چێلسی و یۆڤانتۆس هه‌مبه‌ری دو ئاسته‌نگێن چڕ
ئه‌ڤرۆ،
چاڤه‌ڕێ دهێته كرن ئه‌ڤرۆ ل ده‌مژمێر 11ێ شه‌ڤێ دو یاریێن دی ژ چارچووڤێ هه‌ڤڕكیێن گه‌ڕا 16ێ و چوونێ ژ قاره‌مانیا یانێن ئۆرۆپا قاره‌مانێن خولایا ته‌پا پێی بهێنه ئه‌نجامدان.
چێلسی- لیل
یاریگه‌ها ستامفۆرد برێدچ دێ مێڤانداریا خودانێن ئه‌ردی و جه‌ماوه‌ری یانا چێلسی یا ئنگلێزی و مێڤانا وێ لیل یا فره‌نسی كه‌ت، چێلسی قاره‌مانا وه‌رزێ بوری دێ بزاڤێن مه‌زن كه‌ت د ناڤ ئه‌ردێ خوه دا نه بتنێ سه‌ركه‌فتنێ تۆماربكه‌ت به‌لكۆ رێژا گۆلان زێده‌كه‌ت پێخه‌مه‌ت یاریا دویێ دا بێ گڤاشتن بیت ژبۆ ده‌ربازبوون بۆ قۆناغا هه‌شتێ و پاراستنا ناسناڤێ چامپیۆنزێ، هه‌مبه‌ری وێ ئه‌ركێ یانا فره‌نسی ب سانه‌هی نابیت ئه‌وا پشتی 15 سالێن دووركه‌فتنێ دووباره گه‌هشتیه ڤێ قۆناغێ و باش دزانین هه‌ڤڕكا وێ بهێزترین به‌ربژارێ ناسناڤی یه و یا چه‌گ كریه ب باشترین یاریزان و راهێنه‌ر و جه‌ماوه‌ر، له‌ورا ده‌ستڤه ئینانا خاله‌كێ ژی هیڤیێن وێ دێ مینت پێخه‌مه‌ت دناڤ یاریگه‌ها خوه دا بشێت و هیڤیێن ئه‌نجامه‌كێ دیرووكی تۆماربكه‌ت ، پشتبه‌ستنا راهێنه‌رێ یانا ئنگلێزی تۆماس توخێل دێ ب شاره‌زاهی و شیانێن هه‌ر ئێك ژ گۆلپارێزێ خوه ئێدوار میندی، هێلا به‌ره‌ڤانیێ ئه‌نتۆنیۆ رۆدرێگێر، تیاگۆ سێلڤا، ئه‌ندریاس كریستینسن، هێلا ناڤین ماركۆ ئالۆنسۆ، ماتیۆ كۆڤاتیچ، جورجینیۆ، سیزار ئازبلكۆیتا، یێن هێرشبه‌ر ماسۆن مۆنت، رۆمێلۆ لۆكاكۆ و حه‌كیم زیاش، هه‌مبه‌ری وێ لیل ب سه‌ركێشیا راهێنه‌رێ خوه جۆزه‌لین گۆرفنیك ئه‌وێ بڕیاردایی ب ئێك هێرشبه‌ر و پلانا به‌رگریێ ب پێنچ یاریزانا هه‌مبه‌ری خودانێن ئه‌ردی بیت، لدووڤ ئامارێن یاریا بتنێ دو جارا هه‌مبه‌ری ئێك بووینه ل وه‌رزێ 2019-2020 دسیسته‌مێ كۆما دا و یانا چێلسی سه‌ركه‌فتن تۆماركرینه.
ڤیاریال – یۆڤانتۆس
د یاریا دویێ ژ چارچووڤێ چامپیۆنزێ ئه‌وا دێ ئه‌ڤ شه‌ڤه هێته ئه‌نجامدان یانا یۆڤانتۆس یا ئیتالی دێ بیته مێڤانا یانا ڤیاریال یا ئسپانی ل یاریگه‌ها لاسیرامیكا، یانا ئیتالی داخوازكریه جه‌ماوه‌رێ خوه ئاشتبكه‌ت بكه‌ت تایبه‌ت پشتی هه‌لوه‌ستێ وێ د خولا ئیتالیا بۆ ناسناڤی لاواز بووی و ژ هه‌ڤڕكیێن رێزا ئێكێ دووركه‌فتی دێ زێده‌تر هزر ل چامپیۆنزێ كه‌ت و ده‌ستڤه‌ئینانا سه‌ركه‌فتنێ به‌ری دیدارا دویێ دناڤ یاریگه‌ها خوه دا ژبۆ پلێتا ده‌ربازبوونێ مسۆگه‌ربكه‌ت، نه پشكداریا هه‌ردو ستێرێن وێ یێ ئه‌رجه‌نتینی پاولۆ دیابالا و رۆجانی ژبه‌ر هنگافتنێ دێ ڤالاتیه‌كێ دناڤ یاریگه‌هێ دا په‌یداكه‌ن، لێ هه‌ر ئێك ژ یاریزانێن وێ ئالفارۆ مۆراتا، دۆشان فلاهۆڤێچ، لۆكاتێلی، رابیۆ، مكێنی، زه‌كه‌ریا،دی لێخت، كوادرۆادو، چێلینیۆ به‌رهه‌ڤن بۆ ڤێ یاریێ، ژلایێ خوه‌ڤه یانا ڤیاریال ژی د كۆپیتكا ئاستێ خوه دایه تایبه‌ت پشتی ئه‌نجامێن سه‌ركه‌فتی د خولا ئسپانیا دا هه‌روه‌سان پشتی بۆرینا 13 سالان بۆ جارا ئێكێ پشكداری قۆناغا 16ێ دبیت و راهێنه‌رێ وێ ئنایی ئیمری خودان هیڤی و ئارمانجێن مه‌زنه و هه‌مبه‌ری دیرووكه‌كا نوو یه و دێ پشتبه‌ستن ب جیۆڤانی لوسێلسیۆ، جیرۆینڤێلد، باریخۆ، راوول ئه‌لبیول وئیبۆاری و پارێخۆیی كه‌ت.
