چو جاران دهۆكێ ژبیر ناكه‌م
دهۆك، زنار تۆڤی
خانما سۆلتان، سترانبێژه‌كا خه‌لكا ئامه‌دێ یه ل باكۆرێ كوردستانێ، پتری پێنج سالان ل باژێرێ دهۆكێ ژیایه و گه‌له‌ك بیرهاتنێن خۆش ل ڤی باژێری هه‌نه و دبێژیت: هه‌ر چه‌نده نوكه ل ئامه‌دێ دژیم به‌لێ چو جاران نه‌شێم باژێرێ دهۆكێ ژبیر بكه‌م.
ناڤهاتیێ، د دیداره‌كێ دا بۆ رۆژناما ئه‌ڤرۆ گۆت: سه‌ره‌رای چه‌ندین ئاسته‌نگێن ژیانێ و رێگریكرنێ ل كارێ من لێ من شیا جهێ خوه دناڤ كارێ هونه‌ری دا بكه‌م و سترانان بێژم، چونكی هه‌ر ژ زارۆكاتییا من سترانگۆتن ل گه‌ل من مه‌زن بوویه، هه‌ر چه‌نده مالباتا من ژی گه‌له‌ك رێگربوون و نه دهێلان ئه‌ز سترانان بێژم، لێ من هه‌ر گۆتن و نوكه ژی یا به‌رده‌وامم،
و ئه‌ڤه ده‌مه‌كه ئه‌ز یا به‌رهه‌ڤیان بۆ تۆماركرنا سترانه‌كا ئه‌ڤینی دكه‌م و ل ڤان نێزیكان دێ تۆماركه‌م و من ل به‌ره كلیپ بكه‌م، دیسان ئه‌ز حه‌ز دكه‌م سترانێن سینگل چێكه‌م چنكو نوكه خه‌لك پتر حه‌ز ژ سترانێن سینگل و كلیپان دكه‌ن، د نوكه دا كلیپێ گه‌له‌ك رۆلێ خوه هه‌یه، هه‌روه‌سا ئه‌ز حه‌ز دكه‌م سترانێن دویت ژی بێژم، دیسان هه‌تا نوكه گه‌له‌ك هیڤیێن من بجه نه‌هاتینه و ئه‌ز یا كار دكه‌م، ژ پێحه‌مه‌ت بشێم هه‌موو هیڤیێن خوه د هونه‌ری دا بجه بینم، هه‌روه‌سا هه‌تا نوكه من هزر د شووكرنێ ژی دا نه‌كرییه و نوكه ب تنێ هزرا من ل سه‌ر كارێ من یێ هونه‌رییه، من دڤێت ب باشترین ره‌نگ خزمه‌تا هونه‌رێ كوردی بكه‌م.
