چەند جھێن گەشتیاری ل ئامێدیێ دھێنە سزادان
ئه‌ڤرۆ نيوز:
ژ بەر پێگری نەکرن ب رێنمایان جھەکێ گەشتیاری ل ھاڤینگەھا ئاشەوا یا سەر ب قەزا ئامێدیێ ڤە دھێتە داخستن و چەندین جھێن دیتر ژی ب کۆژمەکێ پارەی ھاتینە سزادان.
کاروان حەجی سەعید، بەرپرسێ بنگەھێ چاڤدێریا بازڕگانی ل ئامێدیێ بۆ رۆژناما ئەڤرۆ دیار کر کو ئەو بەردەوام دووڤچوونێ ل سەر ھەموو جھێن گەشت و گۆزاری، ھەروەسا جھێن دیتر ژی دکەن ژ پێخەمەت بەڕژەوەندیا گشتی و پاراستنا ساخلەمیا وەلاتیان، ب تایبەتی ژی گەشتیاران و گۆت: “د دووماھی دووڤچوونا مە دا ل سەر ڤان جھێن گەشتیاری؛ یێن دەڤەرێ و ژ بەر پێگری نەکرن ب رێنمایان، مە جھەکێ گەشتیاری بۆ دەمێ چەند رۆژان داخستیە و ھاتیە ھایدارکرن ب سزایێن دژوارتر ھەکە ھات و ئەو رێنمایان بجە نەئینیت”.
ناڤھاتی دیار ژی کر، وان ڤێ جارێ سەرا چەندین جھێن دی یێن گەشتیاری دایە، ژ وان ژی ھندەک ھەنە بۆ جارا ئێکێ یە رێنمایێن نوو وەردگرن، بجهـ نەئینن دێ ھێنە سزادان و گۆت: “بەری چەند رۆژان مە ھژمارەکا جھێن گەشتیاری ل سنوورێ قەزا ئامێدیێ ب کۆژمەکێ پارەی سزادابوون، پشتی کو پێگری ب رێنمایێن گەشتیاری نەکرین”.
