چ ل دنیایێ هات؟!
عەبدولرەحمان مەحموود
وەكی دهێتە گۆتن دنیا بۆ كەسێ نەمایە و بۆ كەسێ نەبوویە مال و گەلەك نفشان ژێ باركریە، لێ یا ل جهێ خوە مای هەر ئەڤ دنیایە یە، نفش بۆ نفشی گۆهۆڕین ب سەر شێوازێ ژیانا واندا هاتینە خوار و هەر نفشەكی سالوخەت و تایبەتمەندیێن خوە هەبووینە چ ژلایێ ژین و ژیارێ ڤە یان ئاستێ زانست و زانین و پەروەردە و دابونەریت و ڕێزگرتن و كلتۆری ڤە، یانژی ژلایێ ئابوری و ڕامیاری و ئایدولۆژی ڤە و…..، ئەڤەژی تشتەكێ زۆرێ نۆرمالە كو ئەڤ گۆهۆڕینە ب سەر ژین و ژیار و شێوازێ بیركرن و هەر تشتەكێ ب ژیانا مرۆڤان ڤە گرێدای بیت پەیدا ببن و هەتا گەهشتییە ڤی چەرخێ ئەم تێدا كو ب چەرخێ تەكنۆلوژیا و پێشكەفتنێ دهێتە زانین، هەر ژ ئەنجامێ ڤێ پیشكەفتنێ و ڤێ تەكنولژیایێ گۆهۆڕین ب سەر شێوازێ ژین و ژیار و جۆرێ بیركرنا ڤی نفشی دا ئینایە خوار، ئەڤەژی تشتەكێ سروشتی یە، لێ ڤێ پێشكەفتن و تەكنولوژیا نها كارتێكرنا خوە یا خراب هەبوویە و مرۆڤ ب جارەكێ ب خۆڤە مژوولكرینە و ئەڤەژی بوویە سەدەما وێ یەكێ پەیوەندیێن مرۆڤایەتیێ خاڤ ببن و رەحم و دلۆڤانیێ ژ دلێن مە باركریە و ڕێزگرتن و خوە شكاندن بۆ ئێك دو وەكی جاران نەمایە و فێل و فێلبازی و بێ بەختی و هەر تشتەكێ خراب ژیانا مرۆڤایەتیێ تێكشێلاندی یە و كارێ بەشەك ژ خەلكی بوویە چاڤلێكرنەكا كۆرە و دابونەریتێن نوو دناڤا جڤاكی دا پەیدابووینە و هەرئێك ژمە ب ژیانا خوە ڤە مژوولە و های ژ دەوروبەرێن خوە نەمایە، ژبەر ڤێ یەكێ ژی گەلەك جاران ب تایبەت ل دیوانا مە گوه ل ڤێ هەڤوكێ دبیت (ئەڤە چل ڤێ دنیایێ هاتییە) یا مە بەست پێ ژڤێ دنیایێ ئەوە مرۆڤێن ڤێ دنیایێ نە، بڕاستی تشتێن سەیر و ئنتیكە ژ مرۆڤێن نها مە گۆه لێ دبیت و دبینین، چ ب ئەنجامدانا كاروكریارێن نە ژهەژی و دووركەفتن بیت ژ دابونەریت و كلتۆرێ خوە یێ ڕەسەن و هەر تشتەكێ دی یێ دگەل سیما و كلتۆر و دابونەریتێن مە یێن كوردەواری نە گونجیت و كەسەك ژمە ژی خوە تومەتبارناكەت ژڤێ گێلەشوكا ئەم كەفتینە تێدا و بتنێ هەر ئێك ژمە یێ بەرامبەری خوە گۆنەهباردكەت و لۆمەیا دەوروبەرێن خوە دكەت و بێی ئەم لێزڤڕینەكێ د كار و كریار و هزركرنا خوە دا بكەین و شاشیێن خوە چارەسەربكەین، ب ڕاستی ئەڤە ژی زەنگا مەترسیێ یە ل سەر جڤاكێ مە و بڤی ڕەنگی چ پیڤەر نامینن ڕێز و بهایێ مرۆڤان ل پشت بهێتە پاراستن.
