چەندین رێکخستنێن ئەمریکی سەبارەت ب رۆژئاڤایێ کوردستانێ داخوازەکێ ژ بایدنی دکەن
چەندین رێکخستنێن ئەمریکی د نامەیەکێ دا داخواز ژ سەرۆکێ ئەمریکا دکەن نەهێلیت گرۆپێن چەکدار یێن سەر ب تورکیا ئێرشی رۆژئاڤایێ کوردستانێ بکەن و دڤێت ئەمریکی رێگریێ بکەت و هەکە ئێرشێن وان بەردەوام بوون دڤێت ئەمریکا ب توندی تورکیا سزا بدەت.
چەندین رێکخستنێن ئەمریکی یێن وەکو: کۆمەلەیا دۆستایەتیا ئەمریکا- کوردستان، ئێکەتیا سوریانی یا ئەمریکی، هەڤپەیمانیا رۆژهەلاتا ناڤین یا ئەمریکی بۆ دیموکراسیێ، کۆمیتەیا نشتیمانی یا ئەمریکی و ئەرمەنی، تۆرا جڤاکی یا ئسرائیل و ئەمریکا، کۆربەندێ رۆژهەلاتا ناڤین و چەندین رێکخستنێن دی یێن ئەمریکی د نامەیەکێ دا بۆ سەرۆکێ ئەمریکا جۆ بایدنی دیار کرینە کو کوردێن سووریێ نها د مەترسیێ دانە و گرۆپێن چەکدار یێن سەر ب تورکیا رۆژانە ئێرشی دەڤەرێن کوردی ل سووریێ دکەن و تاوانێن مەزن دەرحەق گەلێ کورد دکەن.
رێکخستنێن ئەمریکی ئەو یەک ژی دیار کرینە، کوردێن سووریێ د شەڕێ ل دژی داعشێ دا گەلەک قوربانی داینە و شەڕی بۆ ئازادیا خوە دکەن، لێ پشتی نەمانا رژێما بەشاری نها تورکیا ب هەموو رەنگەکێ کار بۆ ژناڤبرنا کوردان ل سووریێ دکەت، گرۆپێن چەکدار یێن تورکیا پشتەڤانیا وان دکەت بەری نها ژی گەلەک تاوانێن مەزن ئەنجام داینە و دڤێت ئێدی ئەمریکا سنورەکێ بۆ وان گرۆپێن سەر ب تورکیا دانێت.
هەمان رێکخستنان د نامەیا خوە دا ئاماژە ب ڤێ یەکێ ژی کرینە کو دڤێت ئیدارەیا ئەمریکی بلەز رێگریێ ل ئێرشێن گرۆپێن چەکدار یێن سەر ب تورکیا بکەت و رێ نەدەت ئێدی گرۆپێن چەکدار ئێرشی دەڤەرێن کوردی بکەن، تورکیا دڤێت ب رێیا وان گرۆپێن چەکدار کوردان ژناڤ ببەت و ئەو یەک ژی ب چو رەنگەکێ ناهێتە قەبوول کرن و دڤێت ئەمریکا فشارێن خوە ل سەر تورکیا زێدەتر لێ بکەت دا تورکیا نەچار بیت ئێرشێن خوە و گرۆپێن چەکدار بدەتە راگرتن و هەکە تورکیا پێگیر نەبیت ژی دڤێت ئەمریکا ب توندی تورکیا سزا بدەت.
ل ئالیێ دی بەرپرسەکێ وەزارەتا دەرڤە یا ئەمریکا ژی دیار کر ئەڤرۆ دێ وەزیرێ دەرڤە یێ ئەمریکا سەرەدانا ئیتالیا کەت و دێ ل گەل وەزیرێن دەرڤە یێن ئەلمانیا، فرەنسا، ئیتالیا و بریتانیا کۆمبیت و دێ تێدا بەحسێ رەوشا سووریێ هێتە کرن و ئەمریکا دێ داخواز ژ وان وەلاتان کەت دا پێکڤە هەلوەستەکێ هەڤپشک سەبارەت ب پاشەرۆژا سووریێ راگەهینن.
هەمان بەرپرسی ئەو یەک ژی دیار کریە، ئەمریکا ب هەموو رەنگەکێ پشتەڤانیێ ل مافێن گەلێ کورد ل سووریێ دکەت و دڤێت دەستهەلاتا نوو یا سووریێ ژ کوردان و پێکهاتەیێن دی یێن ل سووریێ بهێتە ئاڤا کرن، هەکە تشتەک وەسا نەهێتە کرن ئەمریکا ب چو رەنگەکێ هاریکاریا دەستهەلاتا بهێت یا سووریێ ناکەت و دێ وێ دەستهەلاتێ سزا دەت.
