چەكێ مە یێ نۆرمال بوو، بەلێ ئیرادە و باوەرییا مە ب دۆزا مللەتێ كورد یا ب هـێز بوو
سالار محەمەد دۆسكی:
1- 3
عەبدولعەزیز سمایل نەبی بابۆخكی دۆسكی، ل سالا 1958 ژ بنەمالەكا كوردپەروەر و نشتیمان پەروەر ژدایك بوویە، دژیانا زارۆكینی یا خوە دا چەند قوناغێن خواندنێ دەربازكرینە، مام و باب پێشمەرگە بووینە، هێشتا ل ژیەكێ گەنج ئەو برایێ خوە خودێ ژێ رازی (ئدریس ئیسماعیل نەبی) دبنە پێشمەرگە ول چەندین قوناغێن نەخوشێن ژیانێ دا و دەربەدەریێ دەربازدكەن.
پێشمەرگەیێ هەر دو شۆڕەشێن ئیلۆنێ و گولانێ، عەبدولعەزیز سمایل نەبی بابۆخكی د دیدارەكێ دا بۆ رۆژنامەیا ئەڤرۆ گۆت: بەری دەست ب هەلگرتنا چەكێ شەرەفێ بكەم گرنگە بۆ دیرۆكێ ئاشكرا بكەم كو بابێ من ئیسماعیل نەبی و مامێ من عەبابەكر نەبی هەر دو پێشمەرگێن شۆڕەشا ئیلۆۆنا مەزن بووینە و رۆلەكێ باش و كاریگەر هەبووینە و ئەڤە بۆ پێنگاڤەك كو حەز و ڤیانا مە بۆ ئاخ و وەلاتێ مە نێزیك و باشتر لێ بهێت و ئەز و برایێ من خودێ ژێ رازی ئدریس اسماعیل ژی ئەم ژی بووینە پێشمەرگە و ل سەر هەمان خەبات و رێباز هاتینە پەروەردەكرن، بیرا من دهێت هێشتا ئەم زارۆك دەمێ پێشمەرگە دهاتنە گوند و ل سەر مالێن گوندی دهاتنە بەلاڤەكرن و هەر مالەكێ چەن پێشمەرگە دا قەست كەنێ و هەر ئەوێ مالێ چ خاربا یان ڤەخواربا دا ئەو پێشمەرگە ژی ب هەمان شێوە ل گەل بن و گرنگە رۆلێ ژنا كورد نەهێتە ژبیركرن و رۆلەكێ مەزن و كاریگەر هەبوو و هەر دەمێ پێشمەرگە هاتبا و هەر دانێ شەڤێ یان رۆژێ با دا ئەو دایك رابیت و خوارن و ڤەخوارنێ و هەتا جلك شوشتنێ و داگرتنا جانتێ پێشمەرگەی هەر هەمیان بۆ دابین كەت و دبینم رۆلێ دایك وخیشكێن مە ژ رۆلێ پێشمەرگەی مەزنتر و كاریگەر تر ژی چونكە ئەوان گەلەك خزمەتا شۆڕەشا كوردی كریە و سەرەرایی پەروەردەكرنا زارۆكێن خوە و دانا نانی بۆ پێشمەرگەی و گرنگە ل هەر جهەكی ئەڤە بهێتە گۆتن و نەهێتە ژبیركرن.
پێشمەرگەیێ هەر دو شۆڕەشێن ئیلۆنێ و گولانێ گۆت: ل سالا 1974 و پشتی دانوستاندێن حوكمەتا ئیراقێ ل گەل سەركردایەتی یا كوردستانێ تێكچووین و حوكمەتا ئیراقێ ژ دانا سوزێن خوە ل گەل مللەتێ كورد لێڤە بووی ئەم وی دەمی ل گەل سەلیمێ ئەسعەد خوشەڤی بووین، و بیرا من دهێت ئە ل چیایێ زاوا بووین و هەتا پشت زالگەهێ ژی د دەستێ پێشمەرگەی دا بوو، و وی دەمی ئەز ل سەر دوشكێ بووم وی دەمی حوكمەتا بەعس هێزەكا مەزن ئینا دەڤەرێ و چەكەكێ گران د دەستی دا بوو، و ئەو چار سال بوو هەمی بەرهەڤی دكرن بۆ بەرسینگرتنا مللەتێ كورد و شەرەكێ مەزن هاتەكرن و مە (18) شەهید دان و چەندین پێشمەرگە بریندار و ژ ئەنجامێ وی چەكێ مەزن كو دەبابە و فرۆكە و هەر چەكەكێ نوو هاتی د دەستی دا بوو، وێ هێزا مەزن مە دەڤەرا خوە بەردا و ئەم پاشڤەزڤرین و چەكێ مەیێ هەرە بهێزێ وی دەمی دوشك و دو تۆپێن 62 ملم بوون و چەكێ وەكی دوشكێ ئەگەر دوار هەبان و رێك هەبان ئەوان ئەو چەك دگەهاندە چیایی و ئەگەر رێكا گرتی با و رێك نەبا مە پێشمەرگەی دانا سەر مللێ خوە و ئەو چەك مە دگەهاندە جهێ پێدڤی و بیرا من باش دهێت پتریا جاران فیشەكێن دوشكێ من هەلدگرتن.
پێشمەرگەیێ هەر دو شۆڕەشێن ئیلۆنێ و گولانێ، عەبدولعەزیز ئیسماعیل نەبی، بەحسێ نەخۆشترین رۆژێن ژیانا خوە یا شۆڕەشگێری كرن و گۆت: نەخوشترین رۆژێن ژیانا من یا شۆڕەشگێریێ شەرێ گەلیێ عەلی بەگێ بوو و حوكمەتێ ب چەكێ مەزن و هێزەكا مەزن یا چەكداران ئەم دورپێچ كرین و ژ هەمی ئالیەكی ڤە ئەم تۆپبارانكرین و ئەم چەند هێز بووین و ژ ئەنجامێ وێ گڤاشتنا مەزن یا ل سەر مە چەندین هەڤالێن مە شەهید بوون و هەمان دەم وەك پێشتر مە ئاماژە پێكری، چەكێ مە گەلەكێ نورمال بوو و بەلێ ئیرادە و باوەری یا مە ب دوزا مللەتێ مە گەلەك یا بهێز بوو و باوەركە مە گۆت كەسەك ژ مە ژ وی شەری قورتال نابیت و گەلەك شەهید و بریندار مەدان و مە گۆت ئەم ب دووماهی هاتین و مە مرنا خوە دیت چونكە شەرێ مان و نەمانێ بوو و خودێ فرسەت دا و ئەم ب هەر حالەكێ هەین شیاین دەربازبین.
