چیڕۆكێن گەلەك كورت
حەیات ئەلیاقۆت
كوردیكرن: رەوانێ بابلا
هەڤالینییا هەڤدژان
پەلەك ل سەر پارچەیەكا جەمەدێ دانان و چاڤەرێ مان، بەرەڤاژی یا چاڤەرێ، چو تشت ل هەردویان نەهات، پەل نە ڤەمری و جەمەد ژی نە حەلیا!
توندڕەوی فاكتەرێ ئێكانە یێ دناڤبەرا واندا هەڤپشك بوو، و ئەو – بخوە – فاكتەرێ پیكڤەژیانێ بوو. هەڤسۆزبوون، پاشی پێكڤە رازی بوون، و هەر ئێك ژ هەردویان زیانا گەهاندنا یێ دیترێ نەكر.
خاپاندن
وەردەكا كرێت مەزن بوو و نە بوو كەراڤییەكا جوان وەكو چیڕۆك دبێژیت، ل دوماهیێ نەچار بوو كۆمەكا نشتەرگەریێن جوانكاریێ ئەنجام بدت.
راگەهاندنا هەتكان
كۆپەكی كریستالێ گرانبها د گەڕەكا پیس دا نقۆكر. دەمێ ژنا وی لێ حەیتاندی، وی گۆتێ: ئەز دێ ڤی كۆپی كەمە د دیرۆكێ دا، ژبەركو راگەهاندن ل ڤی سەردەمی بەرێ خۆ نادت كریستالێ ئەگەر ب هەڕیێ نە لەوتت.
وەبەرهێنانا سەردەم
چەند ملیارەكێن دی ل سامانێ وی زێدەبوون، تو بێژی ئەڤ د چ كەرتی دا كار دكت، تەلفۆنا خوە راكر و پەیوەندی ب شیرەتكارێ خوە كر وژێ پرسیاركر: مەزنترین پیشەسازی د جیهانێ دا نوكە چییە؟ بەرسڤا وی ب پشتراستبوونەكا مەزن دا: چێكرنا ئاشۆپی.
گوهۆڕینا جینی
ل ڤی سەردەمی شیعر نە مریە بەلكو بوویە پەخشان.
واتایا نەرمیێ
پلانا كۆمپانیێ خواند، هەردو پەیڤێن «ئارمانج» و «مەبەست» ژێبرن، بۆ وێ دو پەیڤێن گران بوون، شوینا وان «خەونێن من» و «هیڤیێن من « دانان.
ئاكنجیێی دۆزەخێ
زارۆكەكێ پرسیارا داپیرا خوە كر: بۆچی ژنك پرانیا ئاكنجیێن دۆزوەخێ نە؟
داپیرێ ب ساریەكا تامدای ب باوەریەكا ڕها بەرسڤ دا و گۆت: ئەڤە سروشتی یە، ژبەركو ئێك زەلامەكێ چەپەلێ خرابكار دشێت ب كێماسی پێنجی ژنان سەردا ببت.
