چەند خزمەتگۆزاری بۆ نامەیێن مەسنجەری و ئینستگرامی دهێنە زێدەكرن
كۆمپانیا مێتا گوهۆڕینێن نوو د نامەیێن ئینستاگرام و مەسنجەری دا بەردەستكەت، مەرەم ژی پێ ئەوە كو بشێت ئەو نەرازیبوونێن ل دەف وەلاتیان ل دۆر ڤان تۆرێن خوە یێن جڤاكی نەهێلیت.
كۆمپانیا مێتا دێ گوهۆڕینان د نامێن خوە یێن ئینسگرامی دا كەت كو ئارمانج ژێ ئەوە كەسێن سنێلە یێن د بن 18 سالیێ دا وان وێنە و گرتەیان د نامەیان دا نەبینن یێن رویساتی تێدا.
د نوكە دا، فشارێن مەزن ل سەر كۆمپانیێن تەكنولۆژی ل ئەمریكا و ئەورۆپا هەنە، ژمارەیەكا لایەنان رەخنە ل پلاتفۆرمێن سۆشیال میدیایێ گرتینە ژ بەر كو ب دیتنا وان ئەو پلاتفۆرم دبنە ئەگەرێ ئالۆدەبوونێ.
مێتا راگەهاندیە وێ ساخلەتێ پاراستنێ د نامەیێن ئێكسەر یێن ئینستاگرامی دا بەردەستكریە كو ب رێكا ئوتۆماتیكی دێ ئەنالیز بۆ نامەیان هێتە كرن كا نامەیا هاتیە ڤرێكرن ناڤەرۆك یان وێنەیێن رویس تێدا هەنە یان نە، ئەگەر رویساتی تێدا هەبیت دێ هێتە بەرزەكرن.
ئەڤ ساخلەتە ب شێوەیەكێ ئوتۆماتیكی دێ بۆ بكارهینەرێن تەمەنێن وان ژ 18 سالان كێمتر كاركەت ل دەمەكێ یێن د سەر وی تەمەنی دا مێتا دێ شیرەتان لێ كەت وی ساخلەتی ئەكتیڤ بكەن.
مێتایێ ئاماژە ب وێ چەندێ ژی كریە «ئامیرە ب خۆ دێ وێنەیان ئەنالیز كەت ژ بۆ پاراستنا بكارهینەری ژ دیتنا وێنەیێن رویساتی تێدا و ئەڤ چەندە دێ د وان نامەیان ژی دا یێن ب تنێ هەردو لایەنێن ڤرێكەر و وەرگرێ نامەیێ دبینن end to end encryption بەردەست بیت و مێتا ماف نینە تەماشەی وان وێنەیان بكەت ئەگەر بۆ نەهێتە ریپۆرتكرن».
بەروڤاژی ئەپلیكەیشنێن مەسنجەر و وەتسئەپی یێن مێتایێ، نامەیێن ئێكسەر یێن ئینستاگرامی ساخلەتێ ب تنێ هەردو كەس دبینن end to end encryption تێدا نینە، لێ مێتایێ راگەهاندیە ئەو یا رژدە وی ساخلەتی بەردەست بكەت.
ژ لایەكێ دی ڤە و ل گۆرەی ژێدەرێن نووچەیان؛ بكارهێنەرێن مەسنجەری دێ شێن مفای ژ خزمەتگۆزارییا وان یا نوو وەرگرن كو خزمەتا هنارتنا وێنەیان ب كوالێتیا HD كو بەری نها نە دشیان ب ڤی رەنگی وێنەیان ب هنێرن، ئەو ژی ب رێكا هەلبژارتنان كو بەری نوكە ژی ل واتسئاپی بەردەست كربوو.
هەڤدەم مێتا مەزنترین قەبارەیێ رێك پێ دایی بۆ ڤرێكرنا فایلان ژ بۆ 100 مێگابایتان زێدەكر و ئەڤ چەندە فایلێن ژ جۆرێ PDF، پەوەرپۆینت و فایلێن ژ جۆرێ Zipped Files و ژمارەیەكا جۆرێن دی ب خوە ڤە دگریت.
دهێتە چاڤەرێكرن ئەڤ هەردو خزمەتگۆزارییە بۆ هەمی بكارهینەران قووناغ ب قووناغ د حەفتیێن بهێت دا بهێنە بەردەستكرن.
