چه‌رخێ زێرینێ كه‌ركووكێ!
شێرزاد نایف
چ باژارێن كوردی ته‌مه‌تى كه‌ركووكێ تووشى زیان و ئازاردانێ نه‌بووینه و هه‌موو دسهه‌لاتان زۆریه‌كا مه‌زن لێكریه و نه‌هێلایه بێهنا وێ فره‌ه ببیت و هه‌ر فه‌تساندیه، بیرا من دهێت به‌رى كو مایێ حوكمه‌تا هه‌رێما كوردستانێ تێبچیت، جاره‌كێ چوومه سه‌ره‌دانا هه‌ڤاله‌كى ل كه‌ركووكێ، ل ده‌وربه‌رێن وى باژارێ گه‌رموگۆر من چه‌ندین كۆلگێن گازى دیتن و دیكێلا پترۆلێ ژ ئه‌ردى بلند دبوو به‌ر ئه‌سمانى هه‌لبه‌ت ژ بلى رووبه‌رێن مه‌زن یێن ئه‌ردێ چاندنێ، من هزر كر دێ چمه نیڤا باژارى دى شارستانیێ و زه‌نگینیێ و مشه‌بوونا پترۆل و غاز و په‌نزینێ و ئه‌رزانیێ بینم، به‌لێ ده‌مێ من دیتى مخابن، ئه‌ز ل ده‌سپێكێ ب سه‌ر سرایا پانزینێ یا درێژ هه‌لبووم، و قه‌ره‌بالغا خه‌لكى ل سه‌ر داگرتنا په‌نزینێ!! ب راستى حێبه‌تى بوون و خه‌مدار بووم، من ئه‌و باژار گه‌له‌ك بێسه‌روبه‌ر دیت، ژ به‌ر وێ سته‌ما ده‌سهه‌لاتێن كه‌ڤن و غه‌دار لێ كرین دیت، من هه‌ست ب شه‌ره‌مه‌كا مه‌زن كر، ژ خه‌له‌كێ بیانى یێن سه‌را وى باژارى دده‌ن، به‌لێ ده‌مێ هێشتا چوویمه د ناڤ گه‌هێن وى باژارى دا، من رێژه‌كا زۆر یا كوردان دیت، هه‌ر كوردێ من دیتى ژى ئاخینكێن كوردبوونا وى باژارى بۆ من رادهێلان، چه‌نده‌كێ ده‌روونا من ئارام بوو كو من بهیستبوو كو گه‌له‌ك هه‌وین عه‌ره‌بكرنێ ب سه‌ر دا هاتبوون، به‌لێ ژیوار وه‌سا بوو كو نه‌شیاینه زێده‌تر كوردان ژێ دووربێخن، هه‌موو كوردبوون من هه‌ست كر ل هه‌ولێرێ مه یان سلێمانیێ، به‌لێ سه‌روبه‌رێ وى باژارى زۆریێ هه‌ژار بوو، ده‌ما زڤریمه هه‌ولێرێ من ئه‌و پاقژى و شارستانى و ئاڤه‌دانى دیتى، ب راستى ئه‌رد و ئه‌سمانان جوداهى هه‌بوو، ئێكسه‌ر من د ده‌روونا خوه دوعایه‌ك كر كو خۆزی ده‌ستێ به‌ره‌كه‌تێ و سوعیدا نیازپاك گه‌هشتبایێ و حوكمه‌تا هه‌رێما كوردستانێ هه‌مبێزكربا، به‌لێ ئه‌و دوعا یا چه‌رخێ زێرینبوونا كه‌ركووكێ من دیته‌ڤه ل سه‌ر ده‌مێ ده‌ستهه‌لاتا حوكمه‌تا هه‌رێمێ ل هه‌ر سێ سالێن وێ دا وه‌كو هه‌ر ژ سالا 2014 هه‌تا خیانه‌تا 16 ئوكتۆبه‌رێ مه بخوه دیت و یا ئاشكرایه كو مه‌هانه ده‌ه ملیۆن دۆلارێن پترۆدۆلاری ژ لایێ حوكمه‌تا هه‌رێمێ ڤه بۆ كه‌ركووكێ دهاته ره‌وانه‌كرن ب بایه‌خدانا كه‌سێ سه‌رۆك وه‌زیران نێچیرڤان بارزانى ب خوه كو ژ دل ل سه‌ر رادوه‌ستیا و ئه‌وا حوكمه‌تا هه‌رێما كوردستانێ بۆ كه‌ركووكێ كرى ب پشتراستى ڤه و بێى موزایده‌كرنه‌ك به‌لێ چو جاران حوكمه‌تا ئیراقێ ئه‌و نه‌كریه ئه‌وى پاره‌ی ناده‌ته كه‌ركووكێ و نه‌دایێ ژى و هه‌مووان ب خوه ژى دیت حوكمه‌تا حیده‌ر عه‌بادى چه‌ند سۆزێن بێ بنه‌ما ددان و چو نه‌كر ژى، به‌لكو خرابتر لێكر!!. به‌لێ ئه‌وا حوكمه‌تا نێچیرڤان بارزانى بۆ كه‌ركووكێ كری و ئه‌و پاره‌یێ بۆ ره‌وانه‌كرى بلا وه‌ژدان بپه‌یڤیت، كو ب سه‌دان كه‌س ب وی پاره‌ی هاتنه دامه‌زراندن ژ خه‌لكێ به‌لنگاز و بێده‌رامه‌ت، هه‌ردیسا ژى خواندنا كوردی ب هێزبوو و پشته‌ڤانیا دارایی دهاته‌كرن ب سه‌دان پرۆژه هاتنه ڤه‌كرن، به‌لێ هه‌ر ژ ل سالا 1927 و حه‌تا نها چو ده‌مه‌كی حوكمه‌تا ئیراقێ پشكه‌ك ژ داهاتێ پترۆلێ نه‌دایه كه‌ركووكێ، به‌لێ مخابن هه‌موو یێن دبینن كو نها ره‌وشا كه‌ركووكێ یا ئالۆزه و هه‌موو گریبه‌ست و دامه‌زراندنێن حوكمه‌تا هه‌رێمێ بێ پشته‌ڤانیا دارایی مان هه‌موو ژى ئه‌گه‌ران دزانن.
