چ روحیەت د پەیوەندیێن نوكە دا نەمایە
ئەڤرۆ
قائید میرۆ:
راهێنەرەكێ گەشەپێدانا مرۆڤی ئاماژە پێ كر، پێدڤیە هەر تاكەك بەری كەسەكی بنیاسیت زانیاری ل سەر كەسایەتیا ئەڤی كەسی هەبن و زۆریا هژمارا هەڤالان مەرج نینە بەرۆڤاژی دڤێت كەسێن دبنە هەڤالێن مرۆڤی وەك پێدڤی بن و گوت: هەڤالینیا نوكە زێدەتر ل سەر بنەمایێ بەرژەوەندیانە و پێشكەفتنا تەكنەلۆژیایێ كاریگەری ل سەر پەیوەندیێن جڤاكی كریە.
كارزان یاسین، راهێنەرێ گەشەپێدانا مرۆڤی بۆ رۆژناما ئەڤرۆ دیار كر، دڤێت مرۆڤ د هەلبژارتنا هەڤالان دا یێ هشیار بیت و مەرج نینە مرۆڤی زۆر هەڤال هەبن، بەرۆڤاژی جورێ هەڤالان گرنگە بۆ مرۆڤی، هەكە مرۆڤی هزار هەڤال هەبن و وەك پێدڤی نەبن چو مفا نینە جار ژی هەیە مرۆڤی ئێك هەڤال هەبیت هەروەكی هزار هەڤالایە و گۆت: (ئانكو دڤێت كار ل سەر هژمارا هەڤالا نەهێتە كرن بەلكۆ ل سەر چاوانیا هەڤالینیێ بهێتە كرن، مەرج نینە مرۆڤێ رەوشنبیر كێم هەڤال هەبن وەكی د جڤاكێ مەدا دهێتە گۆتن، هەلبژارتنا هەڤالان ل سەر خواستا مرۆڤیە).
راهێنەرێ گەشەپێدانا مرۆڤی ئەو چەندە ژی دیار كر كو بێگومان تەكنولۆژیایێ كاریگەری لسەر پەیوەندیێن جڤاكی پەیدا كریە و پشتی پەیدابوونا تەكنولۆژیایێ پەیوەندی سار بووینە و هەڤال و نیاسینا ب رێیا تۆرێن جڤاكی تام تێدا نینە و گۆت: (چونكی ب دیتنا من مەرجە مرۆڤ هەڤالێ خوە ل نێزیك ببینیت نەك ب رێیا تۆرێن جڤاكی و بەس، بەرێ هەڤالینی و پەیوەندیێن جڤاكی زۆر باشتربوون ل سەر بنەمایەكێ باشتر دهاتنە ئاڤا كرن، بەرۆڤاژی هەڤالینی و نیاسینا خەلكی د سەردەمێ نوكەدا روحیەت تێدا نینە و یا مریە، مرۆڤ هەڤالێ خوە ببینیت زێدەتر مرۆڤی بۆ خوە رادكێشیت، راستە دنیا بچووك بوویە ب هاتنا تەكنولۆژیایێ بەلێ رەحم نەهێلا و نەكنولۆژیایێ پەیوەندی كرینە دارەكێ رەق).
كارزان یاسین دا زانین ژبەركو رەوشا ئابوری یا وەلاتیان وەك پێدڤی نینە و دامەزراندن نەمایە ئەڤەژی بۆ ئەگەر مرۆڤ هەتا رادەیەكی مەلاقیێ بۆ كەسێ بەرامبەر بكەت هەتا بگەهیتە ئاستێ كویلایەتیێ ئەڤە ژی هەموو ب مەرەما بدەستڤە ئینانا ئارمانجێن خوە، ئانكو خەلكەك یێ بەرهەڤە هەموو كارەكی بكەت تنێ بۆ بدەستڤە ئینانا پێدڤیێن ژیانێ و گۆت: (زۆر بوونا پێدڤیێن ژیانێ خەلك كریە كویلە و نەچار كریە تەنازۆلێ بۆ هەموو كەسەكی بكەت، یان ژی زۆر جارا خەلك زێدەتر خوە نێزیكی بەرپرس و زەنگینا دكەن و هەڤالانیا وان دكەن داكو مفادار ببن ژ ئەڤی بەرپرسی یان زەنگینی، یێ پێگەهەكێ بلند
هەبیت هەڤالێن زۆر دێ هەبن، چونكی هەڤالینی لسەر بنەمایێ بەرژەوەندیانە د سەردەمێ نوكەدا).
