چیرۆكه‌كا دوهى د هه‌مبێزا ئه‌ڤرۆ دا
به‌رى 20 سالان، ده‌مێ un دۆرپێچا ئابوورى ل سه‌ر عیراقێ ده‌یناى، پشتى وه‌لاتێ كوێتێ داگیر كرى، عیراقێ ژى زێده‌بارى دۆرپێچا جڤاكێ نێڤده‌وله‌تى، دۆرپێچا ئابوورى ل سه‌ر هه‌رێما كوردستانێ ده‌ینا، هه‌ڤاله‌كێ من سه‌رهاتیا هه‌ڤاله‌كێ خوه یێ بازرگان بۆ من ڤه‌گێڕا؛ ده‌مێ ژ به‌ر ترسا دكتاتۆرى ژ به‌غدایێ ره‌ڤى و خوه گه‌هاندیه هه‌رێما كوردستانێ. نیڤشكێ سه‌رهاتیا وى بازرگانێ مه‌زن و هنده‌ك هه‌ڤالێن وى یێن زه‌نگین دگه‌ل سه‌دام حسێنى، ژ كیس ده‌ڤێ هه‌ڤالێ من: ((پشتى دۆرپێچا ئابوورى ل سه‌ر عیراقێ گه‌هشتیه گوپیتكێ و چو گه‌شبینى بۆ راكرنا وێ نه‌مایى و ئاستێ هه‌ژاریێ و نه‌داریێ، تاوانا رێكخستى، لاوازبوونا ره‌وشتى، به‌ربه‌لاڤبوونا دزیێ و گه‌نده‌لیێ ل عیراقێ گه‌له‌ك زێده بووى، وى بازرگانێ مه‌زن و هنده‌ك هه‌ڤالێن خوه بۆ ((سه‌دام حسێنى)) پێشنیار كر كو ئه‌و ژ كیستێ خوه ئاهێن خوارنێ بده‌نه خه‌لكێ عیراقێ، ژ به‌ر كو ده‌وله‌ت د بن باره‌ك گرانڤه دنالیت و شیان نینن ئێدى ئاهێن خوارنێ بده‌ته گه‌له‌كى ژ 28 ملیۆنان پتر پێكهاتى… سه‌ددامى پشتى دیداره‌كا كورت دگه‌ل وان كرى، ئه‌و هنارتنه ده‌ڤ كوڕێ خوه یێ مه‌زن ((عوده‌ى)) داكو ئه‌و ب كارێ وان رابیت. پشتى سه‌عه‌ت هه‌شتى سپێدێ گرۆپێ بازرگانێن مه‌زن ل پرسگه‌ها ((عوده‌ى)) ئاماده بووین، هه‌تا مه‌غره‌ب برسى و تێهنى ل هیڤیا وى ماین، سه‌عه‌ت هه‌شتى شه‌ڤ رێك دایێ كو وى ببینن! پشتى ب خێرهاتنه‌كا ب قه‌شمه‌رى ب وان كرى، ((عوده‌ى)) ل به‌ر چاڤێن وان ب تنێ ژ سفره‌كا خوارنێ یا كو تێرا گه‌له‌ك مێهڤانان بكه‌ت، وه‌ك نه‌ریته‌ك عه‌ره‌بى، ب ده‌ستان كه‌ته سه‌ر و خوار… پاشى ب كه‌نی ڤه گۆته وان: “هه‌كه (والدى) بابۆى نه‌گۆتبا وى: “ئه‌و هنده‌ك خێراخوازێن عیراقێ هاتن ئه‌مانه‌تى ته نه” نها سه‌یێن برسى دا گوشتێ هه‌وه خۆن!” هه‌ر ل دووڤ گۆتنا هه‌ڤالێ من: ((پاشى ((عوده‌ى)) ب دژوارى گه‌ف ل وان كرن و خه‌به‌ر گۆتنێ و لێ زێده كر: ((هوین هزر دكه‌ن ئه‌م نه‌شێن ئه‌رزاقى ب ده‌ینه خه‌لكێ عیراقێ؟! بۆ زانینا هه‌وه، مه هزرا دانا ئه‌رزاقى بۆ گه‌له‌ك سالێن ته‌نگاڤیان كریه، هندى حیسار درێژ ببیت، ئه‌م دشێن باشتر ژى بده‌ینه خه‌لكى، لێ خه‌لكه‌ك وه‌ك خه‌لكێ عیراقێ دو روو و جه‌بان دڤێت هوسا ته‌عامل دگه‌ل بهێته كرن، هه‌كه دێ به‌تران بن! دێ زوو وه‌لى ببن، ئێدى وه نه‌بینم)). چیرۆكا ل سه‌رى مه كورتیا وێ بۆ خوانده‌ڤانێ خوه‌شتڤى ڤه‌گێڕاى، دیار دكه‌ت كو ده‌ستهه‌لاتا مه ژى ب سه‌ر سایكۆلۆجیا خه‌لكێ هه‌رێمێ هه‌ل بوویه. پشتى زانى خه‌لكه‌ك ته‌مبه‌ل و به‌تران بوویه و ئه‌زمان درێژێن ده‌ستكورتن، ململانا حزبى، نزمبوونا بهایێ په‌ترۆلێ و شه‌ڕێ داعشێ بوو وان بوونه باشترین هێجه‌ت كو ب ده‌لیڤه ببینن فه‌رمانبه‌رێن هه‌رێمێ ئه‌وێن وان ب خوه پرانیا وان ب رێكا حزبیاتى و مرۆڤكانێ (محسوبیه) كرینه بن دیوار بێخنه ژێر گڤاشتنا ئابوورى و فه‌رمانبه‌رێن شه‌رعى ژى د ئاگرێ وان دا بسۆژن و مووچه‌یێن هنده‌كا ژ وان ژ نیڤى ژى كێمتر لێ بكه‌ن، داكو وه‌ك وان بڤێت بكه‌ن. راسته ده‌ستهه‌لات دبێژت قه‌یرانه و ده‌ینداریه و مووچه نینن، لێ نه‌بوونا زه‌لالیێ (شه‌فافیه‌تێ) د فرۆشتنا په‌ترۆلا هه‌رێمێ دا به‌لگه‌یه‌كێ به‌رچاڤه كو وه‌سا نینه وه‌ك ب رێكا راگه‌هاندنێ ئاشكرا دكه‌ن. واته مه‌ره‌مێن سیاسى ژ بۆ دانا مووچه‌یێ كێم و پاشكه‌ڤتى و نیمچه راوه‌ستاندنا پرۆژه‌یێن خزمه‌تكارى هه‌نه و هندى خه‌لكێ هه‌رێمێ هشیارى و ئیراده‌یا قوربانى دانێ نه‌بیت، دێ د ڤێ ره‌وشێ دابن و گازنده و ئاخڤتنێن به‌ر دیواران دێ د كیستێٍ جڤاكى مینن و تۆڕێن دزیكه‌ر و مافیان دێ به‌رفه‌رهتر لێ هێن و كاروانێ ده‌وله‌تێ دێ پتر گیرۆ بیت.
