چو دەستهەلاتەكێ شیانێن هەلوەشاندنا قەوارەیێ هەرێما كوردستانێ نینن
ئەڤرۆ
فەرمانگەها میدیا و زانیاری یا حوكمەتا هەرێما كوردستانێ رۆهنكرنەك ل دۆر نڤیسینەكا رۆژنامەیا (ئەلسەباح) یا ئیراقی بەلاڤكریە، كو وێ رۆژنامەیێ دوهی 18/2/2023 نڤیسینەك بەلاڤكریە و د راپرسیەكێ گۆتیە: خەلك ژ دەستهەلاتا سیاسی یا هەرێمێ بێ هیڤی بوویە و دخوازن ڤەگەڕنەڤە سەر بەغدا.
فەرمانگەها میدیا و زانیاری یا حوكمەتا هەرێما كوردستانێ د بەرسڤا وێ رۆژنامەیێ دا گۆتیە: هەرێما كوردستانێ، خودان قەوارەكێ یاسایی و دەستووریە و بەرهەمێ خوینا ب هزاران شەهید و خۆڕاگری یێن پێشمەرگەیێن قەهرەمانە و چو دەستهەلاتەكێ شیانێن هەلوەشاندنا هەرێما كوردستانێ نینن و ب نڤێسینا ڕۆژنامەكا لبەر نەمانێ ژناڤ ناچیت.
فەرمانگەها میدیا و زانیاری د رۆهنكرنا خوە دا خویا كریە، ئەو سەنتەر و ڕاپرسیا وێ ڕۆژنامێ پشتبەستن ل سەر كری، چ بنەمایەكێ زانستی نینە و ژ ڕاستیێ دوورە و تێدا هاتیە: «خەلكێ پارێزگەهێن ئیراقێ، ب خوە شەهدەیێ ددەن، كو هەرێما كوردستانێ ژ ڕوویێ پێشكەفتن و ئاڤەدانیێ و خزمەتگوزاریان ڤە، ب چەندین سالان ل بەری دەڤەرێن دیتر یێن ئیراقێ یە، ئێدی چاوا خۆزیان ب هندێ دخوازن و داخواز دكەن ڤەگەڕنە سەر جهەكێ د هەموو بیاڤان دا وێران و كاڤل بووی!
