چەكۆ
فەرهاد حاجی باڤی
دەما ئەم زارۆك و مامۆستایێ هونەری دگۆتە مە:
– وێنەیەك سروشتی نیگار كن.
مە هەموویان چیا، ڕووبار و دارستانێن كوردستانێ نیگار دكرن، چەكۆیێ هەڤالێ مە وێنەیێ كلاشنكۆفێ نیگار دكر، هەرچەندە وێنەیێ برنۆیێ دیار دكر.
ل سنێلەییێ مە وێنەیێن یاریكەرێن فتبۆلێ دكڕین، و كۆم دكرن و ناڤێن وان ژبەر دكرن، چەكۆی تفەنگێن داری چێدكرن، و ناڤێن پرانییا چەكان دزانی.
ئەم مەزن بوون، هندەك ژ مە بوونە فەرمانبەر، هندەك بوونە پێشمەرگە و هندەك بوونە نڤیسەر و چەكۆی بازرگانییەكا سڤك ب چەكی دكر، و هندی پێشمەرگەیەك ل تاخێ مە چەكێ وان بێ بەرانبەر پاقژ دكر، و هێشتا وەغەر و مرنا مە نەهاتی، چەكۆی گیانێ خوە ژدەستدا، گاڤا تفەنگا زبۆیێ پسمامێ خوە پاقژ دكری، گولەیەك ژ چەكی ڤەرست و ب كەفچكا مێلاكا وی كەڤت.
