چەكێ ئەڤرۆ بتنێ زانستە و مللەت ب زانین و خواندنێ پێش دكەڤن
دیدار، سالار محەمەد دۆسكی:
پێشمەرگەكێ شۆرەشا گولانا پێشكەفتنخواز داخوازێ ژ گەنجان دكەت، زێدەتر بەرەف خواندن و زانینێ بچن و چەكێ ئەڤرۆ بتنێ زانستە و مللەت ب خواندن و زانینێ پێش دكەڤن، زێدەتر ژی دبێژیت بۆ چ كەسان چ نەبوویە روینشتی و هەر هەمی مرۆڤان ماندیبوون دیتی یە و تەناهی و خوەشیا ئەڤرۆ بەرهەمێ خەبات و بەرخودانا پێشمەرگە و هەمی مللەتێ كوردە، و دڤێت وەك چاڤێ خوە ب پارێزین.
پێشمەرگەیێ شۆرەشا گولانێ عەبدولعەزیز رەشید محەمەد وەرمێلی، د دیدارەكێ دا بۆ رۆژناما ئەڤرۆ گۆت: پشتی نسكۆیا سالا 1975 و كاودانێن سیاسی ل دەڤەرێ تێكچووین، و خەلكێ مە هندەك چووینە ئیرانێ و هندەك چوونە توركیا و هندەك مانە ل ئیراقێ، و ئێدی حوكمەتا بەعس ژی ئەو هزر كر كو چ شۆرەشێن كوردی ساخ نابنە ڤە، و ئێدی دێ دەستهەلاتێ ل ئیراقێ كەت هەر ژ بەسرا هەتا زاخۆ و هزر وێ چەندێ دكر، كو هیڤی و ئومێدی خەلكی نەمان، لەوما هەر پشتی ڤێ نسكۆیێ ب چەند هەیڤا چریسكا شۆرەشا گولانێ گەش بوو، و هیڤی و ئومێد بو خەلكی دروست بوونە ڤە، و پێشمەرگە دەركەفت و هێدی هێدی رێكخستنێن پارتی گەش بوونە ڤە، و ئێدی خەلكی هەست ب ئێمناهیێ كر و هەست كر كو ئێدی مللەتێ مە یێ بخودانە.
هەمان پێشمەرگەیێ شۆرەشا گولانێ ئەو ژی گۆت: پشتی شەڕێ هەر دو وەلاتێن ئیراق و ئیرانێ دەستپێكری، ئێدی شیان و چالاكیێن شۆرەشێ ژی بەرفرەه بوون، و گەلەك دەڤەر كەفتە بن كونترۆلا پێشمەرگەیێ كوردستانێ و گەلەك دەڤەر هاتنە ئازادكرن، و كەفتنە بن كونترۆلا پێشمەرگەیێ كوردستانێ و خەلكێ مە ب ئازادی و تەناهی و ئارامی ل گوندێن خوە ژیان دەربازكرن، وی دەمی مللەت ژی گەلەك هاریكار و پشتەڤانێ شۆرەشێ بوو، چونكە پشتی نسكۆیا سالا 1975 خەلكێ مە تهێنیێ وێ رۆژێ بوو و حەز دكر ئەف رۆژە بهێت، و پێشمەرگە ل چیا و دەڤەرێ هاتە دیتن ڤە، دیسا وی دەمی زولم و زورداری یا رژێما بەعس گەلەك مەزن بوو، و گەلەك گڤاشتنێن مەزن ل سەر خەلكێ مە دكرن، و هەتا گەهشتیە ئاستەكێ هەرە بلند و ئێدی خەلك نەشیا دناڤا خێزانێن خوە بژیت، و ئێدی مرۆڤی هەست ب دلتەنگیەكێ دكر، و گەلەك گڤاشتن و دیفچوون ل سەر مرۆڤی هەبوون.
دەسپێكا سالێن هەشتێیان من پەیوەندی ب شۆرەشا گولانا پێشكەفتنخواز كریە، وی دەمی رژێما ئیراقێ یا هار بوو و دەسپێك بوو روودان و چالاكیێن پێشمەرگەی ل دەڤەرێ زێدە ب بوون و گەهشت بوونە ئاستەكێ بلند.
