چه‌ندین ئه‌فسه‌رێن ئیرانێ ل سووریێ هاتنه كوشتن
ئه‌ڤرۆ:
ده‌زگه‌هێن راگه‌هاندنا فارسی ل ئه‌مریكا و ئورۆپا دیار دكه‌ن كو دو شه‌ڤان به‌ری نها فرۆكێن شه‌ری یێن ئسرائیلێ ل سووریێ ئێرشی ئێك ژ بنگه‌هێن هێزێن ئیرانێ ل نێزیكی شامێ كرینه كو د ئه‌نجام دا گه‌له‌ك ئه‌فسه‌ر و سه‌ربازێن ئیرانێ هاتینه كوشتن و هژماره‌ك زێده ژی بریندار بووینه.
ل ئالیێ دی ئاژانسا سپوتینگ یا رۆسیا ژی دوهی راگه‌هاند كو فرۆكێن شه‌ری یێن ئسرائیلێ ئێرشی سیسته‌مێ به‌رگریێ یێ ئه‌سمانی یێ سووریێ كرینه و چه‌ندین جهێن سه‌ربازی ژی بووینه ئارمانجا ئێرشێن فرۆكێن سه‌ربازی یێن ئسرائیلێ لێ هه‌تا نها دیار نینه كا چه‌ند كه‌س د ئه‌نجاما وێ ئێرشێ دا هاتینه كوشتن.
ئه‌و یه‌ك د ده‌مه‌كێ دایه كو حه‌فتیا بۆری رۆژناما ئسرائیل تایمز ژی دیار كربوو كو هێزێن ئه‌سمانی یێن ئسرائیلێ به‌رهه‌ڤیان دكه‌ن دا ئێرشی بنگه‌هێن ئه‌تۆمی یێن ئیرانێ بكه‌ن، چونكو هه‌تا نها ئیران به‌رهه‌ڤ نینه به‌رنامێ خوه یێ ئه‌تۆمی بده‌ته راگرتن و ئسرائیلێ ژی به‌ری نها بۆ ئه‌مریكا دیار كریه كو دڤێت ب چو ره‌نگه‌كێ رێ نه‌هێته دان كو ئیران ببیته خوه‌دانا چه‌كێن ئه‌تۆمی، چونكو هه‌كه ئیران چه‌كێن ئه‌تۆمی دروست بكه‌ت ئه‌و یه‌ك دێ مه‌ترسیا خوه بۆ ئسرائیلێ و هه‌ڤپه‌یمانێن ئه‌مریكا ل ده‌ڤه‌رێ هه‌بیت و هه‌كه ئه‌مریكا رێگریێ نه‌كه‌ت ئسرائیلێ ب تنێ ژی ئه‌و شیان هه‌نه كو نه‌هێلیت ئیران چه‌كێن ئه‌تۆمی دروست بكه‌ت، ئسرائیلێ دڤێت وه‌كو نها كا چاوا ل سووریێ ئێرشی هێزێن ئیرانێ دكه‌ت وه‌سا ژی ئێرشی بنگه‌هێن ئه‌تۆمی یێن ئیرانێ د ناڤ ئاخا وی وه‌لاتی دا بكه‌ت.
