چو مەترسی ل سەر دەڤەرێن گەشتیاری ل زاخۆ نەماینە
زاخۆ، عەلی حاجی:
رێڤەبەرێ گشتی یێ گەشتوگوزارێ ل ئیدارەیا سەربخوە یا زاخۆ د كۆنفرانسەكێ رۆژنامەڤانی دا ئامارا هاتنا گەشتیاران د جەژنا قوربانێ دا ڕاگەهاند و دبێژیت: دێ باتیفا كەینە ئێكەم دەڤەرداریا گەشتیاری ل سەر ئاستێ ئیراقێ.
چیا ئەمین، رێڤەبەرێ گشتی یێ گەشتوگوزارێ ل زاخۆ گۆت: «د هەر چار رۆژێن جەژنا قوربانێ دا 54 هزار و 233 گەشتیاران ژ ناڤەراست و باشوورێ ئیراقێ سەرەدانا ئیدارەیا سەربخوە یا زاخۆ و هاڤینگەهێن وێ كرینە، هەمبەر سالا بۆری هاتنا گەشتیاران كێمتر بوویە، ئەڤە ژی بۆ روودانا گوندێ پەرەخێ یا سالا بۆری ڤەدگەڕیت و هەتا نوكە ژی كارتێكرنا وێ مایە، پشتی زاخۆ بوویە ئیدارەیا سەربخوە، رێژەیا هاتنا گەشتیاران بەر ب زێدەبوونێ یە و ئەم پێشبینی دكەین، د ئەڤ سالە دا ١٦٥ هزار گەشتیار قەستا هاڤینگەهێن زاخۆ و باتیفا بكەن، ب پشتەڤانیا بەردەوام یا مەسرور بارزانی، سەرۆكێ حوكمەتا هەرێما كوردستانێ نوكە چو مەترسی ل دەڤەرێن گەشتیاری ل سنوورێ ئیدارەیا سەربخوە یا زاخۆ نەماینە و هێلەكا ئەمنی ل وان دەڤەران هاتیە دروستكرن».
گۆتژی: «ب پشتەڤانیا بەردەوام یا گوهدار شێخۆیی كەرتێ گەشتیاری ل دەڤەرێ باشتر بوویە، دیسا پڕۆژەیێن نوو ژی وەكریە رێژەكا زۆر ژ گەشتیارێن ناڤخوە بەرێ خوە بدەنە زاخۆ و د پلان دایە ژی پڕۆژەیێ كۆڕنیشێ زاخۆ ببیتە درێژترین و ئێكەم پڕۆژەیێ گەشتیاری ل سەر ئاستێ ئیراقێ».
چیا ئەمین ل دوماهیێ گۆت: «پلان هاتیە دانان كو دەڤەرداریا باتیفا ببیتە ئێكەم دەڤەرداریا گەشتیاری ل سەر ئاستێ ئیراقێ و ڤەژەنەكا باش ب خوەڤە ببینت».
