چومسكي: شه‌رێ جيهاني يێ سيێ دهێته كرن
نۆم چۆمسكي زانايێ ناڤدارێ ئه‌مريكا د هه‌ڤديتنه‌كێ دا ل گه‌ل ته‌له‌فزيونا فارسي يا ئه‌مريكا به‌حسێ روودانێن رۆژهه‌لاتا ناڤين و شه‌رێ داعش و كوردان و ده‌ستێوه‌ردانا ئه‌مريكا و هاريكاريا هێزێن جيهاني بۆ كوردان دكه‌ت و ديار دكه‌ت كو يا نها دهێته كرن شه‌رێ جيهاني يێ سيێ يه چونكو پرانيا وه‌لاتێن جيهانێ د ڤي شه‌ري دا پشكدارن، هنده‌ك وه‌لات پشته‌ڤانيا داعش دكه‌ن و هنده‌ك وه‌لات ژي شه‌رێ داعش دكه‌ن و ئه‌وه ژي ب ره‌نگه‌كێ شه‌رێ جيهاني يێ سيێ دهێته كرن و ئه‌ز باوه‌رم دێ ئه‌و شه‌ره ده‌مه‌كێ كورت ب دووماهي و هێت و دێ داعش ژناڤ بچيت.
نۆم چۆمسكي زانايێ ناڤدارێ ئه‌مريكا د هه‌ڤديتنه‌كێ دا ل گه‌ل ته‌له‌فزيۆنا فارسي يا ئه‌مريكا ديار كر كو ئاشكرا سعوودي و قه‌ته‌ر و گه‌له‌ك وه‌لاتێن دي هاريكاريا داعش دكه‌ن، چونكو وان دخواست هێزه‌كي ل دژي وان گوهۆرينان دروست بكه‌ن يێن كو ب رێيا ئه‌مريكا و رۆژئاڤا ل ده‌ڤه‌رێ دروست دبوون، باش به‌رێ خوه بده‌نێ هه‌تا بهارا عه‌ره‌بي و شه‌رێ ل سووريێ و ليبيا ده‌ستپێ نه‌كري داعش نه‌بوو، هنده‌ك گرۆپێن توندره‌و يێن ئيسلامي هه‌بوون لێ ئه‌و ژي گه‌له‌ك لاواز بوون و ئه‌مريكا هه‌ر به‌حسێ وان ژي نه‌دكر، چونكو وێ ده‌مێ وه‌لاتێن كو نها پشته‌ڤانيا داعش دكرن تنێ دخواستن ئه‌و گرۆپێن توندره‌و هه‌بن و وان نه‌دخواست وێ ده‌مێ ئه‌و ب هێز بن، لێ پشتي گوهۆرينێن ل ده‌ڤه‌رێ ده‌ستپێ كري هه‌ر زوو داعش ده‌ركه‌ڤت و پاشي ژي مه ديت كا چاوا شيان پشكه‌ك ژ ئاخا عيراقێ و سووريێ كۆنترۆل بكه‌ن و گۆت: »نها داعش ب ره‌نگه‌كێ راسته‌خوه گه‌فه‌كه مه‌زن بۆ ئه‌مريكا و وه‌لاتێن رۆژئاڤا و هه‌كه ئه‌م به‌رێ خوه بده‌ينێ ديار دبيت كو ب ره‌نگه‌كێ ژ ره‌نگان داعش نيشا شه‌رێ هێزێن نووخواز ل دژي وان هێزانه كو دخوازن هێشتا دونيايێ ل گۆر سيسته‌مێ هزار سال به‌ريا نها برێڤه ببه‌ن و ژ به‌ر وێ يه‌كێ ژي ژ بلي هنده‌ك مرۆڤێن توندره‌و و يێن كو ئاريشێن خوه هه‌نه داعشێ چو پێگه‌هێ خوه يێ جڤاكي نينه و ژ به‌ر وێ يه‌كێ نه‌شێت زێده‌تر خوه رابگريت«.
