چو مەترسی ل سەر ئاسایشا خوارنێ ل هەرێما كوردستانێ نینە
هەولێر، قائید میرۆ
بریكارێ وەزارەتا بازرگانی و پیشەسازی ئاماژەكر، د دەمێ نوكەدا چو مەترسی لسەر ئاسایشا خوارنێ ل هەرێما كوردستانێ و بازاڕێن هەرێما كوردستانێ نینە و بۆ چەندین هەیڤێن دی كەلوپەل تێدا هەنە. گۆت ژی: هەر كەسەكێ ئەڤێ رەوشێ وەك دەلیڤە بكار بینیت بۆ گرانكرنا بهایێ كەلوپەلان، ل گۆرەی قانوونێ دێ هێتە سزدان و دێ دەینە دادگەهێ.
سەروەر هاواری، بریكارێ وەزارەتا بازرگانی بۆ رۆژناما ئەڤرۆ دیار كر «ئاسایشا خوارنێ ل هەرێما كوردستانێ چو مەترسی ل سەر نینە، ئەو ژی ژ بەر ئەڤێ سیاسەتا حەكیمانەیا حوكمەتا هەرێما كوردستانێ هەیە، راستە دەڤەر د رەوشەكا ئالۆزدا دەربازدبیت و ل پتریا وەلاتێن دەڤەرێ ئاریشە هەنە، بەلێ بازاڕێن هەرێما كوردستانێ تژی كەلوپەلن، ب تایبەتی كەلوپەلێن خوارنێ، هەموو ئەو دو دلی و ترسا ل دەستپیكا شەڕی پەیدابووین وی دەمی ژی مە ب رێیا دەزگەهێن راگەهاندنێ پەیام بۆ وەتیان هنارت و داخوازكر لەزێ نەكەن ل كڕینا كەلوپەلان و بهایێ زێدەتر ب كەلوپەلان نەدەن.
زێدەتر گۆت: چو پێدڤی ناكەت وەلاتی كەلوپەلێن زێدە بكڕیت، ژبەركو كڕینا رێژەیەكا زۆر كەلوپەلان دێ بیتە ئەگەرێ پەیداكرنا گرانیێ و چو مفا ژی نابیت بۆ وەلاتیان، هندەك خەلكی بەری نوكە رێژەیەكا زۆر یا خوارنێ كڕیە و نوكە دڤێت ب زەرەر بفرۆشن، لەوڕا داخوازێ ل وەلاتیان دكەین تنێ بەهرا پێدڤیێن خوە كەلوپەلان بكڕن و بازاڕێن هەرێما كوردستانێ تژی كەلوپەلن.
سەروەر هاواری گۆتژی» خوەدیێن كۆمپانیا و جهێن بازرگانی هەموو كەس و كارێن مەنە و ئەم ناخوازین بگەهیتە ئاستێ لیپرسینێ، مە هێلێن گەرم یێ چاڤدێریا بازرگانی هەنە و هەر وەلاتیەكێ هەست ب ڤێ چەندێ كر نەحەقی هەمبەر هاتیەكرن د دەمێ كڕینا كەلوپەلان دشێت پەیوەندیێ ب چاڤدێریا بازرگانی بكەت و ل گۆرەی قانوونێ دێ سەرەدەری دگەل فرۆشیاران هێتەكرن و رێنمایی و قانوون هەنە بۆ هەر زێدەگاڤیەكێ د ناڤا بازاڕی دا.
