چما پارتی و په‌كه‌كه؟
شڤان سالم گولى
هه‌یامه‌كه ژ ئالیێ زۆره‌ك ژ حزب و پارتێن سیاسی ڤه ل هه‌رێمێ ئه‌و گرژی و ئالۆزیێن د ناڤبه‌را هه‌رێمێ و په‌كه‌كێ دا روو ددن دهێن پێناسه‌كرن ب شه‌ڕێ د ناڤبه‌را پارتی و په‌كه‌كێ دا، ئه‌ڤه د ده‌مه‌كێ داكو هه‌رێما كوردستانێ وه‌كو هه‌رێمه‌كا دستووری دانپێدای پارچه‌ك ژ وه‌لاته‌كێ ب ناڤێ ئێراقه و په‌كه‌كه ژی وه‌ك پارته‌كا كوردی كو مه‌یدانا خه‌بات و چارچووڤێ به‌رخوه‌دانا وێ ل دژی وه‌لاته‌كێ یه ب ناڤێ توركیا كو په‌كه‌كه وه‌ك هێزه‌كا چه‌كدار خوه ب خوادنا كێشه‌یا كوردان ل باكۆر كو پارچه‌كه ژ توركیا دده‌ت ناساندن…
لێ ئه‌وا سه‌یر ئه‌وه كو هه‌ر ژ سالێن هه‌شتیان دا و هه‌تا نها په‌كه‌كێ مه‌یدانا خوه حه‌شاردان و خه‌باتا خوه ل باشۆر دا چارچووڤ كریه، ئه‌ڤه چه‌نده ب تایبه‌ت پشتی سه‌رهلدانا بهارا 1991 هاتیه به‌رچاڤ كرن و دو جاران ژی به‌رخوه‌دانا خوه ل دژی هه‌رێما كوردستانێ راگه‌هاندیه، ئه‌ڤ بزاڤ و لڤینێن نابه‌جێ یێن په‌كه‌كێ پشتێ هێرشا رێكخستیا تیرۆری یا داعش بۆ سه‌ر هه‌رێمێ په‌كه‌كێ ب ده‌لیڤه دیتنه و رۆژ بۆ رۆژ زێده‌تر بوویه بگره هه‌موو هه‌ولێن خوه ژی دده‌ت بنپێكرنا سه‌روه‌ریا هه‌رێمێ ژ ئالیه‌كێ ڤه و سه‌پاندنا بریار و ویستێن خوه ژ ئایله‌ك دی ڤه، ئه‌وا جهێ مخابنی یێ ئه‌وه كو ل باشۆر ژی پارت و ئالیێن سیاسی هه‌نه كو هه‌ڤركیا سیاسی د ناڤبه‌را خوه و پارتی دا كرینه بهانه‌یه‌ك بۆ تاگیرا په‌كه‌كێ ب مه‌به‌ستا لاوازكرنا پێگه‌ها پارتی، هه‌لبه‌ته ئه‌ڤ مژاره ژی هه‌ڤیره‌كه زۆر ئاڤێ هه‌دلگریت، و هه‌ر كه‌سێ ب هووری چاڤدێریا بارودۆخێ سیاسی یێ ناڤچه‌یێ كربیت، باش دزانیت سه‌رچاوه‌یێ ڤان ئالیان ژ كیڤه‌یه و ب چ مه‌به‌ست ل دژی پارتی دهێن هاندنان، هه‌ر چه‌نده مرۆڤ سه‌رسۆرمایی دمینت كو ئالیێن سیاسی ژ لایه‌كێ هه‌پشكێن پارتی بن د حوكمه‌تێ و په‌رله‌مانێ هه‌رێمێ دا كو ل گور هه‌ردویان بوونا په‌كه‌كی ل باشۆر نایاسایی یه، لێ د هه‌مان ده‌م دا ئه‌ڤ ئالیه ل هه‌مبه‌ر بنپێكرن و فشارخستنا ل سه‌ر حوكمه‌تێ د بێده‌نگ و بێ هه‌لویست, بوونا په‌كه‌كێ ژ بلی بێرێزیكرن ب هه‌ڤوه‌لاتی ده‌ستهه‌لاتا باشۆر و كاڤل مانا سه‌دان گوندێن سنووری، بوویه ئه‌گه‌را هندێ كو ئه‌ڤ ده‌ڤه‌رێن سنووری به‌رده‌وام ل ژێر ره‌حما بومبه و ئوپراسیۆنێن توركیا دا بمینن، و هه‌رده‌م توركیا ئه‌ڤ هه‌بوونا