چیڕۆكێن گەلەك كورت
رەوانێ بابلا
ڕەشبینی
(1)
كەتە د بنێ بیرێ دا، وەریسەك ب تایبەت پێخەمت وی ژۆردا هاتە خوارێ، لێ شوینا خۆ پێ رزگار بكەت، بزاڤ كر خۆ پێ بخەندقینیت، لێ مەرەقا هندەك تاقیكرنێن دی یێن وی د ژیانێ دا بوو رێگر.
(2)
د هەر هەلكەفتنەكا دلخۆشكەر دا، ئەنیا وی یا گرێ و ناڤچاڤێن وی یێن بوغمی رێژەیا چێژوەرگرتنا ئامادەبوویان د خوینا واندا نیڤی دكەت.
(3)
“شۆبنهاوەر” ە، لێ نە د داهێنانێ دا.. “ سیۆران “ە، لێ نە نڤیسینا ژبەر نەخەوهاتنێ.
(4)
ژبەر ئەوێ رەشبینیا ئەو بۆ ژیانێ هەدلگریت، تشتەك سپی نەمایە د ژیانا ویدا ژ بلی پرچا سەرێ وی.
(5)
ل بەر دەرگەهێ گڕنژینەكێ راوەستیا، چ نەمابوو ژ بازنێ سروشتێ خۆ دەرگەڤیت، لێ ترسەكێ هناڤێن وی گرت، دجهدا رەڤی و خۆ د قولاچەكا گازندەیاندا ئاسێ كر.
(6)
ئەو هەمی تشتی وەكو پیلان دبینیت، خۆ بارینا بارانا هەتا بگەهیت گەرما چلێ هاڤینا، جارەكێ گۆت: ما كی نابێژیت هەبوونا مە ل سەر ڤی ئەردی نە پیلانەك؟!
(7)
تشتەك نەهێلا ب ئاسۆیێن بەرفرەهـ بمینیت، واسواسێن وی تێنەبن.
(8)
گەلەك نەژیا، بەلكو هەما ڤەبڕ نەژیا، لێ هەمجا هندەك رۆژ و شەڤ دیتن، دبێژن ئەوی ب پەقینا گەشبینیەكێ گیانێ خۆ ژدەستدا.
(9)
پشتی مری، ل دویڤ وەسیتنامەیا وی، ل سەر گۆڕێ وی هاتبوو نڤیسین:
“ئەگەر ئەز یێ شاش بام، دووماهیكا من دڤێ تەنگە چالێ دا نەبوو”.
