنت، و دهێتە پێش چاڤێن مروڤی، د چەند چرکاندا ئەو هەمی سالێن دگەل عەشقا وێ بوونە وێنە و تێکەلی گڕنژینا وێ بوون.
خەیالان ب جارەکێ ژ جیهانا ماددیاتان برمە دەر، بیرهاتن بوونە ڤولکان، و د دل و هزرێن من دا پەقین، رۆندکێن کەل ژ چاڤێن من هاتنە خوار.
بێی کو ئێک هەست ب من بکەتن، د کەلەژانا دیتنا وێ دا د ڕەجفیم، من دڤیا باوەر بکەم، خۆ د ناڤ خۆدا کونترول بکەم، لێ پا هەر شەڤ خەونا ب دیتنا وێ ڤە دبینم، نوکە یا لبەرامبەری من، و ئەز دناڤبەرا خەون و خەیال و ڕاستیێ دا، یێ سەرمەست و بەرزە بویم، نزانم کەیفا من هاتیە یان ژی بو حالێ خۆ د گریم.
هێش من باوەر ژ چاڤێن خۆ ژی نەکری یە، بۆ یا دبینم.
دزانم جارەکا دی دلێ من ئاڤا عەشقا وێ ڤەخوار، دگەل خوینێ دەمار دەمار یا د لەشێ من دا دگەڕیت، جوانی و شرینی، نازکی و ماقویلیا وێ یێن تێکەل بووین، و یێن یاریان ب هەستێن من دکەن، ئەز ژی مینا شەمالکەکێ د جهێ خۆ دا یێ د حەلییێم، یا ژ من هاتی د دلێ خۆ دا، هەلبەستەک ب جوانیا وێ ڤەهاند، و د بن لێڤ لێڤکاڕا من گۆت: خوەزی تو ب تنێ وێنەیەک بایی لسەر تابلۆیەکێ، د پێشانگەهەکێ دا هاتبایە نمایشکرن وچ عشق ژ دایک نە ببان، من ب تنێ هندە حەشتەنەکربا.
هێش د چرکێن خەیالکرنێ دا بووم، دەما کێلنجیا سیێ ب تەنشتا من کەفتی، و برادەرێ ب ڕەخ من ڤە گۆت؛ تو کیڤە چوویی، و ب جارەکێ ئەز ژ وێ جیهانا جوان ئینامە دەر، هندی سیند خوار، من گۆت چنە، لێ تشتێ باش ژ نوی من باوەری ئینا، یا ئەز دبینم ڕاستییە د چاڤێن من دا، و وەک گولێ لبەرامبەر من یا د بشکورت، ئەز نزانم کا چەند چرکان ئەز دگەل عەشقا وێ ژیام، لێ باوەربکەن تەمەنەک بوو، ب جارەکێ هەمی سحار هەمی ئێڤار هەمی نیڤ شەڤ و هەمی رۆندک یێن من دگەل وێ بوراندین و ژبەر وێ باراندین، هەمی ڤیانا من بو وێ د وان چرکاندا هات بیرا من، ئەو لسەر وەغەرا خۆ چوو، ئەز ژی د حالێ خۆ دا مام.
لێ هیڤی دکەم، کەس پرسیار نەکەت و بێژیت: ئەو کی بوو؟ چ عەشق بوو؟ ئەو چ گول بوو؟.. ئەو چ یار بوو؟ ل کیڤە بوو؟ بەرسڤا ئەڤان پرسیاران دێ د دلێ خۆ دا هەلگرم، تا دگەل خۆ د بەمە بن ئاخێ.