چو وەلاتیەكی ب كۆلێرایێ گیانێ خوە ژ دەست نەدایە
هەولێر، قائید میرۆ:
وەزیرێ ساخلەمیێ ل حوكمەتا هەرێما كوردستانێ خویا كر، هەتا نوكە 30 حالەتێن كۆلێرایێ هاتینە تۆماركرن، لێ چو وەلاتیەكی ژ ئەگەرێ نەخۆشیا كۆلێرایێ گیانێ خوە ژ دەست نەدایە، پێدڤیە وەلاتی د دەمێ زكچوونێ دا سەرەدانا نەخۆشخانە و نۆشدارێن بسپۆر بكەن ب مەرەما وەرگرتنا چارەسەریێ.
دكتۆر سامان بەرزنجی، وەزیرێ ساخلەمیێ د كۆنفڕانسەكێ رۆژنامەڤانی دا دیار كر، هەتا نوكە ل سەرانسەری هەرێما كوردستانێ 30 حالەتێن كۆلێرایێ هاتینە تۆماركرن، لێ چو وەلاتیەكێ هەرێما كوردستانێ ژ ئەگەرێ نەخۆشیا كۆلێرایێ گیانێ خوە ژ دەست نەدایە و گۆت: «داخوازێ ژ وەلاتیان دكەین د دەمێ پەیدابوونا حالەتێن زكچوونێ دا سەرەدانا نەخۆشخانە و نۆشدارێن بسپۆر بكەن، داكو چارەسەری بۆ بهێتە كرن».
گۆتژی: «هەتا نوكە 20%ێ یا حالەتێن زكچوونێ ل نەخۆشخانەیێن حوكمەتێ بۆ پشكنینا كۆلێرایێ هنارتن و دیاركرنا رێژا هەبوونا كۆلێرایێ ل سەر بنەمایێ وان پشكنینایە یێن ل تاقیگەهان دهێنە كرن و پشتڕاستكرن، بەلێ رێژەیەكا زێدەتر یا كۆلێرایێ د ناڤا وەلاتیان دا هەیە و بەلاڤبوویە».
