چریسك یونس: ئێكه‌تیا ته‌پا یێی یا كوردستانێ بێ رێزی ل وه‌رزشا ئافره‌تا گرت
ئه‌ڤرۆ، زنار زوبێر
د داخویانیه‌كێدا سه‌رۆكا یانا ئافره‌تێن دهۆكێ گازنده ژ ئێكه‌تیا ته‌پاپێی یا كوردستانێ كرن ئه‌وێن ب تنێ چار ملیۆن دینارا تیما فۆتسالا یانا پارێزگه‌هێ خه‌لاتكرنی پشتی ل شوباتا بوری ناسناڤێ قاره‌مانیا فۆتسالا كچان بۆ یانێن پلا نایاب یا وه‌رزێ بوری ب ده‌ستڤه ئینایی.
زێده‌تر جریسك یونس بۆ رۆژناما ئه‌ڤرۆ گوت: د ده‌مه‌كی دا ئه‌م چاڤه‌ڕێ بووین ئێكه‌تیا ته‌پا پێی یا كوردستانێ پاداشتا قاره‌مانا خولا كوردستانێ بۆ وه‌رزێ 2020-2021 بشێوه‌كێ ژ هه‌ژی بهێته خه‌لاتكرن، لێ ژ نشكه‌كێ ڤه كۆژمێ هاتیه دیاركرن بتنێ چار ملیون دینار هاتینه ته‌رخانكرن كو ئه‌ڤچه‌نده دبینین كۆشتنا هیڤی و پشتگۆه خستنا وه‌رزشا ئافره‌تانه، ژبه‌ركو ئه‌ڤ كۆژمه‌یێ خه‌لاتكرنێ ل گه‌ل چو بوهایێن وه‌رزشی ناگۆنجیت كو یانه‌یه‌ك ژ سه‌رجه‌مێ ده‌ه یاریان پێنچ یاری ژ ده‌رڤه‌یی پارێزگه‌هێ ئه‌نجامبده‌ت و بۆ ماوێ پێنچ هه‌یڤا خول یا به‌رده‌وامبیت.
هه‌روه‌سان ناڤهاتی گوت: ئه‌و كۆژمێ هاتیه دیاركرن بۆ یانا ئافره‌تێن دهۆكێ جهێ بێی رێزیكرنا وه‌رزشا ئافره‌تانه كو مه‌زنترین ئێكه‌تیا وه‌رزشی ئه‌ڤ پاداشته ده‌ستنیشانكری بۆ سه‌ركه‌فتیا ئێكێ ئه‌وا تنێ تێرا مه‌زاختیێن شاندێ تیمێ ناكه‌ت كو ل ده‌مه‌كی دایه خه‌رجیێن یانێ مه‌زاختی بۆ گرێبه‌ستێن یاریزانا، هاتن و چوون، ئۆتێل، خارن و پێدڤی تیمێ كریه.
لدووماهیێ ناڤهاتی پسیار كر ئه‌رێ دێ هوسا وه‌رزشا ئافره‌تا پێشكه‌فیت و گوت: داخازێ ژ سه‌رۆكێ چڤاتا وه‌زیران یێ حكومه‌تا هه‌رێما كوردسانێ رێزدار مه‌سرۆ بارزانی دكه‌ین ژ نێزك ئاگه‌هداریا ره‌وشا وه‌رزشا ئافره‌تێن كوردستانێ بیت.
