چل هزار چه‌كدارێن سووری دخوازن بچنه ئۆكرانیایێ
ئه‌ڤرۆ:
ناڤه‌ندا چاڤدێریا مافێن مرۆڤی یا سووریێ راگه‌هاند كو پتر ژ چل هزار چه‌كدارێن سووری به‌رهه‌ڤیا خوه دیار كرینه كو بچنه ئۆكرانیایێ و ل گه‌ل له‌شكرێ رۆسیا شه‌رێ ئۆكرانیا بكه‌ن، رژێما به‌شاری ژی ژ به‌ر هاریكاریێن به‌ری نها یێن رۆسیا پشته‌ڤانیا ل چووینا وان چه‌كداران دكه‌ت.
ناڤه‌ندا چاڤدێریا مافێن مرۆڤی یا سووریێ ئه‌و یه‌ك ژی دیار كریه كو ژ به‌ر ره‌وشا خراب یا ئابووری ل سووریێ گه‌له‌ك كه‌سێن چه‌كدار یێن سه‌ر ب رژێما سووریێ و میلیشاتێن شیعه حه‌ز دكه‌ن بچنه ئۆكرانیایێ و شه‌ری بكه‌ن، لێ هه‌تا نها چو چه‌كداره‌ك نه‌چوویه ئۆكرانیایێ.
ده‌زگه‌هێن راگه‌هاندنا جیهانی ژی دیار دكه‌ن كو ژ به‌ر شه‌رێ د ناڤبه‌را ئۆكرانیا و رۆسیا دا گه‌له‌ك چه‌كدارێن سووریێ دخوازن بچنه شه‌ری و هنده‌ك كه‌س ژی چووینه رۆسیا، لێ هه‌تا نها ب فه‌رمی ئه‌و یه‌ك ژ ئالیێ رۆسیا ڤه نه‌هاتیه پشتراستكرن، چونكو پێشبینی دهێته كرن شه‌رێ د ناڤبه‌را رۆسیا و ئۆكرانیایێ دا چه‌ند مه‌هێن دی ژی ڤه‌كێشیت و ب تایبه‌تی ژی بۆ شه‌رێ باژێران رۆسیا پێدڤی ب وان چه‌كداران هه‌یه كو به‌ری نها د شه‌رێ ل دژی داعشێ دا جه گرتینه و ئه‌زموونه‌كا وان یا باش هه‌یه، هه‌روه‌سا ژ بۆ شه‌ری رۆسیا به‌رهه‌ڤه مه‌هانه پتر ژ هزار دۆلارێن ئه‌مریكی مووچه ژی بده‌ته وان چه‌كدارێن كو دچنه شه‌رێ ئۆكرانیایێ.
