چونا وه‌لاتیان بۆ ده‌رڤه یا به‌رده‌وامه
ئه‌ڤرۆ، نه‌وزاد هلۆری:
ژبه‌ر ره‌وشا سیاسی و ئابووری و جڤاكی، پشكه‌ك ژ وه‌لاتی و گه‌نجێن هه‌رێما كوردستانێ و قه‌ستا ده‌رڤه‌ی وه‌لاتی كریه و چونا وان ژی یا به‌رده‌وامه، په‌نابه‌ره‌ك ژی به‌حس ل وان ئێش و ژان و ئاسته‌نگ و سزایێن دكه‌ڤنه رێیا په‌نابه‌ران دا دكه‌ت.
وه‌لید زه‌لامه‌كێ خێزانداره بۆ ئه‌ڤرۆ گۆت: من ل كوردستانێ چو خانی و كار نه‌بوون، وه‌خته‌كێ وه‌كو كرێكار ل ئێك ژ سه‌مونخانێن ده‌ڤه‌را سێمێلێ كار دكر، به‌لێ پاشی ئه‌و كار ژی نه‌ما، هندی من دووڤچون ل سه‌ر ده‌لیڤه‌كا كاری كر، به‌لێ مخابن چو كار ب ده‌ست من نه‌كه‌فتن، له‌وا ب نه‌چاری من بریار دا كو رێیا قاچاغ بگرم و ئه‌ز و خێزان و زارویێن خوه كوردستانێ بجهـ بهێلین و بچینه ژ ده‌رڤه.
وه‌لید زێده‌تر گۆت: ئه‌ڤه بو ماوێ دو سالایه ئه‌ز و خێزان و زارویێن خوه ل سنورێ دناڤبه‌را توركیا و بلغاریا نه‌شێین ده‌رباز بین، ژبه‌ركو جه‌ندرمه و سه‌ربازێن هه‌ردو وه‌لاتان ب ره‌نگه‌كێ دوور ژ مرۆڤایه‌تی و شارستانیێ ره‌فتارێ ل گه‌ل وان كه‌سان دكه‌ن كو دخوازن ب په‌نابه‌ری قه‌ستا ده‌رڤه بكه‌ن ب تایبه‌تی ژنان، بۆ نموونه ژنه‌كا نیاسا من ل گه‌ل هه‌ڤژینێ خوه قه‌ستا ده‌رڤه كر، ب رێڤه هاتنه گرتن، ده‌ستپێكێ هه‌موو پاره و زێر و كه‌لوپه‌لێ ل گه‌ل ژێ وه‌رگرتن، پاشان یاری و ترانه بخوه ب وان كرن، هه‌تا ل به‌رچاڤێن زه‌لامێ وێ ژن رویس كر و هه‌موو جلكێن وێ ژبه‌ر كرن و یاری و ترانه بخوه ب وان دكرن، پاشان پشتی چه‌ند قوتان و ئێشاندن و خه‌به‌رێن كرێت و ره‌زیل كرین جاره‌كا دی زڤراندنه توركیا داكو ئه‌و ژی ڤه‌گه‌رینن كوردستانێ، ئه‌ڤه پشكه‌ك ژ وان نه‌خوشیانه كو د رێیا په‌نابه‌ریێ دا دكه‌ڤنه د رێیا وان كه‌سان دا یێن كو دخوازن بچنه ژ ده‌رڤه، ئه‌ڤه نێزیكی دو سالایه ئه‌ز نه‌شێم ده‌رباز بم ژبه‌ركو دترسم وه‌كو ئه‌ڤێ ژنێ و هه‌ڤژینێ وێ هه‌مبه‌ری من و خێزان و زارویێن من ژی بهێنه كرن، ده‌هان نمونه‌یێن ئه‌نجام دانا كریارێن ده‌ستدرێژی و توندوتیژیێ ل هه‌مبه‌ری په‌نابه‌ران هه‌نه.
ناڤبری دیار كر ژی كو ده‌مێ ئه‌و ل كوردستانێ هه‌ر ژ ده‌ستپێكا شه‌رێ داعشێ هه‌تا داوی هاتی، هاریكاری گه‌هاندینه هه‌موو سه‌نگه‌رێن پێشمه‌رگه‌ی و گۆت: كوردستان وه‌لاتێ مه‌یه و چو جاران پشت ناكه‌ینێ، هه‌رده‌م دێ گیانێ خوه بۆ كه‌ینه قوربان، هه‌ر وه‌لاته‌كێ ده‌ستدرێژیێ بكه‌ت سه‌ر دێ به‌رسنگی راوستین، ئه‌ڤجا چ ل كوردستانێ بیت یان ژی ژ ده‌رڤه، به‌لێ ده‌مێ كو مرۆڤی چو خوشی و ژیان تێدا نه‌بیت نه‌چاره كو ل جهه‌كێ بگه‌ریێت ژیانا وی و زارویێن وی بهێته گه‌ره‌نتیكرن.
وه‌لید كو نوكه ل توركیایه و چاڤه‌رێ دكه‌ت بچیته ژ ده‌رڤه‌ی وه‌لاتی و گۆت: هه‌تا نوكه پتری 100 جاران من بزاڤ كریه سنورێن توركیا بۆ ئه‌ورۆپا ده‌رباز بكه‌م، به‌لێ هێشتا ئه‌ز نه‌شیایمه ژبه‌ركو من نه‌ڤێت خێزان و زارویێن خوه ژ ده‌ست بده‌م، كۆرۆنایێ گه‌له‌ك كارتێكرنێن خراپ ل سه‌ر چونا مه كرن، ژبه‌ركو هه‌م ژ روویێ دارایی ڤه نه‌شێین وه‌كو پێدڤی بچین هه‌م ژی سنورێن وه‌لاتان هاتینه توند كرن، ئه‌ڤه زێده‌باری كو ل هنده‌ك ده‌مێن سالێ ژبه‌ر كه‌ش و هه‌وایێ گونجایی نینه مرۆڤ بچیت ب تایبه‌تی زڤستانێ و بهارێ.
ل گوره‌ی ئامارێن نه فه‌رمی ژ ده‌ستپێكا هاتنا كۆرۆنایێ هه‌تا نوكه پتری 25 هزار كه‌سان ل هه‌رێما كوردستانێ چوینه ژ ده‌رڤه و پشكه‌ك ژ وان ل وه‌لاتێن ئورۆپا بنه‌جه بوینه.
