ڕاسپاردەیێن ئێكەمین دیدارا هەژار موكریانی
ل ڕۆژا شەمبی 22/2/2025 ل هەولێرێ و ل هۆلا ڕاگەهاندنێ، ژ لایێ بەشێ ڕەوشەنبیری و ڕاگەهاندنا پ. د. ك، ئێكەمین دیدارا هەژار موكریانی (هەژار و زمان) برێڤەچوو.
د ئێكەمین دیدارا هەژار موكریانی دا، ژ لایێ لیژنەیا ڕاسپاردەیان، چەندین ڕاسپاردە هاتنە كۆمكرن كو پێكهاتبوون ژ وان ڕاسپاردەیێن پێشتر لیژنەیا ئامادەكارا دیدارێ پانێلیست ڕاسپاردبوون ژبلی هەبوونا بابەتێ وان یێ سەرەكی، ڕاسپاردە ژی هەبن. دیسا هەموو ڕاسپاردەیێن مێڤانان ژی هاتنە وەرگرتن و پشتی خواندنا ڕاسپاردەیان ژی، هەموو دیتن و سەرنج و تێبینیێن ئامادەبوویان بەرچاڤ و گرنگیڤە هاتنە وەرگرتن.
ئەڤێن خوارێ پوختەییا ڕاسپاردەیانە:
ئێك: حكومەتا هەرێما كوردستانێ ب فەرمی و د ئاستێ بلند دا پتر گرنگیێ ب زمانێ كوردی و نڤیسینا كوردی بدەت.
دو: سوود ژ زمانێ زەنگینێ فرە دیالێكتێ هەژار موكریانی بهێتە وەرگرتن بۆ بیاڤێن پەروەردە و خواندن و كاروبارێن جڤاكی و كارگێڕی و سیاسی.
سێ: قورئانی پیرۆز – وەرگێڕانا هەژاری، ببیتە وانەیا سەرەكی یا خواندنێ ل ناڤەندێن خواندنا ئایینی و مزگەفت و حوجرەیان.
چوار: ب هاریكاریا وەزارەتا ڕەوشەنبیری و لاوان یا حكومەتا هەرێـما كوردستانێ و ئەكادیمیا كوردی، گشت دامودەزگەهێن پەیوەندیدار دەزگەهەكێ فەرمی ل كوردستانێ بهێتە دامەزراندن بۆ گرنگیدان ب زمان و كارێ فەرهەنگسازیێ و مێژوویا زمان و بۆ ئێكلاكرنا پرسەیێن زمانێ كوردی، وەكو: ڕێنڤیس و گرفتێن ڕێزمانی ب نووترین پێدڤیێن تەكنەلۆژیا سەردەم و تاقیگەهێن دەنگی.
پێنج: پەیكەرەكێ مەزن و تایبەت، د ئاستەكێ بلندێ هونەری دا ل هەولێرا پایتەخت بۆ هەژار موكریانی بهێتە دروستكرن.
شەش: سالانە د سات و دەمێ خۆ دا «دیدارا هەژار موكریانی» بڕێڤە بچیت و هەر جارەكێ بۆ ژانرەكی بهێتە تەرخانكرن.
حەفت: ڕاگەهاندنێن خواندنێ و بهیستنێ و دیتنێ یێن كوردی ب شێوەیەكێ فەرمی بهێنە پێگیركرن ب زمان و ڕێنڤسا پاقژ و ئێكگرتی یا كوردی، نەك ئەو پشڤەزڤڕین و وێرانیا نوكە د میدیایا كوردی دا هەی.
هەشت: پێدڤیە زمانێ كوردی ل گەل گۆڕانكاری و پێشكەفتنێن تەكنەلۆژی و د سەردەمێ ب دیجیتالكرن و زیرەكیا دەستكرد دا هەڤتەریب بیت.
