چەندین كەس سەرا تێكدانا جهێن شوونواری ل ئاكرێ هاتینە دەستەسەركرن
رەمەزان زەكەریا
ل سنوورێ دەڤەرداریێن ئاكرێ و بەردەڕەش هژمارەكا جهـ و پارچە یێن شوونواری هەنە، هندەك هاتینە نوژەنكرن و هندەك جها ژی وەلاتیان دەستكاری تێدا كریە و شكاندینە، هەتا نوكە چەندین كەس هاتینە دەستەسەركرن ل سەر تێكدانا جهێن شوونواری ل دەڤەرێ.
هیوا شەمال، رێڤەبەرێ شوونەوار و كەلەپۆریا ئاكرێ بۆ ئەڤرۆ گۆت: د كەڤن دا كوردستان ب گشتی و دەڤەرداریا ئاكرێ ب تایبەتی لاندكا شارستانیەتێ و پێكڤە ژیانا گشت نەتەوەو ئاینان بوویە، بەڵگەیا سەلماندنا ڤێ ڕاستیێ بوونا چەندین پاشماوێن شوونواری یە وەك (كەلهـ و مزگەفت و كنیشت و كەنیسان…هتد).
ناڤبری گۆتژی: كەلها شوشێ كو چەندین شوونوارێن دێرین ل هەمبێزا خۆ گرتینە دناڤا كەلهێ دا سێ گۆڕ دناڤدا هەنە ئێك ژ وانا شەهید ئوریا (هوریا) یە ئێك ژ سەركردێن لەشكرێ داوود پێغەمبەر (ڕ.خ) ل كەلها شوشێ شەهید بوویە و ب فەرمانا داوود پێغەمبەری هاتیە كەلها شوش، گوڕێ دوویێ (نائلا خاتوون) هەڤژینا ئیسماعیل پاشایێ بادینانە و لسەر كێلا گوڕێ وێ هاتیە كولین و نڤیسین ب زمانێ عەرەبی (هدا القبر المرحومە نائلا خانم زوجە اسماعیل باشا بن بهرام العمادی توفی فی محرم الحرام سنە ١٢٤٤ ). دیارە ژ بەر پیرۆزیا شەهید ئوریای د وێ ژورێ دا هاتیە ڤەشارتن و هندەك ژێدەرێن دی دبێژن ئیسماعیل پاشای دوو هەڤژین هەبوون و نائلا خان یا ئێكێ بوو، گوڕێ سێیێ دیار نینە كا كیە ل وێرێ ڤەشارتی هندەك دبێژن كو خوشكا نائلایێ یە هندەك دبێژن كچا وێیە هندەك دبێژن خزمەتكارا وێیە ئەڤە دیار نیە كا كیە و ئەم نەشێین پەسەند بكەین كا كیە.
ناڤهاتی خۆیاكر: بەرەكێ لاكێشە د لایێ ڕاستێ یێ دیوارێ ئاڤاهی دا هەیە نڤیسین ل سەرە بەس ناهێتە خواندن، ب تنێ ستێرەكا گەلەكا جوان لسەرە و شەش گوشە هەنە، لێ بەر پیرۆزی و كەڤناریا ڤان شینواران ساڵانە خەڵكەكێ زۆر سەردانا جهێ ناڤبری دكەت، بەڵێ جهێ داخێ یە ئاڤاهیێ ناڤا كەلهێ ژ بەر كاودانێن سرووشتی چەند جارەكان هاتیە هەڕفین و پێدڤیە ئەڤ ئاڤاهیە جارەكا دی ل سەر شێوازێ كەڤنار ل دووڤ شیوازێ خۆ یێ بەرێ ب بەرو كسلێ بهێتە نووژەنكرنڤە بۆ پاراستن ب بازاڕكرنا جهێ ناڤبری.
رێڤەبەرێ شوونەوار و كەلەپۆریا ئاكرێ گۆتژی: ب رەنگەكێ گشتی زێدەگاڤی دهێنە كرن، ب تایبەت ئاكرێ هندەك گرۆپێن نەنیاس جهێن شوونواری هەلدكۆلن، هندەك دوز ڤەكرینە و چەند كەس هاتینە دەستەسەركرن ب كەفالەت هاتینە ئازاد كرن دخوازین كەسێن تێكدەر بهێنە دەستەسەركرن. مە هەماهەنگی هەیە گەل دەزگەهێن ئەمنی ل ئاكرێ و بەردڕەش، تێكدانا جهێن شوونواری تێكدانا ناسناما مللەتانە بۆ وێ چەندێ ئەڤ جهە بهێنە پاراستن بۆ راكێشانا گەشتیاران، مخابن چەندین بەرێن شوونواری هاتینە شكاندن و مە سكالا تۆماركریە بۆ وێ چەندێ ئەو كەس بهێنە دەستەسەركرن.
