ڕاهێنەرێ دهۆكێ: ژ ئاستێ یاریزانان ڕازی نینم و دڤێت ڤەگەڕینە سەركەڤتنان
قەیس وەیس:
تیما فوتبۆلا یانەیا دهۆك بەردەوامە ل سەر ئاست و ئەنجامێن خوە یێن خراب، پشتی نە شیایی پشتی گرێیا یانەیا نەجەف ڤەكە ب گۆلەكێ وەكهەڤ بوون، د یارییا واندا ئەوا ل ئەینییا بۆری ژ چارچووڤەیێ هەڤڕكیێن گەڕا 35ێ یا خولا ستێرێن ئیراقێ یا فوتبۆلێ ل یاریگەها یانەیا دهۆك هاتییە كرن.
دهۆك د تاقیكرنا خوە دا ب سەرنەكەڤت
د ناڤ ئەرد و جەماوەرێ خوە دا ئەلهۆیێن چیا د تاقیكرنا خوە یا ڤێ یاریێ دا ب سەرنەكەڤت و نەشیا دلێ پشتەڤانێن خوە ب خوەشی بەردەوامبكەت، هەرچەندە تیما دهۆكێ شیابوو گۆلا ئێكێ د خولەكا 30ێ ژ نیڤا ئێكێ یا یاریێ بینت ئەوا ژلایێ پیشەكارێ وێ لۆكاس مۆسێس ڤە هاتییە تۆمار كرن، لێ گۆلا دویێ هاتە ڕەدكرن ئەوا هێرشبەرێ دهۆكێ ئیبراهیم غازی د خولەكا 45ێ دا تۆماركری پشتی دادڤان چوویە ڤارێ و هژمارت فاول ل سەر یاریزانێ دهۆكێ، د ڤێ نیڤێ دا یاریزانێ نەجەف ب كارتا سۆر هاتە دوورئێخستن، د نیڤا دویێ دا بۆچوون دهاتنە گۆتن كو یاریزانێن دهۆكێ دێ ئاست و ئەنجام باشتر لێكەت، لێ بەرۆڤاژی یانەیا نەجەف سەرباری كێمترییا یاریزانەكی شیان د خولەكا 65 دا گۆلا وەكهەڤیێ ژلایێ ستێرێ تیما خوە محەمەد قاسم بینن و هەموو هیڤیێن دهۆكێ بۆس ێ خالان نە هێلان و یاری ب گۆلەكێ وەكهەڤی ب دووماهی هات.
هێرشا پاشڤەچوونێ د ڕێزبەندییا دهۆكێ دا هەیە
ب شێوەیێ بەروەخت تیما دهۆكێ خالێن خوە هێلانە ب52 خالان كێمتر دو یاریێن پاشئێخستی ل رێزا شەشێ دهێت ژ 15 سەركەڤتن، حەفت وەكهەڤی و 10 خوسارەتییان، تیما نەجەف گەهاندنە 42 خالان ل رێزا 14ێ ل سەر لیستێ دهێت، تیما دهۆكێ ئەو د پێنج یاریێن بۆری یێن پاشئێخستی دا بتنێ چار خال كۆمڤەكربوون و هیڤیێن ڕێزێن پێشیێ تایبەت هەتا یا سێیێ ژ دەستداینە، هەروەسان دبیت ژبەر نە تمامكرنا بادەكا ڕێپێدانی چ ئۆمێدێن پشكداریێ د قارەمانیێن ئاسیایی دا نەبن.
ڕاهێنەرێ دهۆكێ دلگرانە ژ ئاست و ئەنجامان
د كۆنگرەیەكێ ڕۆژنامەڤانی دا ئەوا پشتی یارییا بەرانبەر نەجەف هاتییە كرن ئەمیر ئەزرەفشان ڕاهێنەرێ تیما یانەیا دهۆك دلگرانە ژ ئاست و ئەنجامێن تیما خوە ئەوێ بۆ دەزگەهێن ڕاگەهاندنێ گۆت: ئەم هاتبووینە د ناڤ یاریگەهێ دا و هەموو پێشبینییا مە ئەو بوو و هیڤیێن مە دەستڤە ئینانا سێ خالان بوو، لێ چەنس ژی دگەل مە نەبوو، لێ یا دلگران بوویم ژ ئاستێ تیما خوە سەرباری د ڕۆژێن پێشتر دا مە كارەكێ باش بۆ ڤێ یاریێ كربوو، دێ هەموو بزاڤان كەین بۆ یاریێن داهاتی ئاست و ئەنجامان ڤەگەڕینن و دڤێت سەركەڤنان ڤەگەڕینین، یانەیا دهۆك سەنگ و ناڤودەنگێ خوە هەیە.
دو یاریێن پاشئێخستی ماینە
ژ بلی چار یاریێن چارچووڤەیێ خولێ یێن هەموو یانەیان د خولێ دا تیما دهۆكێ ژ سەرجەمێ حەفت یاریێن پاشئێخستی كرین، دو یاری ماینە، بڕیارە ئێك ژ ئەوان یاریێن پاشئێخستی ل سێ شەمبییا بهێت بەرانبەر یانەیا مینا یا بەسرایی دناڤ ئەرد و جەماوەرێ خوە بكەت دا ئەوا دێ ژ چارچووڤەیێ گەڕا 33ێ یا پاشئێخستی هێتە كرن، یارییا دویێ ژ گەڕا 28ێ دێ بەرانبەر یانەیا هەولێر بیت ئەوا بڕیارە ل یاریگەها شەهید فرانسۆ حەریری بهێتە كرن،لێ هێشتا ژڤان نە هاتییە دیاركرن.