نەه: زانكۆ و پەیمانگەهێن هەرێما كوردستانێ د سەردەمێ دیجیتالی و زیرەكیا دەستكرد دا، گرنگیا سەردەمیانە ب زمانێ كوردی بدەن بۆ ب ئەلكترۆنیكرنا هەموو بابەتێن زمانەڤانی و ئەدەبی و كەلتووری، ب هەبوونا تاقیگەهێن هەمەجۆرێن ئەلكترۆنی بۆ دەنگ و ئاخڤتن و گوهۆڕینا ئاخڤتنێ بۆ نڤیسینێ.
دەه: دامەزراندنا ناڤەندەكا سەربخۆ، یان ڕێكخراوەكێ بۆ زمانزانێن كوردستانێ كو گرنگیێ ب زمان و پرسەیێن زمانی بدەت. پێدڤیە ئەو ناڤەندە ژ كەسێن پسپۆڕیێن هەر چار پارچەیێن كوردستانێ و شارەزا ب دیالێكتێن زمانێ كوردی پێكهاتبیت.
یازدە: ب پشتەڤانیا حكومەتا هەرێما كوردستانێ جڤاتەكا بلند یا زمانێ كوردی بهێتە دامەزراندن. ئەو جڤاتە ژ كەسێن پسپۆڕ و شارەزا د هەموو زارێن زمانێ كوردی پێكهاتبن و كارێ سەرەكی یێ وێ جڤاتێ گەشە و هەمەلایەنیا زمانەكی بیت بۆ دروستكرن و پاراستنا بنەمایێن نەتەوەیی.
دوازدە: بزاڤ بهێتە كرن، هەردو شێوەزارێن كرمانجیا سەری و خوارێ د دەمێ نهۆ دا پێ دهێتە نڤیسین، تەمام نێزیكی هەڤ ببن.
سێزدە: د ئەكادیمیا كوردی دا دەزگەهەكێ تایبەت ب فەرهەنگێ ڤە بهێتە دامەزراندن كو زمانزانێن هەرچار پارچەیێن كوردستانێ كاری تێدا بكەن.
چاردە: دابینكرنا سێرڤەرەكێ تایبەت ب زیرەكیا دەستكرد بۆ وان كەس و گرۆپ و لایەنێن كو دڤێن بێ بەرانبەر خزمەتگوزاریێن زیرەكیا دەستكرد بۆ زمانێ كوردی بەردەست بكەن.
پازدە: دابینكرنا داتایێن پێدڤی ب زمانی (ب شێوەیێ تێكست و دەنگ)ی، ب ڕاوێژ ل گەل پسپۆرێن زیرەكیا دەستكرد، بۆ زمانێ كوردی و بۆ وان زار و شێوەزارێن هیچ ژێدەرەكێ پێدڤی د بیاڤێ ب دیجیتالكرنا زمانی دا نینە، ب تایبەت هەورامی، كوردییا خوارێ و لەكی.
شازدە: گەشەپێدانا ئەركێن زمانێ كوردی ب تایبەت بۆ بیاڤێن جودا جودایێن زانستی و پشتەڤانیا وان پڕۆژەیێن كو خزمەتا وێ ئارمانجێ دكەن، بۆ نموونە: گەشەپێدانا ئینسایكلۆپیدیایا وەكو ویكیپیدیا. بزاڤ كرن بۆ ب كوردیكرنا پشكێن زانستی یێن قووناغێن بەكالۆریۆسێ ب مفا وەرگرتن ژ ئەزموونا وەلاتێن پێشكەفتی د ڤی بیاڤی دا.
حەڤدە: بزاڤ بهێتە كرن بەرهەمێن هەژارێ موكریانی بكەنە كتێبێن دەنگی.
هەژدە: هەموو بەرهەمێن هەژار موكریانی بكەنە دیجیتالی.
نۆزدە: ب جیهانیكرن و ناسانا پتر یا هەژار موكریانی و بەرهەمێن وی د ناڤەندێن ئەكادمی و ئەدەبی دا.
ئێکەمین دیدارا هەژار موكریانی
24ی شواتا 2025
