چو ڤیتامین و خوێ د ماوێ دوگیانیێ دا د گرنگن بۆ ژنێ؟
ئه‌ڤرۆ نيوز:
د ماوێ دوگیانیێ دا ژن پێدڤی ب ھەموو ڤیتامین و خوێ یێن کانزای دبیت داکو زارۆیەکێ ساخلەم و دوور ژ کێماسیان ببیت، بەلێ ھندەک ژن ھەنە ب زەحمەت دشێن پێدڤیا خۆ ژ ئاسنی و کالسیومی و ترشیێ فولیک دناڤ خوارنێ دا دابین بکەن، لەورا شیرەتان ل وان دکەین کو ب رێکا تەڤاڤکەرێن خوارنێ و ل دووڤ شیرەتێن نوشداری ئەو وان ژێدەران دابین بکەن.
د ھەیڤێن ئێکێ دا و ژبەرکو چ گرانی ل سەر ژنێ نینە، لەورا ئەم شیرەتان لێ دکەین خوارنێن پری ھێز و پرۆتین بخۆت، بەلێ پێدڤیە ترشیێ فۆلیک بخوت ھەر دەمێ ژنێ پلان دانا بۆ دوگیانیێ و ھەتا دووماھیا ھەیڤا سێ ژ دوگیانیێ پێدڤیە گرنگیێ ب خوارنا خۆ و ژێدەرێن پروتینی و ھێزێ بدەت داکو ھەست ب ھەبوونا زارۆیی بدەت.
باشترە ژن گرنگیێ ب خوارنا گوشتێ سۆر بدەت ژبەرکو ئەو پێدڤیە بۆ وەرارا زارۆیی، ب مەرجەکی کو یێ ڤالا بیت ژ بەزی ژبەرکو بەز زێدەھیەکا بێ رامان و نە پێدڤی ددەتە لەشێ ژنێ، ھەروەسان خوارنا ماسی و مریشکا و مێلاکێ و ھێکا گەلەک پێدڤیە وەکو ژێدەر بۆ دابینکرنا پرۆتینی، ھندی روین دناڤدا یێ کێم بیت ھەلبەت باشترە، ھەروەسان ئەم شیرەتان ل ژنا دوگیان دکەین کو رۆژانە ب رێکا خوارنا کەلیکان بشێت پرۆتینان بۆ لەشێ خۆ دابین بکەت.
ھەکە سەنگێ ژنێ یێ زێدەنەبیت دشێت رۆژانە سێ کوپێن شیری یێن کێم روین یان بێ روین ڤەخوت، ھەکە سەنگێ وێ یێ کێم بیت ژی دشێت رۆژانە شیرێ تێر روین و ماستی و پەنیری ب کاربینیت، دەربارەی ڤیتامینان ژی رۆژانە سێ دانێن زەرزەواتان و سێ دانێن فێقی یێن رەنگاو رەنگ دێ پێدڤیێن وێ دابین کەت، و سەبارەت ھێزێ ژی پێدڤیە ژنا دوگیان رۆژانە شەش جاران کەرستێن نشایێ بخۆت داکو سەنگێ خۆ ب پارێزیت.
