چەند بیرهاتن ژ چادرگەهەكێ
شیان مەهدی كانیساركی
مللەتێ كورد ئێك ژ وان مللەتایە كۆ چ نەمایە نەهاتییە سەرێ وان ژ ستەم و دەردەسەریێن ڤێ ژیانێ، ئانكۆ تاكێ كورد ئەگەر بدەت دلێ خوە و باخڤیت و ئەڤا ب چاڤێن خوە دیتی و ب گۆهێن خوە گوهلێ بوویی بێژیت دبیت ب سەدان پەرتووك تێرا نەكەن. ئەز دشێم بێژم هەر چیرۆكەك ژوان ڕۆمانەكە یا تژیە ژ وانە و سەرهاتیێن ژیانێ. ژبلی ڤی بابەتی مێژویا ڕویدانێن دژی مللەتێ كورد تێدا دیاردبیت، لەوا یا پێدڤیە ئەو ڕویدانێن هاتینە سەرێ (تە) خەلكی هەمی بهێنە تورماركرن و دیكیومێنتكرن داكۆ ببیتە مێژوو و بەرەبابێ نوی بزانیت چ تشت ب كەیف و شاهی نەهاتیە، ژ وێ ئەڤا دبینیت. ئێك ژ وان نموونان ئەڤ پەرتووكا هێژایە ب ناڤی (رۆژانێن چادرگەها مێردینێ بیرەوەری، بەلگەنامە، ئەلبۆم. ) كۆ ژ لایێ بەڕێز ( خالد ئەحمەد بادی) ڤە هاتییە بەرهەڤكرن، باس ل دەردەسەری و نەهامەتیێن مللەتێ كورد ب گشتی دكرن و پاسی ڕۆژانێن دناڤ شۆڕەشێن كوردی (ب تایبەت گولانێ) باس دكەت، پاشی ڕۆژێن ڕەش یێن ئەنفالان و دەمێ جەنگێ عێراق و ئیرانێ ڕاوەستیایی و ئێكسەر هێزێن ژ جەنگی زڤرین، عێراقێ بەرێ هەمیان دایە كوردستانێ كۆ پتر ژ 160,000 سەدوشێست هزار سەرباز بوون، ژبلی هێزێن خوەجهـ و كرێگرتی و خوەفرۆشان، داكۆ ئێكا هند ژ خەلكێ چێكەن بەرەف سنۆرێن توكیا ڤە ئاوارە ببیت و پاشی ژ سنۆری ڤەگۆهاستن بۆ چادرگەهان. هێدی هێدی نڤیسەر دهێتە سەر پێزانین و هویربینیان لسەر چادرگەهێ و كا ژیانا وێرێ یا چەوا بوو. خالا هەرە جهێ سەرنجێ من ژ نڤیسكاری گۆهـلێبووی، دبێژیت: ( شۆڕەشا گولانێ تەمامەتیا شۆڕەشا ئیلۆنێ بوو، هەروەسان ئەڤ تشتێ د چادرگەهان ڤە ڕوویددا ژی تمامەتیا شۆڕەشا گولانێ بوو).
ئەگەر ئەم بێژین یان ئێك بێژیت، دبیت كرنا خەلكێ دناڤ وان چادرگەهاندا دێ بیتە ئەگەرێ دویركەفتنا وان ژ هەمی تشتی، ب تایبەت بابەتێن (خواندن، نڤیسین، پەرتووك، ڕەوشەنبیری، پەروەردەیی، زمان، ئایین و ….هتد) نەخێر! ئەو چادرگەهـ بۆ ئەگەر پتر ئەو خەلك خوە ڕەوشەنبیر بكەن و پێشبیخن و قوتابخانەیان ڤەكەن و چ جاران دەست ژ زانستی بەرنەدەن، ئانكۆ ب كورتی ڕێڤەبرنەكا باش هەبوو ژ لایێ وان گرۆپ ( و لژنەیێن) خەلكێ چێكرین. ئەز دشێم بێژم ئەو چادرگەهـ ب تایبەت مێردینێ خەلكێ هەمیێ ب هاریكاریا ئێك و دو بۆ خوە وەكی ( كوردستانەكا بچویك) لێكربوو و تێدا دژیان. ب تایبەت تشتێ بوویە جهێ سەرنجا من د سەر هەمی نەخوەشی و خەما دویری وەلاتی، زەلام هەمی دچوونە بۆ خوە كاركرنێ ژ دەرڤە»عاملیێ» و نیڤەكا وی ئارەی پێشكێشی مامۆستایان دكر داكۆ وانەیان نیشا زارۆكێن وان بدەن! هەروەسان ئەز مامە ڕاوەستیایی دەمێ من خواندی و گۆهـلێبووی كۆ مامۆستایان ( سێلێت نانی بكاردئینان وەكی تەختە ڕەش) ئەڤەژی ژ لایەكی ڤە جهێ دلخوەشیێ بوو بۆ من.
هەروەسان سەرەدەریا حكومەتا توركیا لگەل خەلكێ سڤیل، ڕاستی ژی تورك ژ دوژمنێن توند یێن كوردانن، نڤیسەر دبێژیت: «ئەم 20 هزار كەس پتر بووین و وان ب تنێ ڕێك ددا 12 كەسا هەر ڕۆژ بچن بازاری لگەل 12 پولیسان لگەل بن، داكۆ بۆ خەلكی دی د ژۆرڤە تشتێن پێدڤی لگەل خوە بینن، ژ بلی برینا كارەبێ بۆ دەمێ چەندین ڕۆژان و كۆشتنا خەلكی و ژەهركرنا نانی كۆ چەندین كەس پێ شەهیدبوون و ڕێك نەددا نە نوژدارێن مە خەلكێ دەرمان بكەن نەژی ژ دەرڤە چ نوژدار ڤڕێدكرن!
پەرتووكا:
رۆژانێن چادرگەها مێردینێ. بیرەوەری، بەلگەنامه، ئەلبۆم..
نڤیسین: خالد ئەحمەد بادی
ژ. لاپەڕان: 349
