چەندین فەرماندارێن ئیرانێ ل شامێ هاتنە کوشتن
سوپایێ پاسدارێن ئیرانێ راگەهاند کو ل ئەنجاما ئێرشا فرۆکێن ئسرائیلێ ل سەر ئاڤاهیەکێ ل شامێ چار ئەفسەرێن وان ل گەل هژمارەکا سەربازان هاتینە کوشتن و هژمارەک سەربازێن سووریێ ژی د ئەنجاما وێ ئێرشێ دا هاتینە کوشتن و بریندار بووینە و ئەو دێ ب توندی بەرسڤا ئیرشا ئسرائیلێ دەن.
سوپایێ پاسداران دوهی د داخۆیانیەکێ دا راگەهاند کو فرۆکێن شەڕی یێن ئسرائیلێ ل شامێ ئێرشی ئاڤاهیەکێ کرینە و د ئەنجاما ئێرشێ دا چار فەرماندارێن وان کو وەکو شیرەتکارێن سەربازی ل سووریێ کار دکر هاتنە کوشتن و د ئەنجاما ئێرشێ دا هندەک سەربازێن وان ل گەل سەربازێن سووریێ ژی هاتینە کوشتن و هژمارەک ژی بریندار بووینە.
سوپایێ پاسداران ئەو یەک ژی دیار کریە، کو جارا ئێکێ نینە ئسرائیل ئێرشی هێزێن وان ل سووریێ دکەت و هەتا نها گەلەک ئەفسەرێن وان ل سووریێ ژ بەر ئێرشێن ئسرائیلێ هاتینە کوشتن و ئەو دێ ب توندی بەرسڤا ئێرشێن ئسرائیلێ دەن و نابیت ئسرائیل قانوونێن نێڤدەولەتی بنپێ بکەت.
ل گۆر دەزگەهێن راگەهاندنا ئیرانێ ئێک ژ کەسێن دوهی ل شامێ هاتیە کوشتن ناڤێ وی سادق ئومید زادە یە، ئەو جێگرێ فەرماندارێ گشتی یێ فەیلەقا قودس بۆ کاروبارێن ئێمناهیێ بوویە و دوهی ل سووریێ د ئەنجاما ئێرشا فرۆکێن شەڕی یێن ئسرائیلێ دا ل گەل چەندین ئەفسەرێن دی هاتیە کوشتن.
ئەو یەک د دەمەکێ دایە کو بەری دو رۆژان بنیامین نەتانیاهۆ سەرۆک وەزیرێن ئسرائیلێ د داخۆیانیەکێ دا دیار کربوو، ئیران گرۆپێن چەکدار ل دژی ئسرائیلێ بکار دئینیت و ئەو دێ دربێن کوژەک ل ئیرانێ دەن، چونکی ئیران سەرێ ماری یە و دڤێت دەستێ ئیرانێ ل دەڤەرێ بهێتە کورت کرن.
چاڤدێرێن سیاسی ژی دیار دکەن، پشتی ئێرشا ل سەر شامێ و کوشتنا فەرماندارێن ئیرانێ، تەهران نەشێت ب رەنگەکێ راستەوخوە ئێرشی ئسرائیلێ بکەت و دێ دیسان گرۆپێن چەکدار بکار ئینیت، چونکی ب سالانە ئیران گرۆپێن چەکدار ل دەڤەرێ بکار دئینیت و هەتا نها نەشیایە ب رەنگەکێ راستەوخوە ئێرشی ئسرائیلێ یان ژی هێزێن ئەمریکا بکەت.
ل گۆر باوەریا چاڤدێرێن سیاسی دبیت دیسان حوسیێن یەمەنێ وەکو تۆلڤەکرن ئێرشی گەمیێن بازرگانی ل دەریا سۆر بکەن، یان ژی دیسان ل سووریێ و ئیراقێ گرۆپێن چەکدار هندەک ئێرشان بکەن لێ ئیران بخوە ب رەنگەکێ راستەوخوە چو کارەکێ ناکەت، چونکی ئیران ژی باش دزانیت د رەشا نها دا ئەو نەشێت چو ئێرشان ل دژی ئسرائیلێ بکەت.
بەری نها ژی سەرۆک کۆمارێ ئیرانێ دیار کربوو، ئەمریکا و ئسرائیل کار بۆ لاوازکرنا پێگەهێ ئیرانێ ل دەڤەرێ دکەن، لێ ئیران وەلاتەک بهێزە و چو وەلاتەک نەشێت ئاستەنگیان ل هەمبەر بهێزبوونا ئیرانێ دروست بکەت.
