چین رۆبۆته‌كێ ب مەژیێ مرۆڤان به‌رهه‌م دئینیت
ڤه‌كۆله‌رێن چینی رۆبۆته‌ك به‌رهه‌م ئینایه، شانه‌یێن مێشكێ مرۆڤان بۆ بكار ئیناینه و ب رێیا وان شانه‌یان فێری كونترۆلكرنا كار و ره‌فتاران دبیت.
د ڤێ ڤه‌كۆلینێ دا یا كو ل كۆڤارا بره‌ین یا زانكۆیا ئوكسفورد یا بریتانی هاتیه به‌لاڤكرن، ئه‌ڤ رۆبۆته ب خوه شیایه ل دووڤ ئارمانجێن بۆ هاتینه دیاركرن بچیت و ئه‌و ئاسته‌نگێن دكه‌ڤنه د رێیا وی دا نه‌هێلیت و كونترۆلێ ب ده‌ستێن خوه دكه‌ت بۆ گرتنا تشان.
ئه‌ڤ رۆبۆتێ ب ناڤێ «وێت وێر» كو ژ كورتكریا ناڤێ ئاڤ و سوفت وێر هاتیه وه‌رگرتن، كو پارچه‌كا ناڤێ وی ژ ئاڤێ و ئێك ژ ئامیرێن ئه‌لكترۆنی مه‌ره‌م پێ تێكهه‌لكرنا شیانێن مرۆڤان و ئامیران پێكڤه‌یه.
ئه‌ڤ ڤه‌كۆله‌ره د گه‌شبینن كو د پاشه‌رۆژێ دا، دشیان دایه ئه‌ڤه ببیته ئه‌گه‌رێ چاره‌سه‌ریا نه‌خۆشیێن مێشكی ل ده‌ف مرۆڤان ب تایبه‌ت بۆ نه‌خۆشێن تووشی جه‌لتا مێشكی دبن ب رێیا شانێن مێشكی و چاندنا وان خانه‌یێن ژناڤچوویی.
ڤان ڤه‌كۆله‌ران د ڤێ ڤه‌كۆلینێ پشت به‌ستن ل سه‌ر پێلێن سه‌رده‌نگی یێن نزم ل سه‌ر مێشكێ مرۆڤی كرینه و د رۆبۆتی دا داناینه، دیار بوویه ڤان پێلان هاریكاریا رۆبۆتی كریه د چاره‌كرنا خانه‌یێن ژناڤچوویی یێن مشكی دا.
پێشتر ل سالا 2008ێ ژی كاره‌كێ ژ ڤی ره‌نگی هاتبوو كرن ل سه‌ر رۆبۆته‌كی ب ناڤێ گوردون كو ژ لایێ ڤه‌كۆله‌رێن بریتانی ڤه هاتبوو ئه‌نجام دان، به‌لێ یێ وان مێشكێ مشكی هاتبوو بكارئینان، نه‌یێ مرۆڤان. مه‌ره‌م ژی پێ بۆ وێ چه‌ندێ بوو بزانن چاوان بیرهاتنان ل ده‌ف مرۆڤان هه‌لبگرن و ئه‌ڤێ چه‌ندێ ژی مه‌ره‌م پێ رزگاركرنا مرۆڤان بوو ژ نه‌خۆشیێن وه‌كو پاركنسون و زه‌هایمه‌رێ.
نها هنده‌ك ل ئه‌مریكا ژی ڤه‌كۆلینێ ل سه‌ر ڤی بابه‌تی دكه‌ن و بزاڤێ دكه‌ن بزانن كا دێ چه‌ند شێن ئه‌ڤان شانێن مێشكێ مرۆڤی هێلنه ساخ د ناڤ رۆبۆتی دا و چه‌ندین پرۆژێن دژی د ڤی واری دا هه‌نه كو نه‌شێین د بابه‌ته‌كێ كورت یێ ژ ڤی ره‌نگی دا هه‌موویان به‌حس لێ بكه‌ین.
