چ یە دگەل فوتبۆلا دهۆكێ رووددەت؟
ئیحسان حەسەن
ئەز باش دزانم كو پشتەڤانێن دهۆكێ ژ هەموو كەسان پتر دزانن، كا چییە ل یانەیا وان چێدبیت تایبەتی تیما فوتبۆلێ ئەوا پشكدار دخولا ستێرن ئیراقێ دا، من باوەریەكا تمام یا هەی كو كەس ژ پشتەڤانێن ئەلهویان پتر دلگرانینن بۆ تیما خوە، لێ ئەو نها ب روون وئاشكرایی دناڤا تیمێ دا دیار دبیت براستی جهێ حێبەتی و پرسیارێ یە، من نەڤێت بەحسێ سەركەڤتن و دۆراندنێن ڤێ داویێ یان نەمانا هیڤیێن ناسناڤێ خولێ، یان دوركەڤتن ژ رێزێن پێشییێ بكەم، ژبەركو ئەڤە د مەیدانێن وەرزشی دا ب تایبەت دیاریا فوتبۆلێ دا دسروشتی نە، یێ كو لڤی وەرزی پێزانین لسەر فوتبۆلا دهۆكێ هەین، باوەرناكەت ژوێ ئەوا نها دگەل تیمێ چێ دبیت، لڤێرە ژی من بەحسێ وی بازنەیە یێ كو پێدڤییە هەردەم یا موكم و بهێز و پێكڤە گرێدای بیت ئەوژی، كارگێریا یانەیێ، دەستەكا راهێنانێ، یاریزان، جەماوەر، براستی پتر ژ تێبینەیەكێ هەنە وەكو جاران ناهێنە دیتن، ئەوژی ژبەر ڤان ئەگەران یا ئێكێ، كی باوەردكەت هێشتا یانەیێ هژمارەكا یاریان یا مای و دلیڤەكا گرنك یا هەی بۆ هەڤركییێ لسەر ناسناڤێ كۆپا ئیراقێ، كارگێریا یانەیێ یێن سۆزێن تیمەكا باشتر بۆ وەرزێ بهێت ددەت، ما هوون نابینن ئەڤ داخویانییە دێ كارتێكرنێ ل دەرونێ یاریزانێن هەوە كەت ب تایبەتی وان یاریزانانێن لڤی وەرزی هند رۆلێ خوە یان ئەو دەلیڤە دناڤا پێكهاتیێ سەرەكی دا نەدیتی، یا دویێ ما دەمێ هندێ یە بەحسێ مان یان نەمانا دەستەكا راهێنانێ بكەین، یان ببینە دو بەرەكا ئەڤ دەستەكە بمینیت یان نە، ئەگەر ئەم بزانین كو ب هەموو رەنگان هەتا داوییا ڤی وەرزی دێ دبەردوام بن، یا سێیێ یاریزانێن مە یێن كو دوور كەڤتین ژ ئاستێ خوە یێ جاران بتایبەت پشتی برنا ناسناڤێ خولا یانەیێن كەنداڤی، خوە مژویلكرنا وان ب نەرازیبوونێ لسەر بریارێن دادڤانان، سەرباری وان هەموو تێبینیان یێن مە لسەر دادڤانان هەین، پێدڤییە پتر هەست ب بەرپرسیارەتییێ بكەن، بزانن كا ئەو چەند رۆلێ خوە دناڤا یاریێ دا دبینن، خوە براوەرد بكەن دگەل ئاستێ یاریزانێن تیمێن دی پاشی گلەیان بكەن، یا چوارێ جەماوەر و پشتەڤانێن یانەیێ یێن كو پێدڤییە دخوشی و نەخوشییان دا دگەل تیمێ بن، نە بنە ئەگەرێ گڤاشتنێن زێدە لسەر یاریزانان، وە بكەن كو یاریزان دووركەڤن ژ ئاستێ خوە یێ جاران، لدووماهییێ یا من دڤێت بێژم، سەرباری هندێ كارگێریا یانەیێ لدەستپێكێ هووسا خوە نیشامەدا وەكو نموونەیێن رێكخستنێ و رێكوپێگییێ و خوە دەرئێخستن ژ هەموو كاودانێن سەخت، هیڤییا مە ئەوە بشێن سنورەكی بۆ ڤان ئاستەنگان بدانن، ژبەر كو ئەوا نها ئەم دبینین و دهێتە پێش ژ هەژی هندێ یە پرسیار بهێتە كرن، كا ئەڤە چییە دگەل تیما فوتبۆلا یانەیا دهۆكێ رووددەت؟.
