چریسك یونس: ئافره‌تێن دهۆك دێ پشكداری دو قاره‌مانیێن دی بیت
ئه‌ڤرۆ، زنار زوبێر:
سه‌روكا یانا ئافره‌تێن دهۆك یا وه‌رزشی ل دۆر ره‌وشا نوكه یا یانێ دیاركر ئه‌و به‌رامبه‌ر دو قاره‌مانیا نه ل ماوێ بهێت پشكداریێ تێدا بكه‌ن، دیسان بۆ وه‌رزێ بهێت ژی دێ پشته‌بستنێ ل سه‌ر كچێن پارێزگه‌هێ كه‌ن، ل ڤێ حه‌فتیێ ژی دێ باره‌گایێ یانێ ڤه‌گوهێزن.
زێده‌تر چریسك یونس د دیداره‌كا تایبه‌ت دا بۆ رۆژناما ئه‌ڤرۆ گۆت: بریاره ل حه‌فتیا بهێت تیما باسكێت بۆلا یانێ پشكداری قاره‌مانیا پارێزگه‌هێ بیت بۆ ڤاڤارتنێن پشكداریا قاره‌مانیا ئیراقێ یا 3*3 دیسان ئه‌و نوكه دانوستاندنا دانه ل گه‌ل راهێنه‌رێ تیما ڤۆلی بۆلا یانێ بۆ به‌رهه‌ڤكرنا تیمێ بۆ قاره‌مانیا ئیراقێ یا یانێن پلا نایاب ئه‌وا بریاره ل ناڤه‌راستا هه‌یڤا ته‌باخا بهێت ل پارێزگه‌ها دهۆكێ ب شێوازێ كوم ده‌سپێبكه‌ت لێ ژ به‌ر ره‌وشا دارایی یا خراب یا یانێ مسوگه‌ر نینه بشێن پشكداریێ بكه‌ین لێ ئه‌گه‌ر لایه‌نێن په‌یوه‌ندیدار پشته‌ڤان بن دێ شێن هه‌ردو قاره‌مانیا ب سه‌ركه‌فتیانه ب دووماهی بینن.
سه‌روكا یانا ئافره‌تێن دهۆك ده‌رباره‌ی ره‌وشا یانێ گۆت: نوكه د خرابترین ره‌وش دا تیم ده‌ربازدبیت ژبه‌ر نه‌بوونا بودجه‌یه‌كا پێدڤی بۆ دروستكرنا تیمێن یانێ، ل ڤێ حه‌فتیێ ژی دێ باره‌گایێ یانێ ڤه‌گوهێزنه هۆلا چالاكیێن وه‌رزشی یا په‌روه‌ردا رۆژئاڤا داكو بارگرانیا كرێیا باره‌گایێ یانێ ل سه‌ر كارگێریێ نه‌مینت پشتی نڤێسینگه‌ها تایبه‌ت یا پارێزگارێ دهۆكێ رازه‌مه‌ندی ژ لایه‌نێن په‌یوه‌ندیدار وه‌رگرتی.
ل دووماهیێ چریسك یونس داخوازا پشته‌ڤانیه‌كا بله‌ز ژ پارێزگارێ دهۆكێ و لایه‌نێن په‌یوه‌ندیدار كر زێده‌تر پشته‌ڤانیا یانا ئافره‌تێن دهۆك بكه‌ن داكو بشێن ل ماوێ بهێت زێده‌تر پشكداری چالاكیێن وه‌رزشی یێن ئافره‌تان بن.
