چیایێن زاوا و سپی دێ هێنە كەسككرن
رێڤەبەرێ دارستان و پاوانێن پارێزگەها دهۆكێ دیاركر، دەست بجهئینانا پڕۆژەیێ كەسككرنا چیایێن (زاوا و سپی) كو دكەڤنە دەردۆرێن باژێڕێ دهۆكێ دێ هێتە كرن، ئەڤ پڕۆژە ب گاڤەكا ستراتیژی بۆ بەرفرەهكرنا رووبەرێ كەسكاتییێ و بەخشینا روویەكێ جوانتر بۆ باژێڕێ دهۆكێ دهێتە دانان.
كاوە سەبری، رێڤەبەرێ دارستان و پاوانان ل دهۆكێ بۆ رۆژنامەیا ئەڤرۆ گۆت: «پڕۆژەیێ كەسككرنا هەردو چیایان دێ مفایەكێ زۆر بۆ باژێڕێ دهۆكێ هەبیت و دێ گوهۆڕینێن مەزن ل رێژەیا كەسكاتییێ دروست كەت و دێ بیتە ئەگەرێ نزم بوونا پلەیێن گەرمێ و پاككرنا هەوایێ دهۆكێ«.
كاوەی گۆتژی: «ل دهۆكێ 145 باخچەیێن بچووك و 10 پارك هەنە و ب دووماهی هاتنا هەردو پاركێن ئالۆكا و سەرهەلدان و كەسككرنا هەردو چیایێن (زاوا و سپی) دێ رێژەیا كەسكاتییێ ل دهۆكێ ژ 20% زێدەتر لێ هێت».