د پشكه‌كا دي يا ئاخڤتنا خوه دا زانايێ ناڤدارێ ئه‌مريكا ئاماژه ب ڤێ يه‌كێ ژي كر كو داعش هێزه‌كه بۆ هنده‌ك ئارمانجێن به‌روه‌خت يێن هنده‌ك وه‌لاتێن عه‌ره‌بي ل رۆژهه‌لاتا ناڤين هاتيه دروست كرن و يا راست نها شه‌رێ وان و رۆژئاڤا دهێته كرن، چونكو ئه‌مريكا ب چو ره‌نگه‌كێ قه‌بوول ناكه‌ت كو به‌رژه‌وه‌نديێن وێ ل رۆژهه‌لاتا ناڤين بكه‌ڤيته د مه‌ترسيێ دا و ژ به‌ر وێ يه‌كێ ژي نها ئه‌مريكا و بريتانيا ل گه‌ل وه‌لاتێن دي يێن ئورۆپا ده‌ست ب به‌رنامه‌كا مه‌زن دكه‌ن دا بشێن رێكخراوا تيرۆرستي يا داعش ب ته‌مامي ژناڤ ببه‌ن و گۆت: »ئه‌ز دبێژم ئه‌وه شه‌ره دێ زێده درێژ نه‌كه‌ت، چونكو يا يه‌كێ به‌رێ خوه بده‌نێ ئه‌و ده‌ڤه‌رێن كو داعش ب زۆرا چه‌كي كۆنترۆل كريه و قانوونێن كو ل سه‌ر جڤاكێ دسه‌پينين، تووشي نه‌رازيبوونێن جڤاكي هاتينه و خه‌لك ژ داعش نه‌رازينه و هه‌كه نها ژي نه‌بيت ده‌مه‌كێ دي ئه‌و خه‌لكه دێ ب خوه ل دژي وێ رێكخراوێ رابيت و دێ وان ژناڤ ببه‌ت و ژ به‌ر وێ يه‌كێ ژي ته‌مه‌نێ داعش گه‌له‌ك كورته و وه‌ك رێكخراوێن دي ژي نينه، چونكو داعش گه‌له‌ك رێبازێن درندانه د شه‌ري دا بكار دهينيت و وێ يه‌كێ وه‌سا كريه كو د ناڤ جڤاكێن ئيسلامي دا خه‌لك ب رێژه‌كا مه‌زن دژبه‌ريا داعش بكه‌ن«.
د دووماهيا ئاخڤتنا خوه دا نۆم چۆمسكي ئه‌و يه‌ك ژي ديار كر كو ئه‌مريكا و رۆژئاڤا دخوازن داعش ل سووريێ و عيراقێ ژناڤ ببه‌ن، ئه‌گه‌رێ وێ يه‌كێ ژي ئه‌وه كو وان نه‌ڤێت ئه‌و شه‌ره بگه‌هيته رۆژئاڤا، چونكو هژماره‌ك زێده چه‌كدارێن ئه‌مريكي و ئورۆپا د ناڤ رێزێن داعش دا هه‌نه و ئه‌و ژي مه‌ترسيه‌كا مه‌زنه بۆ رۆژئاڤا و ئه‌و دخوازن وي ئاگري ل رۆژهه‌لاتا ناڤين ڤه‌مرينن دا نه‌گه‌هيته وه‌لاتێ وان و گۆت: »كه‌سێن كو ل ئورۆپا يان ئه‌مريكا ژي چووينه ناڤ رێزێن داعش ئه‌و كه‌سێن كو نه‌شياينه د ناڤ جڤاكێ ڤێرێ پێگه‌هه‌كي بۆ خوه دروست بكه‌ن و گه‌له‌ك ژ وان كه‌سان ژي به‌ريا نها تاوانێن مه‌زن ئه‌نجام داينه و ب سالان ل زيندانان دا ماينه و يا نها ئه‌و دكه‌ن ب ره‌نگه‌كێ تۆل راكرنا ل هه‌مبه‌ر سيسته‌مي يه و ژ به‌ر وێ يه‌كێ ژي ئه‌و ب ره‌نگه‌كێ درندانه سه‌ره‌ده‌ريێ ل گه‌ل مرۆڤان دكه‌ن و وان دكوژن«.
