چەندین جادەیێن سەرەكی ل دەڤەرا ئامێدیێ ژ ئەنجامـێ بارانان ژ كار كەفتینە
ئامێدیێ، مەحمود نهێلی:
ژ ئەنجامێ بارینا بارانێن زۆر ل دەڤەرا ئامێدیێ و هریانا ئاخێ ل چەندین جهان جادەیێن سەرەكی ژ كار كەفتینە و هاتنوچوون ب زەحمەت كریە، دیسا بوویە ئەگەرێ ژ كار ئێخستنا هێلا ئاڤێ یا دو ناوچەدارییان.
ئەندازیار ئەڤراز حەسەن، سەرۆكێ باژێرڤانیا ئامێدیێ بۆ رۆژناما ئەڤرۆ دیار كر، ژ ئەنجامێ بارینا بارانێن زۆر، ل گەلەك جهان ئاخ هڕیایە و بوویە ئەگەرێ خراب بوونا جادەیان و گۆت: «سایدەكێ جادەیا سەرەكی یا د ناڤبەرا ئامێدیێ بۆ قەدشێ دا، ل نێزیك سكەی خراب بوویە، هەروەسا ل هەمان جهـ بوویە ئەگەرێ شكاندنا بۆریێن ئاڤێ و ژ كار ئێخستنا هێلا ئاڤا ڤەخوارنێ یا سەرسنكێ و بامەرنێ».
دیار ژی كر، ل نێزیك تۆنێلا ئامێدیێ، ل تاخێ مرێبكا بەردەوام ئاخ و هەری دهێنە د ناڤ جادەیێ و دبیتە ئەگەرێ ئاستەنگیێ بۆ هاتنوچوونێ و گۆت: «ل تاخێ كانیا مالا و جادەیا دچیتە پرا عیسێ بارانێ زیان گەهاندینێ و مەترسی ل سەر هاتنوچوونێ هەیە».
گۆت ژی: «باژێرڤانیا مە ل گەل رێڤەبەرییا سەخبێرییا رێك و پران ل گەل ستافێ پڕۆژەیێ ستراتیژی یێ ئاڤا ئامێدیێ، دێ كاركەین ئەڤ جادە بهێنە چێكرن و جارەكا دی ئاڤا هەردو ناوچەداریێن سەرسنكێ و بامەرنێ بهێتە سەخبێركرن و ئاڤا ڤەخوارنێ بگەهیتە هەردو ناوچەدارییان ڤە و هاتنوچوونا وەلاتیان ل سەر ڤان جادەیان ئاسایی ببیتە ڤە».
