چــاڤدێرێن ســیاسی:کلچدار ئۆغلۆی چو پرۆژە بۆ چارەسەرکرنا پرسا کوردی نینن
ئەڤرۆ
چاڤدێرێن سیاسی دیار دکەن، نها پتر ژ بەر دژبەریا ئەردۆغانی دەنگدەرێن هەدەپێ دخوازن دەنگێ خوە بدەنە کلچدار ئۆغلۆی، چونکی هەتا نها کەمال کلچدار ئۆغلۆی ژی چو پرۆژەیەک بۆ چارەسەرکرنا پرسا کوردی پێشکێش نەکریە و ژ بەر هندێ ژی رێژەکا بەرچاڤ ژ کوردان دەنگێ خوە نادەنە کلچدار ئۆغلۆیی.
عەلی گۆنەش چاڤدێرێ سیاسی یێ باکورێ کوردستانێ راگەهاند، د هەلبژارتنێن هەری دووماهیێ یێ باژێرڤانیان ل تورکیا دا دەنگدەرێن هەدەپێ پشتەڤانی ل بەربژارێن پارتیا کۆماریا گەل کرن و ژ بەر هندێ ژی ل سێ باژێرێن هەری مەزن یێن تورکیا، ئانکۆ ل ئستەنبولێ، ئەنقەرە و ئزمیرێ ئاکپارتی تووشی شکەستنێ بوو، لێ چ بۆ کوردان نەهاتە کرن، چونکی هەتا نها ژی کەمال کلچدار ئۆغلۆ ل دژی هندێ یە ل تورکیا زمانێ کوردی ببیتە زمانێ فەرمی یێ پەروەردێ، بەری نها ژی گەلەک جاران کلچدار ئۆغلۆی دیار کریە هەکە زمانێ کوردی ببیتە زمانێ فەرمی یێ پەروەردێ ئەو یەک دێ مەترسیا خوە یا مەزن بۆ تورکیا هەبیت، کەسەک وەسا دێ چاوا پرسا کوردی چارەسەر کەت، تنێ تشتێ هەتا کلچدار ئۆغلۆی گۆتی ئەوە کو دێ پرسا کوردی ل پەرلەمانێ تورکیا چارەسەر کەین، بەس دێ چاوا چارەسەر کەن دیار نینە.
فاتمە بایراک وەلاتیا کورد ل ئامەدێ ژی دیار دکەت، کو پارتێن تورکان چو دەمەکێ کار بۆ چارەسەرکرنا پرسا کوردی ناکەن، بەری نها ئاکپارتیێ گەلەک بەحسێ چارەسەرکرنا پرسا کوردی کر، ئەردۆغانی گەلەک جاران گۆت پرسا کوردی پرسا منە و دێ چارەسەر کەم، لێ نها پتر ژ هەر کەسەکێ ئەردۆغان دژبەریا مافێن رەوا یێن کوردان دکەت، کلچدار ئۆغلۆ ژی نها گەلەک لاوازە، وی پشتەڤانیا کوردان دڤێت، ئەز باوەرم هەکە کلچدار ئۆغلۆ بهێتە سەر دەستهەلاتێ دێ ژ ئەردۆغانی خرابتر ئینتە سەرێ کوردان.
ل ئالیێ دی گەلەک چاڤدێرێن سیاسی یێن کورد ل تورکیا و باکورێ کوردستانێ دیار دکەن، دڤێت کوردان پرۆژەکا خوە یا جودا هەبیت، دڤێت هەموو پارتێن کوردی ل تورکیا و باکورێ کوردستانێ ل سەر بنەمایێ مافێن نەتەوی یێن گەلێ کوردستانێ پێکڤە کار بکەن، نابیت کورد چاڤەرێی هندێ بن دێ ئەردۆغان یان ژی کلچدار ئۆغلۆ بۆ وان تشتەکێ کەت، دیرۆکێ سەلماندیە هەموو پارتێن سیاسی یێن تورکیا دەمێ دهێنە سەر دەستهەلاتێ دەست ب دژبەریا کوردان دکەن، بەری نها ئاکپارتیێ ژی گەلەک بەحسێ مافێن کوردان کر و چەندین جاران ژی ب پشتەڤانیا کوردان هاتە سەر دەستهەلاتێ، لێ نها ئاکپارتی پتر ژ هەموو پارتێن دی یێن تورکیا ل دژی کوردان کار دکەت، ئەو یەک ژی دیار دکەت، دڤێت کورد باوەریا خوە ب چ پارتەکا تورکی نەئینن، دڤێت کورد بخوە کار بۆ بدەستڤەئینانا مافێن خوە یێن رەوا ل تورکیا بکەن.