وان ل ده‌ڤه‌رێ ب ده‌لیڤه زانیه بۆ به‌زاندنا سنوورێن هه‌رێمی و دیسا فشار خستنا سه‌ر هه‌رێمی، بزاڤ و رێخستنێن په‌كه‌كێ ب تنێ ل ده‌ڤه‌رێن سنووری نه راوستیاینه ئێدێ ب هه‌ڤكاریا ئالیێن ناڤخوه وه‌ك مه ل سه‌ری ئاماژه پێدایی ده‌ربازی ناڤا بار و باژاركان بوویه، بێ حاشایه ل ئه‌وا دبێژنێ زۆنا كه‌سك ئێدێ ژ ئه‌نجامێ وێ ئاسانكاریا هاتیه‌كرن بوویه خوادن بڕیار ژی و هه‌بوون و به‌لاڤكرنا تیرۆرا هزری ل ناوچێ و بنپێكرنا سه‌روه‌ری و پیرۆزیا ل باشۆر ب گشتی و زۆنا كه‌سه‌ك ب تایبه‌ت ب زۆری پێویسته ب وێ تیرورا هزری ڤه،
دیاره پشتی ئوپه‌راسیرنا ڤێ داویێ یا په‌نجه‌یا پلنگی كو ژ ئالیێ توركیا ڤه هاتیه راگه‌هاندن كو ب مخابنی ڤه زه‌ره‌ر و زیانه‌ك زۆر گه‌هاندیه چیا و زه‌ڤیێن باشۆر و دیسا بوویه ئه‌گه‌ر بۆ هندێ كو توركیا ب دیار و ئاشكه‌را ده‌یان بنگه‌هێن خوه یێن سه‌ربازی ل هه‌رێما باشۆر دابنیت و گڤاشتنێن مه‌زن ل هه‌رێمێ بكت ل دۆر په‌كه‌كێ و هه‌بوونا وێ، ئێدێ حوكمه‌تا هه‌رێمی وه‌ك ده‌ستهه‌لاتا شه‌رعی یا هه‌لبژارتی ب مه‌به‌ستا كێمكرنا فشارێن ل سه‌ر خوه ژ هه‌ردو ئالیێن توركی و په‌كه‌كێ ڤه داخواز ژ په‌كه‌كێ كریه مه‌یدانا خه‌باتا خوه ڤه‌گوهێزن باكۆر بۆ هندێ كو هه‌جه‌تا توركیا ژی ل باشۆر ب داویی بهێت، لێ دیاره په‌كه‌كه ب ڤێ ئێكێ نارازی یه ماوه‌یه‌كێ ب ئاشكه‌را شه‌ڕ دژی باشۆر راگه‌هاندیه و چه‌ندین هێرشێن چه‌كداری بۆ سه‌ر هێزێن پێشمه‌رگه‌یی كرینه ژ بلی ته‌قاندنا بۆریا نه‌فتا باشۆر بۆ جیهان، دیاره هێزێن پێشمه‌رگه‌یی هه‌تا نها دان ب خوه‌داگرتینه و پشكه‌ك نه‌بووینه ژ شه‌ڕی، لێ زۆر سه‌یره هێزێن پشكدار د حوكمه‌تێ دا ڤی شه‌ڕی كورت بكه‌ن ب شه‌ڕێ د ناڤبه‌را پارتی و په‌كه‌كێ دا! كو ئه‌ڤه ب خوه زۆر پرسان دخوه‌دا هه‌لدگریت.
گه‌لۆ سه‌روه‌ریا هه‌رێمێ یا پارتی ب تنێ یه؟ گه‌لۆ چما شه‌ڕێ په‌كه‌كێ ل گه‌ل پارتی ب تنێ یه؟ گه‌لۆ پا ئه‌رك و رۆلێ هێزێن پشكدار د حوكمه‌تا هه‌رێمێ دا ل دۆر پاراستنا سه‌روه‌ریا هه‌رێمی چی یه؟ گه‌لۆ چما پارتی ب تنێ ئارمانجا ڤان هێز و ئالیێن سیاسی یه؟ گه‌لۆ بێ هه‌لویستیا هنده‌ك ئالیێن سیاسی یێن پشكدار د حوكمه‌تێ دا بانگا دو ئیداربوونێ راناگه‌هینت؟
هه‌لبه‌ته بۆ به‌رسڤا ڤان پرسیاران تنێ پێدڤی بیر ل بۆیه‌رێن 16ی ئوكتوبه‌را 2017 دا بكین دێ به‌رسڤێن باش و گونجایی ب ده‌ست مه كه‌ڤن.