عەبدولعەزیزی هەروەسا گۆت: شەڕێ كەلا شێخوی ل شۆرەشا گولانا پێشكەفتنخواز دهێتە هژمارتن مەزنترین شەڕێ ل وی سەردەمی، و پتر ژ نوت چەكدارێن رژێمێ هاتنە كوشتن و چەندین هاتنە ئێخسیركرن، و دەسكەفتەكێ مەزن كەفتە دەستێ پێشمەرگەیێن كوردستانێ، و پێشمەرگە ب زیانەكا كێم و سەركەفتنەكا مەزن ژ وی شەڕی دەرباز بوون، و مورالەكا مەزن بۆ خلكێ كوردستانێ و دەڤەرێ ب گشتی و پێشمەرگەی دروست بوو، و ئێدی رژێما بەعس ژی هزرەك بۆ هێز و شیانێن پێشمەرگەیێ كوردستانێ كر، و ئێدی نەشیان ل هەمی دەڤەرا ب ئازادی هاتن و چوونێ بكەت، و گەهشتە باوەریەكێ كو ئەڤە عەردێ كوردانە و دڤێت كورد تێدا دەستهەلاتداربن، و گەهشتە وێ باوەریێ كو چ جاران ب تڤەنگێ نەشێتە مللەتێ كورد، چونكە كورد مللەتەكێ ئازا و چاف نەترسن و بۆ ئازادی یا خوە چ جاران بۆ دوژمنی چوك نەچەماندیە، بەلكو یێ بەرهەڤ بوویە، و هەتا نوكە ژی ئەم دبەرهڤین بۆ ئاخ و وەلاتێ خوە گیانێ خوە بكەینە قوربانی، سەخمراتی ئازادی و تەناهی و ئارامی و خوشگوزەریا ڤی مللەتی.
هەمان پێشمەرگە زێدەتر بەحسێ شەڕێ كەلا شێخوی كر و دوپاتكر: هندەك پێشمەرگە وی شەری دا بریندار بوون، و دو برایێن من وی شەری دا هاتنە گرتن ژلایێ حوكمەتا ئیراقێ ڤە و گەلەكێن دی هاتنە گرتن و گەلەك هاتنە ئێشاندن و دیفچوون گەلەك سەر ئەوان هاتەكرن،
پێشمەرگەیێ شۆرەشا گولانێ ئەو ژی گۆت: گەلەك نەخوشی و دەرەسەری و ترس و برس مە دیتی یە، و سێ جاران من مرنا خوە دیتی یە، و دەنگۆباسێ شەهید بوونا من گەهشتیە مال و كەس و كارێن من و سوپاس بۆ خودێ یێ ساخم.
ل دور گەنجێن نوكە ژی هەمان پێشمەرگەیێ شۆرەشا گولانا پێشكەفتنخواز گۆت: ڤی پێشمەرگەی خوە دایە كوشتن و نەخوشی دیتنە و هاتیە گرتن و ئەشكەنجەدان، و ترس و برس دیتی یە و رۆژێن نەخوش بوراندین، و ئەگەر گەنجێن نوكە بێژن نوكە نەخوشە ئەز بێژم وێ رۆژێ نەخوش بوو، و دەمێ گوندێن مە دهاتنە سۆتن و كەس و كار دهاتنە گرتن و پێشمەرگە شەهید و بریندار دبوو، و ئەم رەڤین و ئەڤرۆ بەرهەمێ وێ رۆژێ یە ئەڤرۆ ب تەناهی و ئارامی دژی دبینم چ خوشی وەكی نوكە نینە، ب ئازادی ب ژی و ب ئازادی ب مری، وی دەمی ژیان گەلەك یا بزحمەت بوو و هەتا مرۆڤی ئەرزاقێ ژیانێ دابین دكر گەلەك یا بزحمەت بوو، ئەڤرۆ كە هەمی تشتێ بەر دەستە و بتنێ چەكێ ئەڤرۆ كە بۆ گەنجان و لاوان خواندنە و باشترە مرۆڤ ب خوینت و مللەت و وەلات ب زانین و زانستێ پیێشكەفتی نە، لەوما داخوازێ ژ هەمی گەنجێن وەلاتێ مە دكەم، كو شەڤ و رۆژا بكەنە ئێك سەخمراتی گەهشتنا ئارامانجێن خوە و بلا مللەتێ مە ژی نەزان نەمینت، و پێشكەڤیت و بگەهیتە هەمی هیڤی و ئومێدێن خوە، و هەر بۆ دووماهی یا گەنجان باشە بخوینت و بلا گەنجێن مە دلێ خوە سار نەكەن، بێژن خواندن نوكە چنینە باوەركە خواندن چەكە ل گەل مرۆڤی و هندی مرۆڤێ ساخە مرۆفی پێدڤی ب خواندنێ یە.
ل دووماهیێ هەمان پێشمەرگەیێ شۆرەشا گولانێ گۆت: قوناغا ئەڤرۆ گەلەك یا هەستیار و نازكە، و ئەڤ دەسكەفتێن ئەڤرۆ ب هەروە نەهاتینە بەلكو بەرهەمێ خوینا ب سەدان گەنج و لاوێن مللەتێ میە، لەوما داخوازێ ژ هەمی پارت و ئالیێن سیاسی ل كوردستانێ دكەم، زێدەتر دەستێ ئێكدو بگرن و گیانێ لێبورینێ د ناڤبەرا خوە دا پەیدا بكەن، و ئەڤان دەسكەفتان ب پارێزن .
